ဖောင်းပြင်မှာ ပကဖလှုပ်ရှားတပ်ဖွဲ့ဝင်ရဲ​ဘော်က​ဒေသခံတဦးကို ရိုက်နှက်ခဲ့လို့ ခေါင်း​ဆောင်ကိုယ်တိုင်မိသားစုထံသွား​တောင်းပန်

သြဂုတ်-၄၊၂၀၂၆။ဇော်ရမ်း/People’s Spring

ဖောင်းပြင်မြို့နယ်ပြည်သူ့ကာကွယ်​ရေးအဖွဲ့(ပ.က.ဖ)လှုပ်ရှားတပ်ဖွဲ့မှ ရဲဘော်တဦးက ဒေသခံတစ်ဦးကို ကိုယ်ထိလက်ရောက် ရိုက်နှက်ခဲ့မှုအတွက်ကျူးလွန်ခံရသူ မိသားစုထံ လှုပ်ရှားတပ်ဖွဲ့ခေါင်းဆောင်ကိုယ်တိုင် အုန်းသီး၊ငှက်​ပျောပွဲနဲ့သွားရောက်တောင်းပန်ခဲ့ပါတယ်။

မော်လိုက်ခရိုင်၊ ဖောင်းပြင်မြို့နယ် ပ.က.ဖ လှုပ်ရှားတပ်ဖွဲ့မှ ရဲဘော်သိမ်းနက်ကဒေသခံပြည်သူတစ်ဦးကို ရိုက်နှက်ခဲ့တာပါ။ ပ.က.ဖ လှုပ်ရှားတပ်ဖွဲ့ဦးဆောင်သူ ဗိုလ်မောက်က ကျူးလွန်ခံရသူ မိသားစုထံ ကိုယ်တိုင်သွားရောက်တွေ့ဆုံပြီးတာဝန်သိစိတ်၊တာဝန်ခံစိတ်ဖြင့် တောင်းပန်ခဲ့တယ်လို့ ဖောင်းပြင်မြို့နယ်ပ.က.ဖ လုပ်ရှားတပ်ဖွဲ့ကဩဂုတ်လ ၄ ရက်မှာထုတ်ပြန်ပါတယ်။

ရဲဘော်တစ်ဦးရဲ့အမှားဟာအဖွဲ့အစည်းရဲ့တာဝန်ဖြစ်သည် ဟူသောခံယူချက်နဲ့ အမှားကို တာဝန်ခံပြီး ဝန်ချတောင်းပန်ခဲ့ခြင်း ဖြစ်တယ်လို့ ​ဖော်ပြထားပါတယ်။

Public Service Announcement

အခုလို တာဝန်ယူမှုရှိစွာလာရောက်တောင်းပန်ခြင်းကို လေးစားဂုဏ်ယူကြောင်းနဲ့နောင်အခါတွင်လည်း ရဲဘော်များအနေဖြင့် ပြည်သူများကို မိဘ၊ ညီအစ်ကိုမောင်နှမများကဲ့သို့ လေးစားတန်ဖိုးထား ဆက်ဆံစေလိုကြောင်း ကျူးလွန်ခံရသူ မိသားစုဘက်ကပြောတယ်လို့ ဆိုပါတယ်။

ယခုဖြစ်စဉ်အပေါ် အပြန်အလှန်နားလည်မှုနဲ့ ကြေအေးပေးခဲ့ပြီး၊ ရှေ့ဆက်၍လည်း တော်လှန်ရေးအောင်မြင်ရေးအတွက် အတူတကွ ပူးပေါင်းကာ အားသွန်ခွန်စိုက် ပါဝင်ကူညီသွားမယ်လို့ ပြောကြောင်းဖောင်းပြင်မြို့နယ်ပ.က.ဖ လုပ်ရှားတပ်ဖွဲ့က ထုတ်ပြန်ပါတယ်။

ဖြစ်စဉ်ကိုသင်ခန်းစာယူပြီးရဲဘော်တွေစည်းကမ်းလိုက်နာရေး၊ ပြည်သူ့အပေါ် လေးစားမှုနဲ့တာဝန်ယူမှုရှိတဲ့အပြုအမူတွေကိုတင်းကျပ်စွာလိုက်နာ​စေဖို့ ဆောင်ရွက်သွားမယ်လို့ ထုတ်ပြန်ထားပါတယ်။