အာဏာသိမ်းခေါင်းဆောင်အမိန့်နဲ ပြန်လည်ပြုပြင်နေတဲ့ ကမ္ဘောဇသာဒီနန်းတော်အုတ်မြို့ရိုးပြိုကျပြီးလူသေဆုံး

​ဖေ​ဖော်ဝါရီ-၄၊၂၀၂၆။အိမ်သွင်/People’s Spring

အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်အမိန့်နဲ့ ပြန်လည်ပြုပြင်နေတဲ့ ဟံသာဝတီမြို့ဟောင်း၊ကမ္ဘောဇသာဒီနန်းတော်ထဲက ဆောက်လုပ်ဆဲ အုတ်မြို့ရိုးပြိုကျပြီး လူသေဆုံးမှုဖြစ်ခဲ့ပါတယ်။

ပဲခူးမြို့ ၊ နန်းတော်ရာရပ်ကွက်ထဲက ကမ္ဘောဇသာဒီနန်းတော်ဝန်းထဲမှာ ဖေဖော်ဝါရီ ၂ ရက်နေ့ ၊ ညနေ ၃ နာရီခွဲခန့်ကအုတ်ရိုးပြိုကျခဲ့တာဖြစ်ပါတယ်။

“ဒီမြို့ရိုးကိုပြန်ဖော်မယ်ဆိုပြီးတော့ ဌာနဆိုင်ရာတွေက တော်တော်လေးအားထည့်ပြီးလုပ်နေကြတာ။ မင်းအောင်လှိုင်ကအမိန့်ပေးသွားတာ။အခု သူတို့လုပ်လက်စမြို့ရိုးပြိုကျသွားတာ။တစ်ယောက်သေတယ်။သုံးယောက်ဒဏ်ရာရတယ်” လို့ ပဲခူးမြို့ခံတစ်ဦးကပြောပါတယ်။

Public Service Announcement

သေဆုံးသူက မြို့ရိုးပြုပြင်ရေးမှာအလုပ်ဝင်လုပ်နေတဲ့ ပန်းရံလုပ်သားတစ်ဦးဖြစ်ပါတယ်။ဒဏ်ရာရတဲ့သုံးဦးကိုလည်း ပဲခူးဆေးရုံကိုပို့ဆောင်ပြီးကုသပေးနေရတယ်လို့သိရပါတယ်။

ကမ္ဘောဇသာဒီနန်းတော်ဟာ တောင်ငူဘုရင် ဘုရင့်နောင်က မြန်မာသက္ကရာဇ် ၉၁၅ (အေဒီ ၁၅၅၃ )ခုနှစ်တွင် တည်ဆောက်ခဲ့တာဖြစ်ပါတယ်။ ခေတ်အဆက်ဆက်မှာ အထိအခိုက်အပျက်အစီးတွေလည်းရှိခဲ့ပြီး တချို့နေရာတွေမှာ မြေအောက်ကိုလည်းမြုပ်နေပါတယ်။အာဏာရှင်ဟောင်းဗိုလ်ချုပ်မှူးကြီးသန်းရွှေလက်ထက်မှာလည်း မြို့ရိုးကိုပြန်လည်တူး ဖော်ခဲ့ဖူးပါတယ်။

အာဏာသိမ်းစစ်ခေါင်းဆောင်မင်းအောင်လှိုင်က ၂၀၂၅ ဩဂုတ်လ ၃ ရက်နေ့မှာ ကမ္ဘောဇသာဒီရွှေနန်းတော်ထဲကို ရောက်လာခဲ့ပြီးဟံသာဝတီမြို့တော်ဟောင်းနေရာကို ပြန် လည် ဖော်ထုတ် ဖို့နဲ့ကမ္ဘောဇသာဒီနန်းတော်ကျုံးကိုလည်း ပြန်လည်ပြုပြင်ဖို့ အမိန့်ပေးခဲ့ပါတယ်။အဲ့ဒီအမိန့်ကြောင့်ပဲ နန်းတော်ဟောင်းအနီးက ဒေသခံတွေရဲ့နေအိမ်တွေကို ဖယ်ရှားခိုင်းခဲ့ပါတယ်။

အာဏာသိမ်း​ခေါင်း​ဆောင်ဟာ ​​ဗေဒင်ယတြာ​တွေယုံကြည်သူဖြစ်ပြီး သူ့အာဏာတည်မြဲရေးအတွက် ယတြာ​ချေတာ​တွေကို မကြာခဏပြလုပ်​လေ့ရှိပါတယ် ။ကမ္ဘောဇသာဒီနန်း တော်မြို့ရိုး ပြန်လည်ပြင်ဆင်တာလည်း ယတြာချေတာလို့​ဒေသခံ​တွေကပြောကြပါတယ်။