မေ-၂၈၊၂၀၂၆။ဒီဒီး/People’s Spring
ရှေးဟောင်းယဉ်ကျေးမှုမြို့တော်ပုဂံ၊ညောင်ဦးမြို့နယ်က ငါ့သရောက်နယ်မြေမှာ စစ်ကြောင်းထိုးနေတဲ့ စစ်တပ်က တပ်သား ၁ဦးကို အရှင်ဖမ်းမိတယ်လို့ Earthquake People’s Defence Force က ထုတ်ပြန်ပါတယ်။
ငါ့သရောက်နယ်မြေမှာ စစ်ကြောင်းထိုးနေတဲ့ စစ်တပ်က တပ်သား မျိုးထက်ဇော်ကို မေလ ၂၆ရက်မှာ ဖမ်းမိခဲ့တာဖြစ်ပြီး MA -1 သေနတ် ၁လတ်နဲ့ ကျည် ၁၀၀တွေ သိမ်းဆည်းရရှိခဲ့တယ်လို့ အသိပေးပါတယ်။
ငါ့သရောက်နယ်မြေမှာ စစ်ကြောင်းထိုးနေတဲ့ စစ်တပ်က တိုက်ခိုက်ခံရပြီးနောက် စစ်သား ၂၀ လောက်ဟာ လက်နက်တွေယူပြီးထွက်ပြေးနေတယ်လို့ ပုဂံဘီလူးတပ်လို့ခေါ်တဲ့ ညောင်ဦးမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက လူထုနွေဦးကို ပြောပါတယ်။
Public Service Announcement
ပြီးခဲ့တဲ့ မေလ ၂၄ရက်က ငါ့သရောက်နယ်မြေမှာ အင်အား ၃၀၀ လောက်နဲ့ စစ်ကြောင်းထိုးနေတဲ့ စစ်တပ်ကို ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)၊ Popa Production and Guerrila Force (PPGF)၊ညောင်ဦးခရိုင်တပ်ရင်း ၁၊ ညောင်ဦးခရိုင် တပ်ရင်း ၅၊ ညောင်ဦးခရိုင်အထူးတိုက်ခိုက်ရေး၊ People Democratic Army(PDA) ၊ငါ့သရောက်တိုက်နယ်ပြည်သူ့ကာကွယ်ရေးအဖွဲ့(ပုဂံကြီးအဖွဲ့) နဲ့ ညောင်ဦးခရိုင်ပြည်သူ့ကာကွယ်ရေးအဖွဲ့ (မိုးမခ ပြောက်ကျားတပ်)တို့က ပူးပေါင်းတိုက်ခိုက်ခဲ့ကြပါတယ်။
အဲဒီတိုက်ပွဲအတွင်းမှာ စစ်တပ်ကစစ်သား ၇ဦးဟာ လက်နက်တွေယူပြီးထွက်ပြေးသွားကြတာလို့ ညောင်ဦးပကဖကပြောပါတယ်။အဲဒီနောက် စစ်တပ်က နောက်ပြန်ဆုတ်ပြီး ကျေးရွာတွေအတွင်း နားနေချိန် စစ်သား ၁၀ ဦးကျော်လောက်ဟာ ထပ်မံထွက်ပြေးသွားကြတာလို့ ညောင်ဦး ပကဖက ပြောပါတယ်။
“ဖမ်းမိတာက တခြားအဖွဲ့တွေကလည်း ဖမ်းမိထားတာ ရှိတယ်။ သတင်းမထုတ်သေးလို့သာ။ တိုက်ပွဲဖြစ်တော့ သူတို့က နောက်ပြန်ပတ်ဆုတ်ပြေးကြတော့ အဲဒီမှာ တခြားတပ်ဖွဲ့တွေက ဖမ်းမိထားတာတွေရှိတယ်”လို့ညောင်ဦးပကဖတာဝန်ရှိသူကပြောပါတယ်။
ထွက်ပြေးကြတဲ့ စစ်သားတွေဟာ စစ်မှုထမ်းတပ်သားသစ်တွေ အများစုဖြစ်တယ်လို့ စုံစမ်းသ်ိရပြီး ၅ ဦးလောက်လို့ မဟာမိတ်တပ်တွေက လက်နက်တွေနဲ့အတူ ဖမ်းမိထားတယ်လို့လည်း ဆက်ပြောပါတယ်။
မေလ ၂၄ရက်က ငါ့သရောက်နယ်မြေ ဖလန်ကန်ကျေးရွာနားမှာ ဖြစ်ပွားခဲ့တဲ့ တိုက်ပွဲမှာလည်း စစ်တပ်က ထိခိုက်သေဆုံးမှုရှိခဲ့တယ်လို့ ၎င်းက ဆက်ပြောပါတယ်။
ဒါ့အပြင် ပုပ္ပါးဒေသဘက်က စစ်တပ်ကလည်း စစ်ရေးလှုပ်ရှားမှု လုပ်နေတယ်လို့ ၎င်းကဆက်ပြောပါတယ်။
ဒါ့အပြင် စစ်တပ်က ညောင်ဦးမြို့နယ်ကို ထပ်မံစစ်ကြောင်းထိုးဖို့ ဒီကနေ့ မေလ ၂၈ရက်မှာ အင်အားဖြည့်တင်းလာတယ်လို့ ညောင်ဦး ပကဖ တာဝန်ရှိသူက ပြောပါတယ်။
” စစ်တပ်က စစ်ကြောင်းဆက်ထိုးဖို့ ပြင်နေတာ ရှိတယ်။ ဒီနေ့ပဲ ညောင်ဦးမြို့ကို စစ်ကား ၂၁စီးဝင်လာတာ ရှိတယ်။ သူတို့ အင်အားတိုးပြီး ထိုးမယ်ထင်တယ်”လို့ ညောင်ဦး ပကဖ တာဝန်ရှိသူက ပြောပါတယ်။
ပုဂံ၊ညောင်ဦးမြို့နယ်က ငါ့သရောက်နယ်မြေမှာ စစ်တပ်က မကြာခဏစစ်ကြောင်းထိုးနေပြီး ကျေးရွာတွေ မီးရှို့ဖျက်ဆီးနေပါတယ်။
