မန္တလေးမှာ အောင်ဇမ္ဗူဇာတ်ပွဲ ညအိပ်လက်မှတ်တန်းစီသူတွေ မိုးမိပြီး ဒုက္ခရောက်

ဇူလိုင် ၃၀၊ ၂၀၂၆၊ မေရီ/People’s Spring

မန္ဆလေးမြို့မှာ အာဏာသိမ်းစစ်တပ်ရဲ့ ဝါဒဖြန့်ဇာတ်မင်းသား အောင်ဇမ္ဗူရဲ့ ဖျော်ဖြေပွဲကို ၃ ရက်ကြိုတင်ကာ ညအိပ်စောင့်ပြီး လက်မှတ်လာတန်းကြတဲ့ ပရိသတ်တွေ မိုးမိပြီး ဒုက္ခရောက်ခဲ့ကြပါတယ်။

လာမယ့် သြဂုတ် ၄ ရက်ကနေ ၇ ရက်အထိ မန္တလေးမြို့၊ ချမ်း​မြသာစည်မြို့နယ်၊ အောင်ပင်လယ်ဘောလုံးကွင်းမှာပြုလုပ်မယ့် စစ်တပ်ရဲ့ ဝါဒဖြန့် ဇာတ်မင်းသား အောင်ဇမ္ဗူရဲ့ ဖျော်ဖြေပွဲကို သြဂုတ် ၁ ရက်မှ လက်မှတ်ရောင်းချပေးမှာဖြစ်ပေမဲ့ ​မနေ့က ဇူလိုင် ၃၀ ရက် ညကတည်းက ပွဲခင်းမှာ ညအိပ်ကာ လက်မှတ်တန်းစီသူတွေ ရောက်ရှိလာကြောင်း ရပ်ကွက်ခံတွေက ပြောပါတယ်။

တိုက်ဆိုင်စွာပဲ ရက်​ပေါင်းများစွာ မိုးရွာသွန်းခြင်းမရှိခဲ့တဲ့ မိုးဟာ မနေ့ညက တစ်ညလုံးနီးပါး ရွာခဲ့ပြီး ဇာတ်ပွဲကြည့်ဖို့ ညအိပ်တန်းစီစောင့်သူတွေ ဒုက္ခရောက်ခဲ့ကြတယ်လို့ ဒေသခံတွေက ပြောပါတယ်။

Public Service Announcement

“မိုးက အချိန်ကောင်းမှထရွာတော့ ဘယ်ပြေးလို့ပြေးရမှန်းမသိဘူး”လို့ လက်မှတ်တန်းရင်း မိုးမိခဲ့တဲ့ အမျိုးသမီးတစ်ဦးက လူမှုကွန်ရက်မှာ ရေးသားထားပါတယ်။

မိုးက ပိုသည်းလာတာကြောင့် ဆောက်လက်စဇာတ်စင်မှာ ယာယီအမိုးထဲ ဝင်ခိုခဲ့ကြရပြီး တစ်ညလုံး မအိပ်ခဲ့ရဘူးလို့ သိရပါတယ်။

ဇာတ်မင်းသား အောင်ဇမ္ဗူဟာ ပြီးခဲ့တဲ့ သီတင်းကျွတ်ကာလကစလို့ အာဏာသိမ်းစစ်တပ်ရဲ့အလိုကျ တိုင်းပြည်အေးချမ်းနေသယောင် ဝါဒဖြန့်ဖို့အတွက် စစ်တပ်ထိန်းချုပ်​ရာ မြို့ကြီးတချို့မှာ ကပြဖျော်ဖြေနေတာဖြစ်ပါတယ်။ ပြီးခဲ့တဲ့လကပဲ စစ်တပ်ရဲ့ ဟန်ပြလွှတ်တော်မှာ သွားရောက်ဖျော်ဖြေခဲ့ပါသေးတယ်။ ဒါ့အပြင် စစ်ခေါင်းဆောင်သမီး ခင်သီရိသက်မွန်ရဲ့ ရုပ်ရှင်ထုတ်လုပ်ရေးလုုပ်ငန်းမှာလည်း ခေါင်း​ဆောင်မင်းသားအဖြစ် ရုပ်ရှင်ရိုက်ကူးမှုတွေ ပြုလုပ်နေပါတယ်။