ဒီဇင်ဘာ-၁၈၊၂၀၂၅။ကဖေး/People’s Spring
ကိုးကန့်တပ်(MNDAA) ရဲ့ အထူးဒေသ(၁) ထဲမှာ ရွေးကောက်ပွဲလုပ်ဖို့ ခွင့်မပြုသလိုမဲပုံးလည်းချလို့မရ မဲရုံလည်း ဖွင့်လို့မရဘူးလို့ MNDAAရဲ့ သတင်းတွေကို ထုတ်ပြန်ပေးနေသူတစ်ဦးက ပြောပါတယ်။
ရှမ်းပြည်နယ်မြောက်ပိုင်းကလားရှိုးမြို့အပြင် MNDAA ထိန်းချုပ်ထားတဲ့နေရာတွေမှာပါ ရွေး
ကောက်ပွဲကျင်းပမယ်လို့သတင်းနဲ့ထွက်ပေါ်လာပြီးတဲ့နောက် MNDAA ရဲ့ သတင်းတွေကို ထုတ်ပြန်ပေးနေတဲ့ နေဝေစိုး က လူမှုကွန်ရက်ကတစ်ဆင့် ဒီဇင်ဘာလ၁၈ရက်နေ့မှာ အသိပေးထားတာဖြစ်ပါတယ်။
” အထူးဒေသ(၁)ထဲမှာ ရွေးကောက်ပွဲလုပ်ဖို့ ခွင့်မပြုထားသလို ။ မဲပုံးလည်း ချလို့မရ မဲရုံလည်းဖွင့်လို့မရပါဘူး” လို့ သူကရေးသားထားပါတယ်။
Public Service Announcement
ယခုရက်ပိုင်းမှာ လားရှိူး နဲ့ သီပေါမြိုကြားက MNDAA ထိန်းချုပ်ထားတဲ့ နောင်မွန်မှာ ရွေး
ကောက်ပွဲလုပ်မယ်လို့ စစ်ကောင်စီအုပ်စုက ပြောသွားတဲ့အကြောင်း ဒေသခံတွေက ပြောပါတယ်။ စစ်ကောင်စီအုပ်စုကို ကိုးကန့်တပ်တွေက လုံခြုံရေးယူနေတာတွေ့ကရတယ်လို့ ဒေသခံတချို့ကပြောပါတယ်။
နားလည်မှုလွဲပြီး ဝင်ခွင့်ပြုပေးခဲ့တာလို့သိရကြောင်းMNDAAရဲ့ သတင်းတွေကို ထုတ်ပြန်ပေးနေသူက လူမှုကွန်ရက်ကနေ ထပ်မံရှင်းပြထားပါတယ်။
“ အဲ့တာက စကမ က နှစ်ပေါက်တစ်ပေါက်ရိုက်ပြီး ဒီဘက်ကလည်း နားလည်မှုလွဲပြီး ခွင့်ပြုလိုက်မိတာလို့သိရပါတယ်။အခုနောက်ဆုံးကတော့ အထူးဒေသ(၁) ထဲမှာ ရွေးကောက်ပွဲ လုပ်လို့မရပါဘူး” လို့ ရေးထားပါတယ်။
နေဝေစိုး က MNDAAရဲ့ သတင်းထုတ်ပြန်ရေးဌာနဖြစ်တဲ့ The Kokang ကတဆင့် သတင်းတွေထုတ်လွှင့်ပေးနေသူဖြစ်ပါတယ်။
လားရှိုးမြို့ကို တရုတ်အစိုးရအကူအညီနဲ့ပြန်လည်ထိန်းချုပ်ပြီးတဲ့နောက်ပိုင်း မြို့ပေါ်ရပ်ကွက်၁၂ခုမှာ ရွေးကောက်ပွဲလုပ်ဖို့စစ်ကောင်စီက ကြေညာခဲ့ပါတယ်။ ဒီဇင်ဘာလဆန်းပိုင်းမှာ MNDAA နဲ့ စစ်ကောင်စီဆွေးနွေးပြီး MNDAA ထိန်းချုပ်ထားတဲ့ ဒေသတွေအနက် ကျေးရွာ ၊အုပ်စု ၉ ခုမှာ ရွေးကောက်ပွဲလုပ်မယ်လို့သတင်းတွေထွက်ပေါ်နေတာပါ။ ဒီဇင်ဘာလ၁၅ရက်နေ့ကဆိုရင် လားရှိုးမြို့ပေါ်ကို စစ်တပ်နဲ့ကိုးကန့်တပ်တွေရဲ့ ယာဉ်တန်းအတူတူဝင်ရောက်လာခဲ့တာတွေ့ရတယ်လို့ဒေသခံတွေကပြောပါတယ်။
