ဇန်နဝါရီ – ၁၉ ၊၂၀၂၆ ၊ ဇော်ဝင်း/People’s Spring
ကရင်နီတပ်တွေရဲ့ အကျဉ်းထောင်ကနေ ထွက်ပြေးလာတဲ့ စစ်သုံ့ပန်းဖြစ်သူ မြန်မာစစ်တပ် ရဲ့ ဗိုလ်အဆင့်ရှိသူ ကို ထိုင်းဘက်ခြမ်းမှာ ဖမ်းမိတယ်လို့ ထိုင်းသတင်းအချို့မှာ ဖော်ပြလာပါတယ်။
ဗိုလ်ကြီးပိုင်စိုးသူလို့ထွက်ဆိုထားတဲ့ စစ်ကောင်စီတပ်ဖွဲ့ဝင် ကို မဲဟောင်ဆောင်ခရိုင်၊ခွန်ယွမ်ပြည်နယ်ထဲမှာရဲတွေကမနေ့( ဇန်နဝါရီ ၁၈ ရက်) ညနေပိုင်းက ဖမ်းမိတာလို့ဆိုပါတယ်။
အခုချိန်မှာရဲတပ်ဖွဲ့ကထိုင်းစစ်တပ်ကိုလွှဲပြောင်းထားတယ်လို့ထိုင်းသတင်းတစ်ရပ်မှာ အသိပေးပါတယ်။
Public Service Announcement
မယ်ဟောင်ဆောင်ခရိုင်၊ခွန်ယွမ်ပြည်နယ်ထဲမှာရဲတွေကမြန်မာစစ်တပ် တပ်ဖွဲ့ဝင်ကိုတွေ့ရှိခဲ့ပြီးခေါ်ယူထိန်းသိမ်းခဲ့တဲ့နောက်နိုင်ငံတကာ စည်းမျဉ်းတွေနဲ့အညီကိုင်တွယ်ဖို့ နယ်စပ်ရှိ ထိုင်းစစ်တပ်တာဝန်ရှိသူတွေဆီလွှဲ ပြောင်းပေးခဲ့တယ်လို့ဆိုပါတယ်။
မယ်ဟောင်ဆောင် ရဲတပ်ဖွဲ့ အကြီးအကဲ ဆွန်ခရစ်ချ် အွန်တက်ခ်ရိုင်ကလည်း မြန်မာစစ်တပ်ရဲ့ဗိုလ်အဆင့်ရှိသူတစ်ဦးထိုင်းပိုင်နက်ထဲ ရောက်လာလို့ ရဲတွေရဲ့ ထိန်းသိမ်းမှုကို ခံထားရကြောင်း အတည်ပြုခဲ့ပါတယ်။
ကရင်နီတော်လှန်ရေး အင်အားစုတွေ လက်ထဲက ထွက်ပြေးလာတဲ့ သုံ့ပန်းစစ်ကောင်စီတပ်ဖွဲ့ဝင် ၁၀ ဦးလောက်ဟာမြန်မာဖက်ဆီပြန်ပို့ပေးဖို့အတွက်ထိုင်းဖက်မှာ လက်နက်ချလိုကြောင်းထိုင်းအာဏာပိုင်တွေဆီ ဆက်သွယ်ထားတယ်လို့လည်း သိရပါတယ်။
ထွက်ပြေးလာသူတွေထဲမှာတပ်ရင်းမှုး၊ ဒုတပ်ရင်းမှုး၊တပ်ခွဲမှုးအပါ အဝင် စစ်ကောင်စီတပ်သား ၁၀ဦးကျော်ကထိုင်းအာဏာပိုင်တွေထံ လက်နက်ချဖို့ ကြိုးပမ်းနေတယ်လို့ ထိုင်းသတင်းကဖော်ပြတာပါ။
သူတို့ရဲ့ရည်ရွယ်ချက်ကထိုင်းအစိုးရကတစ်ဆင့်မြန်မာနိုင်ငံကိုပြန်လည် ပို့ဆောင်ခံရရေးဖြစ်တယ်လို့ သိရပါတယ်။
အခုဖြစ်စဥ်နဲ့ပတ်သက်လို့ကရင်နီတပ်မတော် နဲ့ ကရင်နီပြည်နယ် တာဝန်ရှိသူတွေကို လူထုနွေဦးက ဆက်သွယ်မေးမြန်းနေဆဲ ဖြစ်ပါတယ်။
ကရင်နီပြည်ကြားကာလအုပ်ချုပ်ရေးကောင်စီ IEC တွဲဖက် အတွင်းရေးမှုးဦးဗညားကတော့ “သူတို့ထိုင်နေတဲ့ ပုံစံတွေ ဓာတ်ပုံတွေအရ သူတို့ထိုင်းနိုင်ငံထဲရောက်တယ်ဆိုတာ ပြောလို့ရတယ်၊ သူတို့ဦးတည်ချက်ကိုတချို့ကြည့်လိုက်တော့ သူတို့ယူဆောင်သွားတဲ့ပစ္စည်းကိရိယာတွေ လိုက်လံဖမ်းဆီးဖို့ကြိုးစားတဲ့နေရာမှာတချို့ထိုင်းနိုင်ငံနဲ့ဆက်စပ်တဲ့အချက် အလက်တချို့ တွေ့ရှိတယ်၊သေချာတာတခုက တချို့ထိုင်းနိုင်ငံကို ရောက်ရှိသွားတယ်လို့ ပြောလို့ရတယ်”လို့ လူထုနွေဦးသတင်းဌာနကို ပြောပါတယ်။
မနေ့(ဇန်နဝါရီ ၁၈ ရက်)မနက်အစောပိုင်း တစ်နာရီခန့်က မယ်စဲ့ မြို့နယ်မှာရှိတဲ့ IEC ရဲ့ အကျဥ်းထောင်ကနေ စစ် သုံ့ပန်း စစ်ကောင်စီတပ်သား ၈၆ ယောက်ထွက်ပြေးသွားတာ ဖြစ်ပါတယ်။
ထွက်ပြေးသုံပန်း အကျဥ်းသားတွေနဲ့အတူလက်နက်ငယ်ကိုးလက်လည်း ပါသွားတယ်လို့IEC ကထုတ်ပြန်အသိပေးထားပါတယ်။
