မြောက်ဦးနဲ့ပုဏ္ဏားကျွန်းကို စစ်တပ်ဗုံးကြဲ

ဧပြီ-၁၉၊၂၀၂၆။ဇော်ရမ်း/People’s Spring

မြောက်ဦးမြို့နယ် နဲ့ ပုဏ္ဏားကျွန်းမြို့နယ်ကို ဒီနေ့ နေ့လယ်ပိုင်းမှာ စစ်တပ်ကလေကြောင်းကနေဗုံးကြဲလို့ နေအိမ်တွေမီးလောင်နေပြီး အရပ်သားထိခိုက်သေဆုံးမှုတွေ ရှိနေတယ်လို့သတင်းရရှိပါတယ်။

မြောက်ဦးမြို့နယ်၊ ​ကျောက်ဆည်ပြင်ရွာ ဘုန်းကြီး​ကျောင်းကို ဧပြီလ ၁၉ရက်နေ့လယ် ၁၂နာရီ ၃၀ မိနစ်ခန့်မှာ ဗုံးကြဲတာဖြစ်ပြီး ပုဏ္ဏားကျွန်းမြို့နယ်ထဲက ဓာတ်အားခွဲရုံ၊နတလကျောင်းအနီးကို မနက်ဆယ်နာရီခန့်မှာ ဗုံးကြဲသွားတာလို့သိရပါတယ်။

“ဂျက်ဖိုက်တာတွေနဲ့လာကြဲခဲ့တာပါ။ စစ်ရှောင်တွေရှိရာကိုကြဲတာ။ထိခိုက်မှုတွေရှိထားတယ်။တတ်နိုင်သမျှဘေးကင်းရာကိုပို့နေကြတယ်”လို့ မြောက်ဦးမြို့ခံတဦးကပြောပါတယ်။

Public Service Announcement

ပုဏ္ဏားကျွန်းမြို့နယ်ကို ဂျက်ဖိုက်တာ သုံးစီးနဲ့ ဗုံး၁၁လုံးကြဲသွားပြီးနေအိမ်အချို့မီးလောင်ပျက်စီးနေတယ်လို့ ပုဏ္ဏားကျွန်းလူငယ်များအစည်းအရုံသတင်းနှင့်ပြန်ကြားရေးကော်မတီက သတင်းထုတ်ပြန်ထားပါတယ်။ တိုက်ပွဲတွေကြောင့်စစ်ရှောင်နေကြရတဲ့ပြည်သူတွေကို အကူအညီပေးဖို့လည်း တောင်းဆိုထားပါတယ်။

မြောက်ဦးနဲ့ ပုဏ္ဏားကျွန်းမြို့နယ်ဟာ ၁၀၂၇ စစ်ဆင်ရေးနဲ့အတူ AAသိမ်းပိုက်ထိန်းချုပ်ထားတာပါ။ဒီနေ့လေကြောင်းဗုံးကြဲမှုကြောင့်ထိခိုက်မှုတွေကိုအသေးစိတ်မသိရသေးပါဘူး။

ရခိုင်ပြည်နယ်မှာသိမ်းပိုက်ဖို့ကျန်ရှိနေသေးတဲ့မြို့နယ်တွေကို စစ်ရေးရည်မှန်းချက်ပြည့်ဝတဲ့အထိ တိုက်ခိုက်သွားမယ်လို့ အာရက္ခတပ်တော်(AA) စစ်ဦးစီးချုပ်ဗိုလ်ချုပ်ထွန်းမြတ်နိုင်က ထုတ်ဖော်ပြောကြားထားပါတယ်။စစ်ကောင်စီကအရပ်သားပြည်သူတွေကိုဦးတည်ပြီးတော့ပစ်ခတ်နိုင်လို့ စစ်ရေးနဲ့လုံခြုံရေးအန္တရာယ်သတိပြုကြဖို့ AAက ထုတ်ပြန်ထားပါတယ်။

(ဧပြီ ၁၉ ရက်မှာ စစ်တပ်က ပုဏ္ဏားကျွန်းမြို့ကို ဗုံးကြဲပြီး​နောက် အပျက်အစီး​တွေကို​တွေ့ရစဥ်။ဓါတ်ပုံ။ Wai Hun Aung ၊PYA-Ponnagyun Youth Assocation)