ဇူလိုင် ၃၁၊ ၂၀၂၆။ ထားမြတ်/People’s Spring
အာဏာသိမ်းစစ်တပ်က စစ်မှုထမ်းတပ်သားတစ်ဦး ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ(၄) တပ်ရင်း(၂၀၃)ထံ အလင်းဝင်လာကြောင်း ကရင်အမျိုးသားအစည်းအရုံး(KNU)မြိတ်ထားဝယ်ခရိုင်က သတင်းထုတ်ပြန်ပါတယ်။
ဒီကနေ့ ဇူ လိုင်၃၁ရက် မနက်အစောမှာ မြိတ်ထားဝယ်ခရိုင်၊ လယ်ကဆောမြို့နယ်အတွင်းက စစ်သား တစ်ဦး လက်နက်ယူလာပြီးအလင်းဝင်လာတာ ဖြစ်ပါတယ်။
အလင်းဝင်လာတဲ့ တပ်သားဟာ MA-1(၁)လက်၊ ကျည်ဘောက်(၁)ခု၊ ကျည်(၂၀)တောင့်ယူလာကြောင်းဖော်ပြထားပြီး KNU ကလည်း အလင်းဝင်လာသူကို ဆုငွေပေးအပ်တာ မှတ်တမ်းဓာတ်ပုံမှာတွေ့ရပါတယ်။
Public Service Announcement
အလင်းဝင်လာတဲ့ တပ်သားဟာ အာဏာသိမ်းအကြမ်းဖက်တပ်ရဲ့ အတင်းအဓမ္မဖမ်းဆီးစုဆောင်းခံခဲ့ရသူ ဖြစ်ပြီး ပြည်သူ့စစ်မှုထမ်းသင်တန်း(၃)လ တက်ရောက် စစ်မှုထမ်းခဲ့ရသူဖြစ်တယ်လို့ ဆိုပါတယ်။
အာဏာသိမ်းစစ်တပ်ရဲ့ လက်အောက်မှာ ဆက်လက်မနေလိုတော့လို့ ထွက်ပြေးကာ ကရင်အမျိုးသားလွတ်မြောက်ရေးတပ်မတော် KNLA တပ်မဟာ(၄)ထံ အလင်းဝင်လာတာလို့ ဖော်ပြထားပါတယ်။
KNU တပ်မဟာ(၄)အပါအဝင် တပ်မဟာ အသီးသီးနယ်မြေတွေမှာ စစ်ကောင်စီတပ်သားတွေ မကြာခဏအလင်းဝင်ရောက်လေ့ရှိပြီး အများစုဟာစစ်မှုထမ်းတပ်သားသစ်တွေ ဖြစ်ပါတယ်။
KNU ကလည်း စစ်ကောင်စီတပ်ထံက ဘက်ပြောင်းလာသူတွေကိုကြိုဆိုကြောင်းဖိတ်ခေါ်ထားပြီး နီးစပ်ရာတော်လှန်ရေးတပ်တွေနဲ့ဆက်သွယ်အလင်းဝင်ကြဖို့ တိုက်တွန်းနှိုးဆော်ထားပါတယ်။
