ဇူလိုင်-၂၊၂၀၂၆။ဒလပန်း/People’s Spring
ပဲခူးတိုင်း ၊ သာယာဝတီခရိုင်၊ မင်းလှမြို့နယ်အတွင်းက စစ်တပ်စစ်ဆေးရေးဂိတ်စခန်းကို တော်လှန်ရေးပူးပေါင်းတပ်တွေက ဝင်ရောက်တိုက်ခိုက်ခဲ့ရာ စစ်တပ်တပ်ဖွဲ့ဝင် ၁၀ ဦးထက်မနည်းသေဆုံးခဲ့တယ်လို့ သာယာဝတီခရိုင်ပြည်သူ့ကာကွယ်ရေးအဖွဲ့က ဒီနေ့မှာ ထုတ်ပြန်ပါတယ်။
ဇူလိုင် ၁ ရက် မနက် ၃ နာရီခွဲအချိန်မှာ အင်အား ၃၀ ဝန်းကျင်ရှိတဲ့ မင်းလှမြို့နယ်အတွင်းက ကိုင်းပြင်ကြီးရွာ အညာတန်းက စစ်တပ် စစ်ဆေးရေးဂိတ်စခန်းကိုဒေသ အခြေစိုက်တော်လှန်ရေးတပ်ဖွဲ့တွေကသွားရောက်တိုက်ခိုက်ခဲ့တာလည်းဖြစ်ပါတယ်။
“ ကိုင်းပြင်ကြီးကနေ ဝင်လာတဲ့ ရွာဂိတ်စခန်းပါ။တော်လှန်ရေးတပ်ဖွဲ့တွေ ပြည်လမ်းပေါ် မတက်နိုင်အောင် ကာထားသလို အနီးအနားရွာတွေကို ပေါ်တာဆွဲဖို့အတွက် စခန်းခိုင်ထားတာပါ “လို့သာယာဝတီခရိုင် တပ်ရင်း(၃၈၀၂)က ရဲဘော်တစ်ဦးက ပြောပါတယ်။
Public Service Announcement
တိုက်ပွဲကြာချိန် (၁) နာရီခွဲနီးပါးအပြန်အလှန်ပစ်ခတ်မှု ဖြစ်ပွားခဲ့ပြီး စစ်တပ်က ထိခိုက်သေဆုံးမှု ၁၀ ဦးထက်မနည်းရှိကာ စစ်ကူအင်အား ၈၀ ထက်မနည်းရောက်ရှိလာတာကြောင့် တော်လှန်ရေးတပ်ဖွဲ့တွေ ပြန်လည် ဆုတ်ခွါခဲ့ရတယ်လို့ တော်လှန်ရေးတပ်ဖွဲ့ဝင်တွေဆီကသိရပါတယ်။
ဒါအပြင် စစ်တပ်တပ်ဖွဲ့ဝင် ၈ ယောက်ထိခိုက်ဒဏ်ရာရရှိခဲ့ပြီး တော်လှန်ရေးပူးပေါင်းတပ်တွေဘက်က ထိခိုက်မှုမရှိခဲ့ဘူးလို့သိရပါတယ်။
အဲ့ဒီတိုက်ခိုက်မှုကို သာယာဝတီခရိုင် ပကဖ အမှတ်(၁) တိုက်ခိုက်ရေးတပ်ဖွဲ့ (ရွှေတန်းမြေ)၊ လက်ပံတန်းမြို့နယ် ပကဖ အထူးတိုက်ခိုက်ရေးတပ်ဖွဲ့နဲ့ သာယာဝတီခရိုင် အမှတ်(၂) တပ်ရင်း၊ တပ်ခွဲ(၂) တို့ ပူးပေါင်းလုပ်ဆောင်ခဲ့ကြတာလည်းဖြစ်ပါတယ်။
