မိုးကုတ်ပကဖ ရဲမေဟောင်း စစ်တပ်နဲ့ ပူးပေါင်းပြီး တော်လှန်ရေးရဲဘော်တွေ လာပူးပေါင်းဖို့ ခြိမ်းခြောက်စည်း​ရုံးနေ

ဧပြီ-၁၉၊ ၂၀၂၆။ဟာနာဆန်/People’s Spring

​မန္တလေးတိုင်း၊ မိုးကုတ်မြို့နယ်ပြည်သူ့ကာကွယ်ရေးအဖွဲ့ (ပကဖ) ရဲမေဟောင်းတစ်ဦး စစ်တပ်နဲ့ ပူးပေါင်းသွားပြီး တော်လှန်ရေးရဲဘော်တွေကို လာပူးပေါင်းဖို့ ခြိမ်းခြောက် စည်းရုံးနေကြောင်း မိုးကုတ်ပကဖ ထုတ်ပြန်ပါတယ်။

မိုးကုတ်မြို့နယ် ပကဖ ရဲမေဟောင်း (တပ်ပြေး) မနှင်းနှင်းဦး (ခ)ရိုးမဟာ စစ်တပ်ထံ လက်နက်ချ အညံ့ခံခဲ့ပြီးနောက် တော်လှန်ရေးရဲဘော်တွေကို လိုက်လံစည်းရုံးခြင်း၊ မိသားစုတွေကို အကြပ်ကိုင်ခြိမ်းခြောက်ခြင်းနဲ့ သတင်းပေးဒလန်အဖြစ် လုပ်ဆောင်ခြင်းတွေကို တော်လှန်ရေးကို အဟန့်အတားဖြစ်စေဖို့ စစ်တပ်နဲ့ ပူးပေါင်းပြုလုပ်နေကြောင်း မိုးကုတ်မြို့နယ် ပြည်သူ့ကာကွယ်ရေးအဖွဲ့ (ပကဖ)က ဧပြီ ၁၈ ရက်က ထုတ်ပြန် အသိပေးပါတယ်။

၎င်းဟာ မိုးကုတ်ပကဖက ရဲဘော် ၃ဦးနဲ့ ရှမ်းပြည်နယ်မြောက်ပိုင်းမဟာမိတ်တပ်တော် (N.S.S.A.A)က ရဲဘော် ၃ ဦးကို စည်းရုံးခေါ်ဆောင်သွားကြောင်း မိုးကုတ်ပကဖရဲ့တာဝန်ရှိသူတစ်ဦးက လူထုနွေဦးကို ပြောပါတယ်။

Public Service Announcement

“သူကနေမှတဆင့် တပ်ကနေ ရဲဘော်ရဲမေတွေကို စစ်ကောင်စီထံမှာ အညံ့ခံဖို့ မြှူဆွယ်စည်းရုံ‌းတာတွေ၊ လက်နက်ပါရင် ဆုကြေးငွေ သိန်းကိုဆယ်ပိုင်းအထိချီးမြှင့်မယ် လက်နက်အလက်ရေများရင် များသလို ဆုကြေးပိုပေးမယ်ဆိုတာတွေနဲ့ စည်းရုံးတာတွေ ရှိသလို မန္တလေးနန်းတွင်းလပခမှာ အညံ့ခံသူတွေကို တွေ့ဆုံပွဲလုပ်ပေးပြီးတော့ မိုးကုတ် ‌ကျောက်ဆောင်ရွာထိပ်က ရတနာရှင်လုပ်ကွက်မှာ ‌အောင်ပွဲ လုပ်ပေးမယ်ဆိုပြီး စည်းရုံးတာတွေလည်း ရှိပါတယ်။”လို့ မိုးကုတ်ပကဖ တာဝန်ရှိသူက ရှင်းပြပါတယ်။

၎င်းနဲ့ ပူးပေါင်းပြီး စစ်တပ်ကို ကူညီနေသူတွေကိုလည်း ဆက်လက်စိစစ်နေပြီး ပြင်းထန်စွာ အရေးယူ ဆောင်ရွက်သွားမယ်လို့ မိုးကုတ်ပကဖက ထပ်မံအသိပေးပါတယ်။