ဖေဖော်ဝါရီ ၁၈၊၂၀၂၆။ ထားမြတ်/People’s Spring
ကော်သူးလေတည်ဆောက်ရေးဆိုင်ရာ ကရင်အမျိုးသားနှီးနှောဖလှယ်ပွဲကို ကရင်အမျိုးသားအစည်းအရုံး(KNU) နယ်မြေမှာ ၄ရက်ကြာကျင်းပခဲ့ပြီး ကရင်အမျိုးသားတော်လှန်ရေး ရည်မှန်းချက်တွေ လျင်မြန်စွာပြည့်မှီရေးအတွက် အမျိုးသားရေးတာဝန်အဖြစ် ကျရာတာဝန်တွေကို တတ်ကျွမ်းနားလည်တဲ့ဖက်မှ တာဝန်ယူ ပူးပေါင်းပါဝင်လုပ်ဆောင်သွားဖို့ သဘောထားဆုံးဖြတ်ချက်တွေ ချမှတ်ခဲ့ကြောင်း ကရင်အမျိုးသားနှီးနှောဖလှယ်ပွဲက ကြေညာချက်ထုတ်ပြန်ပါတယ်။
အဲဒီကြေညာချက်ကို KNU ဗဟိုက ဖေဖော်ဝါရီ ၁၇ရက်ကထုတ်ပြန်ခဲ့တာဖြစ်ပြီး နှီးနှောဖလှယ်ပွဲကိုဖေဖော်ဝါရီ ၉ရက်ကနေ ၁၂ရက်အထိကျင်းပကာ နိုင်ငံတကာရောက် ကရင်အဖွဲ့အစည်းကိုယ်စားလှယ်များ၊ ကရင်လူမှုအဖွဲ့အစည်းများ၊ ကေအဲန်ယူ-ကရင် အမျိုးသားအစည်းအရုံးဗဟို၊ ခရိုင် ခေါင်းဆောင်များ၊ KNLA ကရင်အမျိုးသားလွတ်မြောက်ရေး တပ်မတော်၊ KNDO ကရင် အမျိုးသား ကာကွယ်ရေးတပ်ဖွဲ့ မှ တပ်ဗိုလ်တပ်မှူးများနဲ့ အထူးဖိတ်ကြားထားသော ခေါင်းဆောင်ကိုယ်စားလှယ်များ စုစုပေါင်း (၁၃၀)ဦး တက်ရောက်ခဲ့တယ်လို့ အသိပေးပါတယ်။
ကရင်အမျိုးသားနှီးနှောဖလှယ်ပွဲမှာာလက်ရှိနိုင်ငံရေးအခြေအနေသုံးသပ်တင်ပြတာနဲ့ ကော်သူးလေ တည်ဆောက်ခြင်းဆိုင်ရာ ကိစ္စရပ်တွေ၊ အုပ်ချုပ်ရေးဆိုင်ရာတည်ဆောက်မှုတွေနဲ့ ပြည်သူ့ရေးရာဝန်ဆောင်မှုတွေ၊စစ်ရေးဆိုင်ရာ ကိစ္စရပ်တွေအပြင် နိုင်ငံတကာ မှာKNUကိုယ်စားလှယ်တွေခန့်အပ်ထားဖို့ကိစ္စတွေလည်းဆွေးနွေးခဲ့တယ်လို့ အသိပေးပါတယ်။
Public Service Announcement
ပြည်တွင်း နေရပ်စွန့်ခွာလှည့်လည်ပုန်းအောင်းထွက်ပြေးတိမ်းရှောင် နေကြရသော(IDPs)တွေနဲ့ လူမှုရေးဆိုင်ရာ ကိစ္စရပ်တွေ၊ဒေသ တွင်း ပေါ်ပေါက်လာနေသော ကျားဖြန့်အွန်လိုင်းငွေလိမ်လုပ်ငန်းတွေနဲ့ နိုင်ငံဖြတ်ကျော်ရာဇဝတ်မှုတွေ ကိစ္စတွေကိုလည်းဆန်းစစ်သုံးသပ်ခဲ့ကြကြောင်းထုတ်ပြန်ပါတယ်။
စစ်ရေးဆိုင်ရာ လိုအပ်ချက်တွေကိုတက်နိုင်တဲ့ဘက်ကကူညီပံ့ပိုးဖို့နဲ့မူးယစ်ဆေးဝါး၊ နိုင်ငံဖြတ်ကျော်ရာဇဝတ်မှုများ၊ ကျားဖြန့် အွန်လိုင်းငွေလိမ်လုပ်ငန်းတိုက်ဖျက်ရေး တို့ကို နိုင်ငံတကာအဖွဲ့အစည်းတွေနဲ့ပူးပေါင်းဆောင်ရွက်မယ်လို့ထုတ်ပြန်ပါတယ်။
ဒါ့အပြင် နိုင်ငံတကာ ကရင်အဖွဲ့အစည်းကိုယ်စားလှယ်တွေက သက်ဆိုင်ရာနိုင်ငံအလိုက် ကရင် အမျိုးသားများအခြေအနေနဲ့ လှုပ်ရှားဆောင်ရွက်မှုများ၊အာဏာသိမ်းစစ်တပ်မှ လေကြာင်းအသုံးပြုပြီး ပြည်သူတွေအပေါ်နိုင်ငံ အနှံ့ ဗုံးကြဲတိုက်ခိုက်မှုတွေနဲ့ပတ်သက်ပြီး နိုင်ငံတကာမှ ဖိအားပေးမှုများ ပြုလုပ်ဖို့အတွက် သက်ဆိုင်ရာနိုင်ငံအစိုးရ လွတ်တော် ပါလီမန် ကိုယ်စားလှယ်တွေနဲ့တွေ့ဆုံတင်ပြပြောဆိုမှုများရှိခဲ့ကြောင်းဆွေးနွေး ဖလှယ်ခဲ့တယ်လို့ဆိုပါတယ်။
