ဖေဖော်ဝါရီ-၁၈၊ ၂၀၂၆ ဇေအောင်/People’s Spring
မကွေးတိုင်း၊ စလင်းမြို့နယ်အတွင်းက ကျေးရွာ ၄ ရွာမှာ စစ်ဘေးရှောင်ပြည်သူ ၁၀၀ ကျော်ဟာ အရေပြားရောဂါများ ဖြစ်ပွားနေတာကြောင့် ဆေးကုသမှုတွေ ဆောင်ရွက်ပေးနေရပြီး ဆေးဝါးနဲ့ တကိုယ်ရေသန့်ရှင်းရေး အသုံးအဆောင်များ အရေးပေါ်လိုအပ်နေကြောင်း မြို့နယ်ပြည်သူ့အုပ်ချုပ်ရေးအဖွဲ့ (ပအဖ)က ပြောပါတယ်။
စလင်းမြို့နယ်အတွင်းက စစ်ရှောင်ပြည်သူတွေဟာ အရေပြားရောဂါတွေ ဖြစ်ပွားနေလို့ လိုက်လံဆေးကုသမှုပေးနေပြီး ယခုရက်ပိုင်းအတွင်း ကျေးရွာ ၄ရွာမှ ပြည်သူ ၁၀၀ကျော်ကို ဆေးကုသမှုပေးခဲ့ကြောင်း စလင်းမြို့နယ်ပြည်သူ့အုပ်ချုပ်ရေးအဖွဲ့က ပြောပါတယ်။
“ရေရှားတယ်။ တကိုယ်ရေ သန့်ရှင်းမှုအားနည်းတယ်။ သံကောင်တွေ ရှိနေကြတယ်။လိမ်းဆေး ကတယောက်တစ်ဘူး မပေးနိုင်ဘူးပေါ့။ ဒေသပေါက်စျေးအရ ကျပ်၄၅၀၀ ကနေ ကျပ် ၇၀၀၀အထိ အစားစားရှိပါတယ်”လို့ စလင်းပအဖအဖွဲ့တာဝန်ရှိသူက ပြောပါတယ်။
Public Service Announcement
အရေပြားရောဂါ ဆက်လက်ကုပေးရဦးမှာဖြစ်လို့ သံချဆေး၊ လိမ်းဆေး၊ ကာဘော်လစ်ဆပ်ပြာ၊အဝတ်လျှော်ဆပ်ပြာနဲ့ အရေပြားရောဂါကုသဆေးဝါးတွေလည်း လိုအပ်နေတယ်လို့ ၎င်းတာဝန်ရှိသူက ပြောပါတယ်။
စစ်ရှောင်တွေဟာ ရေကောင်းရေသန့်မရတာ၊ ဆပ်ပြာအပါအဝင် တကိုယ်ရေသန့်ရှင်းရေးအသုံးအဆောင်တွေ မလုံလောက်တာတွေကြောင့် ဖြစ်ပွားနေကြတာဖြစ်ကြောင်း ဒေသခံတွေဆီက သိရပါတယ်။
အလားတူ မကွေးတိုင်း၊ ပေါက်မြို့နယ်မှာလည်း ကာလရှည် နေရပ်စွန့်ခွာနေရတဲ့ စစ်ဘေးရှောင်တွေထဲက လူကြီးနဲ့ကလေး လူဦးရေ ၁၀၀၀ ခန့်ဟာ အရေပြားရောဂါဝေဒနာများ ခံစားနေရပြီး ဆေးဝါးအကူအညီတွေ လိုအပ်နေကြောင်း ပေါက်မြို့နယ် လူသားစာနာဌာနတာဝန်ရှိသူက ပြောပါတယ်။
