နိုဝင်ဘာ-၁၈၊၂၀၂၅။အိမ်သွင်/People’s Spring
ကချင်ပြည်နယ်၊ ဖားကန့်ဒေသမှာ ဒီနေ့(နိုဝင်ဘာ ၁၈ရက်) နေ့ခင်းပိုင်းမှာ ဒေသခံတွေကျောက်တူးနေကြတဲ့နေရာကို စစ်ကောင်စီက ဒရုန်းနဲ့ဗုံးကြဲလို့ အရပ်သားတွေ ထိခိုက်မှုတွေရှိခဲ့ပါတယ်။
ဖားကန့်မြို့၊ မရှီကထောင်ရပ်ကွက်က ကျန်ဂတ် မှော်ထဲကို နေ့ခင်း ၁နာရီ၄၅မိနစ်မှာ ဒရုန်းနဲ့ ဗုံးသုံးလုံးကြဲတာလို့ သိရပါတယ်။
” ဒီနေရာက စက်ယန္တရားတွေမပါဘဲနဲ့ လက်ကျင်းတူးကြတဲ့နေရာပါ။ ထမင်းစားလောက်ရုံပဲရှာကြတဲ့နေရာ။ အဲဒီကို ကြဲတာဗျ” လို့ ဒေသခံတဦးက ပြောပါတယ်။
Public Service Announcement
ဒရုန်းဗုံးကျရောက်ပေါက်ကွဲလို့ မြေပြင်မှာထိခိုက်မှုတွေရှိတယ်လို့ သိရပေမယ့် အသေးစိတ် သတင်းမရရှိသေးပါဘူး။
ပြီးခဲ့တဲ့ နိုဝင်ဘာ ၁၃ရက်ကလည်း ဖားကန့် မြို့နယ်၊ လုံးခင်းကျေးရွာအုပ်စု၊ မားဆားကျေးရွာကို စစ်ကောင်စီက လက်နက်ကြီးနဲ့ပစ်ခတ်လို့ ကလေးငယ်တစ်ဦးနဲ့ ကျောင်းဆရာမတစ်ဦး ဒဏ်ရာရခဲ့ပါတယ်။
ဖားကန့်ဒေသမှာ နိုဝင်ဘာ ၆ရက်ကစပြီး တိုက်ပွဲတွေပြန်ဖြစ်ပြီး စစ်ကောင်စီက လေကြောင်းကနေဗုံးကြဲတာတွေ၊ လက်နက်ကြီးနဲ့ပစ်ခတ်တာတွေ လုပ်နေပါတယ်။
နိုဝင်ဘာ ၁၁ရက်ကလည်း ဖားကန့်မြို့၊ ကထန်ကွက်သစ်ထဲကို လေကြောင်းကနေ ဗုံးကြဲလို့ ကလေးမိခင်တစ်ဦးသေဆုံးပြီး ကလေးငယ်တစ်ဦး ဒဏ်ရာရရှိခဲ့ပါတယ်။
နိုဝင်ဘာ ၈ရက်ကလည်း စစ်ကောင်စီကလက်နက်ကြီးနဲ့ပစ်ခတ်လို့ အမျိုးသမီးတစ်ဦးသေဆုံးခဲ့ပါတယ်။
ဖားကန့်၊ မှော်စီစာလမ်းဆုံမှာ နိုဝင်ဘာ ၁၀ရက် မနက်ပိုင်းက စစ်ကောင်စီယာဉ်တန်းကို KIA၊ KPDFက မိုင်းဖောက်ခွဲတိုက်ခိုက်ခဲ့ပါတယ်။
စစ်ကောင်စီတပ်ဖွဲ့ဝင် ၁၀ဦးကျော်သေဆုံးသလို ပွိုင့်ဖိုက်အပါအဝင် သေနတ်နဲ့ကျည်ဆန်တွေကို KIA ၊KPDFက သိမ်းယူခဲ့ပါတယ်။
လက်ရှိမှာ ထိပ်တိုက်ရင်ဆိုင်တိုက်ပွဲတွေမဖြစ်ပေမယ့် စစ်ကောင်စီကလက်နက်ကြီးနဲ့ ရမ်းသမ်းပစ်ခတ်တာတွေ၊ ဒရုန်းနဲ့ဗုံးကြဲတာတွေလုပ်နေလို့ သတိပြုကြဖို့ KIA ၊KPDFက ဒေသခံတွေကို သတိပေးထားပါတယ်။