လူထုအခြေပြုကရင်လူမှုအဖွဲ့အစည်းတွေကလည်း ၂၀၂၁စစ်တပ် အာဏာသိမ်းမှုအလွန် ဖြစ်ပေါ်လာသော နိုင်ငံရေး အခင်းအကျင်းနဲ့မြေပြင်တိုက်ပွဲအခြေအနေတွေကြောင့် စစ်ဘေးစစ်ဒဏ်အောက်မှာ အတိဒုက္ခရောက်နေတဲ့ပြည်သူလူထုတို့ အတွက် လိုအပ်နေတဲ့ လူမှုရေးအကူအညီတွေကို လူထုထံသို့တိုက်ရိုက်ကူညီပေးတဲ့နည်းလမ်းတွေနဲ့ သက်ဆိုင်ရာ လူမှုရေးဆိုင်ရာအကူအညီပေးပံ့ပိုးကူညီတဲ့ နိုင်ငံတကာအဖွဲ့အစည်းတွေနဲ့သော်လည်းကောင်း၊ ဒေသတွင်းအဖွဲ့အစည်းတွေနဲ့သော်လည်းကောင်း ပူးပေါင်းဆောင်ရွက်လျက် ကူညီပံ့ပိုးတဲ့လုပ်ငန်းစဉ်တွေကိုဆွေးနွေးခဲ့ကြတယ်လို့ ဆိုပါတယ်။
KNUက လက်ရှိနိုင်ငံရေးအခြေအနေနဲ့ရပ်တည်ချက်တွေ၊လုပ်ငန်းစဉ်တွေ ၊ ကော်သူးလေတည်ဆောက်ရေးအတွက် အသုံးပြုကိုင်စွဲပြဌာန်းမယ့် “ကော်သူးလေချာတာ” ကို အသိပေးရှင်းလင်းချပြတာလုပ်ဆောင်ခဲ့တယ်လို့ထုတ်ပြန်ပါတယ်။
ဒါ့အပြင် ကော်သူးလေ အတွင်းမှီတင်းနေထိုင်ကြတဲ့ အခြားလူမျိုးများကိုယ်စားပြုမှုပါဝင်တဲ့ ကော်သူးလေတည်ဆောက်ရေးတရားဝင်မှု၊ ကော်သူးလေ တည်ဆောက်မှုမှာ ကျင့်သုံးအကောင်အထည်ဖော်မယ့် ကော်သူးလေအုပ်ချုပ်ရေးစနစ် နဲ့ ပြည်သူ့ ရေးရာစီမံခန့်ခွဲမှု လုပ်ငန်းစဉ်တွေကို KNUဘက်ကဆွေးနွေးခဲ့ပါတယ်။
စစ်ရေးဆိုင်ရာလိုအပ်ချက်တွေ၊ကရင်အမျိုးသားတို့ရဲ့ဂုဏ်သိက္ခာနဲ့ လုံခြုံရေးကို ထိခိုက်လာစေမယ့် အွန်လိုင်းကျားဖြန့် ငွေလိမ်လုပ်ငန်းများအပေါ် တိုက်ဖျက်ရေးနဲ့ကိုင်တွယ်မှုတွေ ကိုလည်းအသိပေးခဲ့ကြောင်းဖော်ပြထားပါတယ်။
ကရင်လူငယ်အစည်းအရုံးကလည်း ကော်သူးလေတည်ဆောက် ရေးလုပ်ငန်းစဉ်မှာပါဝင်နေမှုတွေကိုဆွေးနွေးခဲ့တယ်လို့ဆိုပါတယ်။
ကရင်အဖွဲ့အစည်းအသီးသီးရဲ့ဆွေးနွေးမှုတွေအပေါ် အကြောင်းအရာလိုက် အုပ်စုဖွဲ့ဆွေးနွေးခဲ့တာတွေလုပ်ဆောင်ကာKNU ရဲ့ နိုင်ငံရေး ရည်မှန်းချက်ဖြစ်တဲ့ ကော်သူးလေ တည်ဆောက်ခြင်းကို လက်ခံကာ နိုင်ငံရေးအရ ကြုံတွေ့နေရတဲ့ စိန်ခေါ်ချက်နဲ့အကြံပြုချက်တွေ ပြုလုပ်ခဲ့တယ်လို့ဖော်ပြထားပါတယ်။
ကရင်အမျိုးသားနှီးနှောဖလှယ်ပွဲကျင်းပနိုင်တာဟာ ကရင်အမျိုးသားအချင်းချင်းကြား ပိုမိုသိရှိနားလည်လာနိုင်တဲ့အခွင့်အရေးတွေနဲ့ ပိုမိုအားကောင်းတဲ့ပူးပေါင်းဆောင်ရွက်မှုတွေဖြစ်ပေါ်စေလို့ လာမယ့်နှစ်တွေမှာလည်း ပုံမှန်ကျင်းပသွားဖို့သဘောထားရှိကြောင်းအသိပေးပြီး နေရာဒေသအသီးသီးရှိ ကရင်အမျိုးသားအဖွဲ့အစည်းများ ပိုမိုပါဝင်လာမှုကို လမ်းဖွင့်ထားကြောင်းအသိပေးပါတယ်။