လားရှိုးမြို့မှာ ရပ်ကွက်၁၂ခု၊ ကျေးရွာအုပ်စု၇၅ခုရှိပါတယ်။ စစ်ကောင်စီက ရပ်ကွက်၁၂ခုကိုထိန်းချုပ်ထားပြီး ကျေးရွာအုပ်စု ၇၅ ခုကိုတော့ MNDAAက ထိန်းချုပ်ထားပြီး အထူး ဒေသ(၁)ထဲမှာ ထည့်သွင်းထားပါတယ်။ဒါကြောင့်စစ်တပ်ကလားရှိုးမှာရွေးကောက်ပွဲလုပ်မယ်ဆိုရင် မြို့ပေါ်ပဲလုပ်ရမှာဖြစ်ပြီး ရွာတွေမှာလုပ်ချင်ရင် MNDAA ခွင့်ပြုမှလုပ်ရမှာဖြစ်ပါတယ်။
လားရှိုး-သီပေါနဲ့ တန့်ယန်း၊မိုင်းရယ်မြူကြားကရွာတွေကိုလည်း MNDAA က ထိန်းချုပ်ထားတာဖြစ်ပါတယ်။
MNDAAဟာ ၂၀၂၃ အောက်တိုဘာလ ၂၇ရက်မှာတွင် AA၊TNLA တို့နဲ့အတူ ရှမ်းပြည်နယ်မြောက်ပိုင်းမှာ ၁၀၂၇စစ်ဆင်ရေးစတင်ခဲ့ပြီး လားရှိုး၊ လောက်ကိုင်၊ ချင်းရွှေဟော်၊ မုန်းကိုး၊ ဖောင်းဆိုင်၊ ကုန်းကြမ်း၊ ကွမ်းလုံ၊ သန္ဓီ၊ တာမိုးညဲ၊ ပန်ဆိုင်း မြို့တွေကိုသိမ်းပိုက်ခဲ့ပါတယ်။
အဲဒီမြို့တွေထဲက တရုတ်အစိုးရရဲ့ဖိအားကြောင့် လားရှိုးမြို့ နဲ့ အရှေ့မြောက်တိုင်း စစ်ဌာနချုပ်ကကို ၂၀၂၅ ခုနှစ် ဧပြီလမှာ ကျည်တချက်မဖောက်ပဲစစ်ကောင်စီထံ ပြန်လွှဲပေးခဲ့ရပါတယ်။သိန္နီမြို့ကိုလည်း ပြန်ပေးဖို့ စစ်ကောင်စီက ဖိအားပေးနေတယ်လို့ သတင်းတွေမကြာခဏထွက်ပေါ်ခဲ့ပါတယ်။ ဒါ့အပြင် လားရှိုးမြိို့အနီးနဲ့ ပြည်ထောင်စုလမ်းပိုင်းမှာတပ်စွဲထားတဲ့ MNDAAတပ်တွေဆုတ်ပေးဖို့ စစ်ကောင်စီကပြီးခဲ့တဲ့နိုဝင်ဘာလမှာ တောင်းဆိုလာလို့ စစ်တပ်နဲ့MNDAA ဆက်ဆံရေးတင်းမာမှုလည်းရှိနေပါတယ်။
တရုတ်နယ်စပ်နဲ့ MNDAA ထိန်းချုပ် ဒေသတွေကို ဖြတ်လာတဲ့ကုန်ကားတွေကို စစ်တပ်က ဖမ်းဆီးသလို လားရှိုး-သီပေါကြားက ဒုဌဝတီမြစ်ကူး တံတားကိုလည်း နှစ်ဘက်စလုံးက ပိတ်ထားပါတယ်။
၁၀၂၇စစ်ဆင်ရေးစတင်ချိန်ကတော့စစ်အာဏာရှင်ပြုတ်ကျတဲ့အထိတိုက်ခိုက်သွားမှာလို့ MNDAAက ပြည်သူလူထုကိုတိုင်တည်ပြီးထုတ်ပြန်ခဲ့ပေမယ့် ၂၀၂၄ သြဂုတ်လ နောက်ပိုင်းတိုက်ပွဲမဖြစ်တော့ပဲစစ်တပ်နဲ့အပစ်ရပ်ထားတာဖြစ်ပါတယ်။
MNDAAရဲ့ အထူးဒေသ(၁)ထဲမှာ ရွေးကောက်ပွဲလုပ်မယ်လို့သတင်းတွေထွက်ပေါ်နေချိန်မှာပဲဒီဇင်ဘာလ၁၇ရက်နေ့မှာ MNDAAက ၎င်းတို့အသုံးပြုမယ့်တရားဝင်အလံကိုထုတ်ဖော်ပြသခဲ့ပါတယ်။
အာဏာသိမ်းစစ်တပ်က ရွေးကောက်ပွဲကိုအပိုင်း ၃ ပိုင်း နဲ့ လုပ်မယ့်လို့ကြေညာခဲ့တာမှာ ရွေးကောက်ပွဲအပိုင်း (၁)မှာ ရှမ်းပြည်နယ်မြောက်ပိုင်းက လားရှိူးနဲ့နောင်ချို ပါတယ်လို့ ကြေညာပြီး အပိုင်း(၃)မှာ ရှမ်းမြောက်က ကျောက်မဲ မှာလုပ်မယ်လို့ဆိုထားပါတယ် ။
