ဇန်နဝါရီ ၂၆၊ ၂၀၂၆။ မေရီ/People’s Spring
မန္တလေးတိုင်း၊ မိတ္ထီလာခရိုင်၊ မလှိုင်မြို့မှာ အွန်လိုင်းငွေလိမ်လယ်မှု ခေါ် ကျားဖြန့်အတွက်သုံးဖို့ Kpay အကောင့်တွေ ကျပ်ငါးသောင်းပေးပြီး လိုက်လံဝယ်သူတွေရှိနေကြောင်း ဒေသခံတွေက ပြောပါတယ်။
ဒီကနေ့ ဇန်နဝါရီ ၂၆ ရက်က မလှိုင်မြို့ပေါ်မှာ လူတစ်စုက ပြည်သူတွေကို ဘဏ်ဆီ ခေါ်ဆောင်ကာ Kpay အကောင့်ဖွင့်ခိုင်းပြီး အကောင့်တစ်ခု ကျပ်ငါးသောင်းပေးကာ ဝယ်ယူနေကြောင်း ဒေသခံတွေက ပြောပါတယ်။
“ရပ်ကွက်ထဲက အမျိုးသမီးတွေကို မှတ်ပုံတင်ယူခိုင်းပြီး KBZ ဘဏ်မှာ ခေါ်သွားပြီး kpay acc ဖွင့်ခိုင်းတာ။ တယောက်ကို ၅သောင်းပေးတယ်”လို့ မလှိုင်မြို့ ဒေသခံတစ်ဦးက ပြောပါတယ်။
Public Service Announcement
အရေအတွက်မည်မျှ Kpay အကောင့် ရောင်းလိုက်မိတယ်ဆိုတာ အတိအကျ မသိရသေးပါဘူး။
ပြည်သူတွေ အနေနဲ့ မိမိမှတ်ပုံတင်နဲ့ ပြုလုပ်ထားတဲ့ Kpay အကောင့်တွေကို ရောင်းချတာဟာ ငွေလိမ်သမား ကျားဖြန့်တွေရဲ့ အန္တရာယ် ကျရောက်နိူင်တာမို့ သတိပြုဆင်ခြင်ကြဖို့ လူထုသတင်းကွန်ရက်-မလှိုင်က သတိပေးပါတယ်။
“အခုငွေရလို့ရောင်းတဲ့သူတွေက ဖုန်းတောင်မကိုင်နိုင်ဘူးရယ်။ လာဝယ်တဲ့သူအပြစ်ပြောရအောင်ကလည်း ရောင်းတဲ့သူက မှတ်ပုံတင်ကိုင် လိုက်သွားတာဆိုတော့ ပြောရခက်တယ်။ ဒါက ကျွန်တော်တို့သိတာပဲ ရှိသေးတာ။ အရင်ဘယ်နှစ်ယောက်ပါသွားလဲ မသိနိူင်ဘူး”လို့ လူထုသတင်းကွန်ရက်-မလှိုင်ရဲ့ တာဝန်ရှိသူတစ်ဦးက ပြောပါတယ်။
ပြီးခဲ့တဲ့ နှစ်ထဲက မန္တလေးတိုင်း မြို့နယ် ငါးမြို့နယ်မှာလည်း အခုလိုပဲ Kpay အကောင့်တွေကို ဘဏ်မှာလိုက်ဖွင့်ပေးရင် အကောင့်တစ်ခု ကျပ်နှစ်သောင်းနှုန်း ပေးတဲ့သူတွေရှိခဲ့ပါတယ်။
အဲဒီနောက် ပုသိမ်ကြီးမြို့နယ်ထဲက Kpay အကောင့် ရောင်းချလိုက်တဲ့ ပြည်သူတော်တော်များများ ကျားဖြန့်ငွေလိမ်ဂိုဏ်းနဲ့ ပတ်သက်တယ်ဆိုပြီး စစ်တပ်က ဖမ်းဆီးသွားခဲ့ဖူးပါတယ်။
