ဖေဖော်ဝါရီ- ၁၂ ၊၂၀၂၆ ၊ဆိုင်းမင်း/People’s Spring
ကချင်ပြည်နယ်မြို့တော် မြစ်ကြီးနားမြို့မှာမနေ့(ဖေဖော်ဝါရီ ၁၁ ရက် ) နေ့ခင်းပိုင်းက ဆွဲကြိုးလုဖြတ်တာနဲ့ နေအိမ်ထဲ သူခိုးဝင်တဲ့ ဖြစ်စဉ် တွေဖြစ်ခဲ့တယ်လို့ မြို့ခံဆီကသိရပါတယ်။
ဆိုင်ကယ်စီးလာတဲ့ အမျိုးသမီးနှစ်ဦးကို နောက်ကနေ ဆိုင်ကယ်နဲ့လိုက်လာပြီး ဆွဲကြိုးဖြတ်တဲ့ဖြစ်စဉ်က မြစ်ကြီးနားမြို့ ၊ ယုဇန ရပ်ကွက်မှာ နေ့ခင်းပိုင်း ဖြစ်ပွားတာဖြစ်ပြီး နေအိမ် သူခိုးဝင်တာကတော့ မနက်ပိုင်း ၁၁ နာရီဝန်းကျင်မှာ ရွှေညောင်ပင်ရပ်ကွက် မှာ ဖြစ်ပွားခဲ့တာပါ။
ဆွဲကြိုးလုဖြတ်ခံရတဲ့ ဖြစ်စဉ်ကတော့ အမျိုးသမီးနှစ်ဦးစီးလာတဲ့ ဆိုင်ကယ်နောက်ကို ဆိုင်ကယ်နဲ့အမျိုးသားက နောက်ကကပ်လိုက်လာပါပြီး ဆွဲကြိုးလုတာပါ။
Public Service Announcement
လည်ပင်းကဆွဲကြိုးကိုဆောင့်ဆွဲပြီးလုယက်တာကြောင့် ဆိုင်ကယ်တိမ်းမှောက်ပြီး အမျိုးသမီးနှစ်ဦးလုံးပြုတ်ကျသွားတာကို စီစီတီဗီ မှာတွေ့မြင်ရပါတယ်။
“ နေ့ခင်းကြောင်တောင်ကြီး အမေနဲ့ ညီမ အလတ် မင်္ဂလာဆောင်က အပြန် ဆွဲကြိုး ဖြတ်ခံရတာပါ” လို့ မိသားစုဝင်အမျိုးသမီးတစ်ဦးကလူမှုကွန်ရက်မှာ ရေးတင်ထားပါတယ်။
ဆွဲကြိုးလုခံရတဲ့အမျိုးသမီးနဲ့နီးစပ်သူမြို့ခံတစ်ဦးကလည်း” မင်္ဂလာ ဆောင်ကအပြန် ဆွဲကြိုးဖြတ်ခံရတာပါ” လို့ ပြောပါတယ်။
မြစ်ကြီးနားမြို့၊ရွှေညောင်ပင်ရပ်ကွက်မှာဖြစ်ပွားတဲ့နေအိမ်သူခိုးဝင်တဲ့ဖြစ်စဉ်မှာ ကျုးလွန်သူအမျိုးသားကိုဖမ်းမိတယ်လို့သိရပါတယ်။
မြစ်ကြီးနားမြို့ဟာ စစ်ကောင်စီတပ်ရဲ့ မြောက်ပိုင်းတိုင်းစစ်ဌာနချုပ်အခြေစိုက်တာဖြစ်ပြီး စစ်ကောင်စီ ရဲ့ အုပ်ချုပ်မှုအောက်မှာရှိတာပါ။
စစ်တပ်ရဲ့တကျော့ပြန်အာဏာသိမ်းမှုအပြီး မြစ်ကြီးနားမြို့အပြင် မြန်မာနိုင်ငံကမြို့ကြီးတွေမှာလုယက်မှု၊ဓားပြမှု ၊လူသတ်မှုလို ရာဇဝတ်မှုကြီးတွေခပ်စိပ်စိပ်ဖြစ်ပွားခဲ့ပါတယ်။
