ဒီဇင်ဘာ-၁၁၊ ၂၀၂၅။မေရီ/People’s Spring
မန္တလေးတိုင်း၊ စဉ့်ကူးမြို့နယ်၊ ပင်လယ်ကြီးရပ်ကွက်ကို စစ်တပ်က လေကြောင်းကနေဗုံးကြဲတိုက်ခိုက်လို့ ပြည်သူ တစ်ဦးသေဆုံးပြီး ငါးဦးထိခိုက်ဒဏ်ရာရရှိခဲ့ကြောင်း ဒေသခံတွေက ပြောပါတယ်။
ဒီကနေ့ ဒီဇင်ဘာ ၁၁ရက် ညနေ ၅နာရီခွဲခန့်က မိတ္ထီလာကနေတက်လာတဲ့ ဂျက်ဖိုက်တာနဲ့ စဉ့်ကူးမြို့နယ် ပင်လယ်ကြီးရပ်ကွက်ကို သုံးကြိမ်လေကြောင်းတိုက်ခိုက်ခဲ့ရာ အမျိုးသားတစ်ဦးသေဆုံးပြီး ပြည်သူ၅ဦး ထိခိုက်ဒဏ်ရာရရှိခဲ့ကြောင်း ဒေသခံတစ်ဦးက ပြောပါတယ်။
“ထိခိုက်တာက ကျား ၃ဦး၊ မ ၂ဦးပါ။ ပျက်စီးတာကတော့ စကစလက်ထက်က ဝန်ထမ်းအိမ်ရာ ပျက်စီးမှု ရှိတယ် “လို့ ဒေသခံက ပြောပါတယ်။
Public Service Announcement
ဒါ့အပြင် နေအိမ်တွေလည်း မီးလောင်ပျက်စီးခဲ့ကြောင်း ဒေသခံတွေက ပြောပါတယ်။
ဒီဇင်ဘာ၂ရက်ကလည်း စဉ့်ကူးမြို့နယ်၊ ညောင်ဝန်းကျေးရွာကို စစ်တပ်က လေကြောင်းတိုက်ခိုက်ခဲ့ရာ အမျိုးသား တစ်ဦးသေဆုံးပြီး (၁၀)နှစ်အရွယ် ကလေးငယ် တစ်ဦးအပါအဝင် ပြည်သူ လေးဦးထိခိုက်ဒဏ်ရာရရှိခဲ့ပါတယ်။
စဉ့်ကူးမြို့နယ်ဟာ မိုးကုတ်-မန္တလေးလမ်းပေါ်မှာ တည်ရှိနေပြီး စဉ့်ကူးမြို့အပါအဝင် မိုးကုတ်လမ်းတလျှောက်က စခန်းတွေကိုပါ တော်လှန်ရေးအင်အားစုတွေ ပြီးခဲ့တဲ့ နှစ်လယ်ပိုင်းက သိမ်းပိုက်ထားနိုင်ခဲ့ပါတယ်။
စစ်ကောင်စီတပ်ဟာ မိုးကုတ်-မန္တလေးလမ်းပိုင်းကို ပြန်လည်စိုးမိုးဖို့ ကြိုးစားနေပြီး လက်တလောပြန်ရသွားတဲ့ မတ္တရာမြောက်ခြမ်းကနေ စဥ့်ကူးနယ်ထဲကို ဝင်ဖို့ကြိုးစားနေတယ်လို့ ဒေသခံတွေက ပြောပါတယ်။
ပြီးခဲ့တဲ့ နိုဝင်ဘာ ၁၂ရက်နဲ့ ၂၇ရက်ကလည်း စဉ့်ကူးမြို့နယ် မာလဲရွာစာသင်ကျောင်းနဲ့ ဝါးရုံကုန်းကျေးရွာ ဘုန်းတော်ကြီးကျောင်းကို စစ်တပ်က လေကြောင်းတိုက်ခိုက်ခဲ့လို့ ပြည်သူ ၁၀ဦးသေဆုံးပြီး ၁၅ဦးထက်မနည်း ဒဏ်ရာရရှိကာ စာသင်ကျောင်းအပါအဝင် အဆောက်အဦး ၃လုံး ပျက်စီးခဲ့ပါတယ်။
