'/%3E%3C/svg%3E){kind=small}
မတ် ၁၃၊ ၂၀၂၆။ ထားမြတ်/People’s Spring
တနင်္သာရီတိုင်း၊ သရက်ချောင်းမြို့နယ် ဝင်း၀ စစ်ကောင်စီစခန်း သိမ်းပိုက်မှုမှာ ပါဝင်ပံ့ပိုးပေးတဲ့ မဟာမိတ်တော်လှန်ရေးအင်အားစုတွေ ကို အသိအမှတ်ပြု ကျေးဇူးတင် ဂုဏ်ပြုကြောင်း ကရင်အမျိုးသားအစည်းအရုံး(KNU) မြိတ်ထားဝယ်ခရိုင် ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄) က ထုတ်ပြန်ခဲ့ပြီး လူငယ် ရဲဘော်ရဲဘက်များရဲ့ ပေးဆပ်မှုများကိုလည်း လေးစားစွာဖြင့် မှတ်တမ်းတင်ကြောင်း ဖော်ပြပါတယ်။
မြိတ်ထားဝယ် အမှတ်(၈) ကားလမ်းမှာ တပ်စွဲထားတဲ့ ဝင်း၀ စစ်ကောင်စီ တပ်စခန်းကို KNLA ပူးပေါင်းတပ်က မတ်လ ၁၁ရက် မှာ တိုက်ခိုက်သိမ်းပိုက်ခဲ့ရာ ပါဝင်ပံ့ပိုးသူတွေကို မြိတ်ထားဝယ်ခရိုင် ဥက္ကဋ္ဌနဲ့ တပ်မဟာ(၄) တပ်မဟာမှူးတို့က ဒီကနေ့ မတ်လ ၁၃ရက်မှာ ဂုဏ်ပြု မှတ်တမ်းလွှာ ဖော်ပြ အသိအမှတ်ပြုခဲ့တာပါ။
“စစ်အာဏာရှင်စနစ် အပါအဝင် အာဏာရှင်စနစ် ချုပ်ငြိမ်းရေး နှင့် ဖယ်ဒရယ်ပြည်ထောင်စု တည်ထောင် ၍ ငြိမ်းချမ်းသော လူ့အဖွဲ့အစည်းကို ပြန်လည်တည်ဆောက်လိုသည့် လူငယ် ရဲဘော်ရဲဘက်များ၏ ပေး ဆပ်မှုများကိုလည်း လေးစားစွာဖြင့် မှတ်တမ်းတင်အပ်ပါသည်။ မိမိတို့၏ စုပေါင်းညီညွတ်သောအင်အားဖြင့် အခုကဲ့သို့ အောင်ပွဲရရှိစေရန် နည်းပညာအားဖြင့်ဖြစ်စေ၊ ဘဏ္ဍာငွေအားဖြင့်ဖြစ်စေ အဘက်ဘက်မှ ကူညီပံ့ပိုးသူများ ၊ မိမိတို့ တိုက်ပွဲဝင် ရဲဘော်များ ဘေးရန်ကင်း ဝေးစေရန်အတွက် ဝိုင်းဝန်း ဆုတောင်းမေတ္တာပို့သ၍ စိတ်ဓါတ်ခွန်အား ပံ့ပိုးပေးကြ သည့် ပြည် သူများ အား ကျေးဇူးတင်ရှိပါကြောင်း ဂုဏ်ပြုအပ်ပါသည်” လို့ ဖော်ပြထားပါတယ်။
Public Service Announcement
ဝင်းဝတပ်စခန်းသိမ်းတိုက်ပွဲမှာ ပါဝင်ခဲ့တဲ့ အဖွဲ့တွေရဲ့ အမည်တွေကိုလည်း အသိပေးထားရာ KNLA တပ်မဟာ ၄ တပ်ရင်း (၁၂), (၁၀) ၊ ကရင်အမျိုးသားလွတ်မြောက်ရေးတပ်မတော် – KNLA တပ်မဟာ ၄ အထူးကွန်မန်ဒိုတပ်ဖွဲ့ ၊ ကရင်အမျိုးသားလွတ်မြောက်ရေးတပ်မတော် – KNLA တပ်မဟာ ၆ တပ်ရင်း (၂၇) ၊ ဒေါင်းညီနောင်စစ်ကြောင်း၊ T5၊ T1၊ သရက်ချောင်း ပကဖ နဲ့ လောင်းလုံး ပကဖ တို့ ဖြစ်တယ်လို့ ဖော်ပြထားပါတယ်။
ဝင်း၀ တပ်စခန်းဟာ အင်အား ၁၀၀ ကျော် တပ်စွဲထားတဲ့ စခန်းဖြစ်ပြီး စခန်းသိမ်းတိုက်ပွဲဟာလည်း တလကျော်ကြာမြင့်ခဲ့ပါတယ်။
တိုက်ပွဲအတွင်း စစ်ကောင်စီဘက်က ၅၀ ဦးကျော်သေဆုံးကာ လက်နက် အလက် ၄၀ ကျော်သိမ်းရခဲ့ပါတယ်။ စစ်ကောင်စီတပ်ဖွဲ့ဝင် ၆၀ ကျော် ထွက်ပြေးသွားလို့ လိုက်လံရှင်းလင်းမှုတွေ ပြုလုပ်နေကြောင်း KNLA တပ်မဟာ(၄) သတင်းရင်းမြစ်က ပြောပါတယ်။
