နိုဝင်ဘာ – ၂၅ ၊၂၀၂၅ ၊ ဆိုင်းမင်း/People’s Spring
စစ်ကိုင်းမြို့နယ်ထဲ အုန်းတောမြောက်ရွာမှာရှိတဲ့ တိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ် ရဲ့ ကျောင်းအုပ် ကြီး နေထိုင်ရာ လိုင်းခန်းမှာ ပစ်ခတ်မှု ဖြစ်ပြီး ဇနီးဖြစ်သူ သေဆုံးသွားတယ်လို့သိရပါတယ်။
အဲဒီဖြစ်စဉ်ကနိုဝင်ဘာလ ၂၁ ရက်ညနေ ၈နာရီ ဝန်းကျင်မှာ ကျောင်းအုပ်ရဲ့ နေအိမ် လိုင်းခန်းမှာ ဖြစ်ပွားတာပါ။ ပစ်ခတ်မှုကြောင့် ကျောင်းအုပ် ဦးစိုးကြည်ရဲ့ အသက် ၅၄ နှစ်အရွယ် ဇနီးဖြစ်သူ ဆီးခုံကို သေနတ်မှန်ပြီး စစ်ကိုင်းဆေးရုံ အရောက်မှာ သေဆုံးသွားပါတယ်။
“ကျောင်းထဲထိဝင်ပစ်တာလို့ သိရတယ်၊ စစ်ကိုင်းမြို့ပေါ်နဲ့တော့ နာရီဝက်ကျော်လောက်သွားရတယ်”လို့ စစ်ကိုင်းမြို့ခံတစ်ဦးပြောပါတယ်။
Public Service Announcement
ကျောင်းအုပ် ဇနီးရဲ့ နာရေး ကိုတော့ နိုဝင်ဘာ၂၂ရက်မှာ ပြုလုပ်ခဲ့တယ်သိရပါတယ်။ ပစ်ခတ်မှုကိုတော့ ဘယ်အဖွဲ့ကပြုလုပ်တယ်ဆိုတာ မသိရသေးပါဘူး။
စစ်ကိုင်းမြို့ရှိ တိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ်ဟာ စစ်ကောင်စီရဲ့ နယ်စပ်ရေးရာဝန်ကြီးဌာနလက်အောက် က ကောလိပ်ကျောင်းတခုဖြစ်ပါတယ်။
အခုနှစ်အတွက် ပထမနှစ်တက်ရောက်မယ့် ကျောင်းသား၊ ကျောင်းသူ စိစစ်ရွေးချယ်ပွဲကို ပြီးခဲ့တဲ့ ရက်ပိုင်းက ပြုလုပ်ရာမှာ စစ်ကောင်စီရဲ့ နယ်စပ်ရေးရာဝန်ကြီးဌာန ဒုတိယဝန်ကြီး ဗိုလ်ချုပ်ဖြိုးသန့် တက်ရောက်ခဲ့ပါတယ်။
