ဇွန် ၈၊ ၂၀၂၆။ ထားမြတ်/People’s Spring
မြစ်ဆုံရေကာတာ စီမံကိန်းကို လုံး၀ဖျက်သိမ်းရေး ကချင်လွတ်လပ်ရေးအဖွဲ့(KIO)ရဲ့ သဘောထားကို ထုတ်ပြန်ပေးဖို့ တင်ပြလိုကြောင်း ကချင်လူ့အခွင့်အရေးစောင့်ကြည့်အဖွဲ့(KHRW)ဒါရိုက်တာ မဆိုင်းမိုင်က ပြောကြားပါတယ်။
မြစ်ဆုံရေကာတာစီမံကိန်းကန့်ကွက်တဲ့ ပြည်သူတွေကို အားပေးကြောင်း ကချင်လွတ်လပ်ရေးအဖွဲ့(KIO/KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြီးခဲ့တဲ့ ရက်ပိုင်းမှာ ပြောကြားခဲ့တာနဲ့ ပတ်သက်ပြီး မြစ်ဆုံစီမံကိန်း ကန့်ကွက်တဲ့ လှုပ်ရှားမှု၊ ထုတ်ပြန်ပြောဆိုမှုတွေ စဉ်ဆက်မပြတ်လုပ်ဆောင်နေတဲ့ KHRW တာဝန်ရှိသူထံ သဘောထားမှတ်ချက် မေးမြန်းရာ အခုလို ပြောကြားလိုက်တာပါ။
“မြစ်ဆုံစီမံကိန်းနဲ့ ပတ်သက်လို့ကတော့ အခုလောလောဆယ်ကတော့ သိပ်ပြီးမှ အကောင်အထည်ဖော်လှုပ်ရှားတာတော့ မတွေ့ရဘူး။ ပြည်သူလူထုတွေ ကန့်ကွက်တာကတော့ ကျနော့်အနေနဲ့တော့ အားပေးပါတယ်” လို့ ဗိုလ်မှူးကြီးနော်ဘူက ဇွန်လပထမပတ်မှာ People’s Spring ရဲ့ မေးမြန်းချက်အပေါ် ဖြေကြားခဲ့ပါတယ်။
Public Service Announcement
စီမံကိန်းကန့်ကွက်တဲ့ ပြည်သူတွေကို အားပေးကြောင်း ဗိုလ်မှူးကြီးနော်ဘူရဲ့ ပြောကြားမှုဟာ ပြည်သူတွေအတွက် ခွန်အားတခုဖြစ်စေတယ်လို့ မဆိုင်းမိုင်က ပြောပါတယ်။
” ဆက်လက်ပြီး ကေအိုင်အိုအဖွဲ့ကနေပြီး မြစ်ဆုံးကိစ္စကို လုံးဝဖျက်သိမ်းဖို့ ထုတ်ပြန်ချက်ထုတ်ပြန်တာတို့၊ ပြည်သူတွေကို ခြိမ်းခြာက်နေတဲ့လုပ်ရပ်တွေ၊ ခေါင်းစဉ်အမျိုးမျိုးတပ်ပြီး (အလွှဲသုံးစား)လူထုတွေ့ဆုံပြီး လူထုဆန္ဒခံယူသလိုလို လုပ်နေတဲ့ လုပ်ရပ်တွေ ရပ်တန့်ဖို့ ထုတ်ပြန်ပေးစေချင်တယ်။ မတရားဖမ်းဆီးခံရမှု၊ ခြိမ်းခြောက်ခံရမှု၊ စောင့်ကြည့်ခံရနေတဲ့ ကချင်ပြည်နယ်ဒေသခံတွေကို ကာကွယ်ပေးမှုများလုပ်ပေးဖို့ တင်ပြပြောကြားချင်ပါတယ်” လို့ KHRW ဒါရိုက်တာ မဆိုင်းမိုင်က ပြောပါတယ်။
စစ်တပ်ဟာ ၂၀၂၅ ဒီဇင်ဘာကစပြီး စီမံကိန်း ပြန်စဖို့ လိုအပ်ကြောင်း ပြောကြားကာ ကချင်ဒေသမှာ လူထုတွေ့ဆုံပွဲတွေကို ပုံစံမျိုးစုံနဲ့ ပြုလုပ်လျက်ရှိသလို စီမံကိန်းကို ကန့်ကွက်ရင် အရေးယူမယ်ဆိုပြီး ခြိမ်းခြောက်ထားပါတယ်။ မြစ်ဆုံ စီမံကိန်း ပြန်စဖို့ ကြိုးပမ်းရာမှာ ကချင်လူမျိုးအချို့ကို စစ်ကောင်စီက အသုံးချပြီး လူထုတွေ့ဆုံမှုတွေ၊ စီမံကိန်း ပြန်စနိုင်ရေး ဒေသခံတွေကို မက်လုံးပေး ပြောကြားတာတွေ လုပ်ဆောင်နေတယ်လို့ ဆိုပါတယ်။
တဖက်မှာလည်း စစ်တပ်က တရုတ်အစိုးရ အလိုရှိတဲ့ မြစ်ဆုံစီမံကိန်း ပြန်စဖို့ ကြိုးပမ်းနေတာကို မြစ်ကြီးနား၊ ၀ိုင်းမော် ဒေသခံတွေက ဆန်ကျင်ကန့်ကွက်ကြောင်း ဆန္ဒထုတ်ဖော်တာ၊ ကချင်ပြည်နယ်ဒေသခံတွေနဲ့ အရပ်ဘက်အဖွဲ့တွေ ပူးပေါင်းပြီး စီမံကိန်း အပြီးဖျက်သိမ်းဖို့ တောင်းဆိုတာ စတဲ့ ကြေညာချက်ထုတ်ပြန်မှုတွေ လုပ်ဆောင်လျက်ရှိပါတယ်။
ကချင်လူ့အခွင့်အရေးစောင့်ကြည့်အဖွဲ့(KHRW) အပါအဝင် အဖွဲ့ ၆ဖွဲ့နဲ့ စုဖွဲ့ထားတဲ့ လူ့အခွင့်အရေး ကာကွယ်စောင့်ရှောက်သူများကွန်ရက်ရဲ့ ဧပြီ၁ရက် ကြေညာချက်မှာတော့ ပြည်သူလူထုရဲ့ သဘောထားဆန္ဒများကို အပြည့်အဝ လေးစားလိုက်နာဖို့၊ စီမံကိန်းကို ကန့်ကွက်တဲ့ ပြည်သူများအပေါ် အရေးယူမယ်လို့ ခြိမ်းခြောက်နေမှုတွေကို ချက်ချင်း ရပ်တန့်ဖို့၊ ဒေသခံပြည်သူများနဲ့ မြန်မာတစ်နိုင်ငံလုံးရဲ့ အကျိုးစီးပွားကို ထိခိုက်စေမယ့် မြစ်ဆုံရေကာတာ စီမံကိန်း အပြီးတိုင် ဖျက်သိမ်းဖို့ တောင်းဆိုထားပါတယ်။
မြစ်ဆုံရေကာတာစီမံကိန်း ကန့်ကွက်တဲ့ ဆန္ဒထုတ်ဖော်မှုတွေမှာ လူထုတွေ ပါဝင်မှုများစွာ အရေးကြီးတယ်လို့လည်း KHRWဒါရိုက်တာ မဆိုင်းမိုင်က ပြောပါတယ်။
“ကျမတို့ မကြိုက်တာကို မကြိုက်ဘူးဆိုတဲ့ဟာကို ပွင့်ပွင့်လင်းလင်း ဆက်ပြီးတော့ ဖော်ထုတ်သွားဖို့ လိုအပ်ပါတယ်။ ကျမတို့ကို ကူညီမယ့်သူတွေ ရှိရင်တောင်မှ ကျမတို့ မပြောဘူး မထုတ်ဖော်ဘူးဆိုရင် ကျမတို့က ဒါကို လက်ခံနေပါလားဆိုတဲ့ အမြင်တွေ တလွဲယူသွားနိုင်ပါတယ်။ အဲဒါကြောင့် မြန်မာပြည်သူ ပြည်သားတွေ ဧရာ၀တီမြစ်ကြောင်းတလျှောက်က ပြည်သူတွေကိုလည်း ဖိတ်ခေါ်ချင်ပါတယ်။ ဒီလို မြစ်ဆုံရေကာတာ စီမံကိန်း အလိုမရှိကြောင်း လုပ်ငန်းတွေ ထုတ်ဖော်ပြောဆိုမှုတွေကို ရဲရဲဝံ့ဝံ့ ဆက်ပြီးတော့ ဖော်ပြရအောင်” လို့ မဆိုင်းမိုင်က စီမံကိန်း ဖျက်သိမ်းရေးလှုပ်ရှားမှုတွေမှာ ပြည်သူတွေ ပါဝင်ကြဖို့ ဖိတ်ခေါ်ထားပါတယ်။
