မြန်မာလုပ်သားတွေလစာပြန်မလွှဲတာကိုစစ်အုပ်စုအလုပ်သမားဝန်ကြီးအပြစ်တင်

အောက်တိုဘာ – ၆၊၂၀၂၆ ၊နိုင်ပကောင်း/People’s Spring

အာဏာသိမ်းစစ်တပ်ရဲ့အလုပ်သမားဝန်ကြီးဖြစ်လာသူစစ်အရာရှိဟောင်း ဦးမောင်မြင့်က ပြည်ပရောက်မြန်မာလုပ်သားတွေလစာပြန်မလွှဲတာကြောင့်အလုပ်သမားစေလွှတ်ရတာနိုင်ငံအတွက်အကျိုးမရှိဘူးလို့ သူရဲ့ Tik Tok ကတဆင့် ပြောလာပါတယ်။

စစ်အုပ်စုရဲ့ ခရီးသွားဝန်ကြီးကနေအလုပ်သမားဝန်ကြီးဖြစ်လာတဲ့ကြံခိုင်ရေးပါတီဝင်ဦးမောင်မြင့်က ပြည်ပရောက်မြန်မာလုပ်သားတွေ ရဲ့လခအပေါ် အခွန်ကောက်ခံရရှိမှုနည်းပါးနေတာ ၊ လစာရဲ့ ၂၅ ရာခိုင်နှုန်းကို ပြည်တွင်းပြန်မလွှဲကြလို့ဆိုပြီး အပြစ်တင်ပြောဆိုလာတာလည်းဖြစ်ပါတယ်။

ဒါကြောင့်ပြည်ပဆီအလုပ်သွားရောက်လုပ်ကိုင်ကြဖို့ မြန်မာနိုင်ငံသားတွေကိုစေလွှတ်တာကနိုင်ငံအတွက် အကျိုးမရှိနေဘူးလို့ သူက ဆိုပါတယ်။

Public Service Announcement

ပြည်ပဆီလုပ်သားတင်ပို့တဲ့နိုင်ငံတွေထဲမှာဖိလစ်ပိုင်ပြီးရင်မြန်မာကဒုတိယအများဆုံးဖြစ်လာပြီးပြည်ပရောက်မြန်မာလုပ်သားတွေ နိုင်ငံကိုပြန်ကြည့်ဖို့လိုတယ်လို့အာဏာသိမ်းစစ်အုပ်စုရဲ့အလုပ်သမားဝန်ကြီးဖြစ်လာသူကဖိအားပေးပါတယ်။

မြန်မာလုပ်သားတွေလစဉ် လုပ်ခလစာရဲ့ ၂၅ ရာခိုင်နှုန်းကို ပြည်တွင်းရှိ မိသားစုဆီ ပြန်လွှဲရမယ်လို့ ညွှန်ကြားထားပေမယ့် မလွှဲတဲ့လုပ်သားတွေ ရှိနေတယ်လို့ သူကခြိမ်းခြောက်ပါသေးတယ်။

“လွှဲတဲ့လူကလည်းလွှဲ ၊မလွှဲတဲ့လူကလည်း မလွှဲဆိုတော့ နိုင်ငံတော်က သူတို့ကိုလွှတ်တာလွှဲတာတွေ တကယ်တမ်းအကျိုးမရှိဘူးပေါ့ ၊အကျိုးနည်းတာပေါ့နော်”လို့ အာဏာသိမ်းမှုကိုထောက်ခံအားပေးသူလည်းဖြစ်တဲ့ ဦးမောင်မြင့်က ပြောပါတယ်။

ဦးမောင်မြင့်ဟာအာဏာသိမ်းစစ်အုပ်စုရဲ့ အလုပ်သမားဝန်ကြီးအဖြစ်ပြီးခဲ့တဲ့ရက်ပိုင်း အောက်တိုဘာလ ၃ ရက်မှာ ဟိုတယ်နဲ့ ခရီးသွားဝန်ကြီးနေရာကနေ ပြောင်းရွှေ့ခန့်အပ်ခံရသူပါ။ သူဟာ ဦးသိန်းစိန်အစိုးရ လက်ထက်မှာလည်းအလုပ်သမားဝန်ကြီးဖြစ်ခဲ့ပါတယ်။

၂၀၂၁ ခုနှစ်မှာစစ်တပ်အာဏာသိမ်းပြီးနောက်ပြည်ပမှာသွားရောက်အလုပ်လုပ်ကိုင်ကြတဲ့မြန်မာနိုင်ငံသားတွေဇာတိမြေဆီအလည်အပတ်ပြန်ဖို့အခက်အခဲတွေကြုံနေရတာပါ။

ပြည်ပရောက်မြန်မာလုပ်သားတွေရဲ့ချွေးနည်းစာအပေါ် အခွန်ကောက်တာကို ၂၀၁၂ ခုနှစ်ကစတင်ပြီး အာဏာမသိမ်းခင်အချိန်ထိ ၁၀ ကျော်ကြာ ကင်းလွတ်ခွင့်ပြုထားခဲ့ပါတယ်။

အာဏာသိမ်းပြီးနောက်လူ့အခွင့်အရေးချိုးဖောက်မှုတွေကြောင့် အနောက် နိုင်ငံတွေရဲ့စီးပွားရေးပိတ်ဆို့မှုကိုကြုံလာရပြီးနိုင်ငံခြားဝင်ငွေရရှိမှု နည်း ပါးလာတဲ့အချိန်မှာအာဏာသိမ်းစစ်အုပ်စုဟာ ပြည်ပရောက်မြန်မာလုပ် သားတွေရဲ့ချွေးနည်းစာဝင်ငွေအပေါ် အခွန်စကောက်ပါတော့တယ်။

ဒါအပြင်လစဉ်လစာရဲ့ ၂၅ ရာခိုင်နှုန်းကို ပြည်တွင်းဆီ သတ်မှတ်ထားတဲ့ ဘဏ်တွေကတဆင့်ပြန်လွှဲရမယ်လို့ ဖိအားပေးထားတာပါ။

ပြည်တွင်းကိုအလည်အပတ်ဖြစ်စေ၊ ခွင့်ပြန်လိုတဲ့ မြန်မာလုပ်သားတွေ ဟာပြည်တွင်းကိုရောက်ရှိပြီးနောက်ပြန်လည်ထွက်ခွာခွင့်ရဖို့အတွက် သက်ဆိုင်ရာနိုင်ငံမှာရှိတဲ့ စစ်တပ်ထိန်းချုပ်မြန်မာသံရုံးမှာ လစာအခွန်ဆောင်ခဲ့တဲ့ပြေစာ ၊ ပြည်တွင်းကမိသားစုဆီလစာရဲ့ ၂၅ ရာခိုင်နှုန်း ကိုလွှဲပို့ထားတဲ့ အထောက်အထားတွေကို နေပြည်တော်မှာရှိတဲ့ အလုပ်သမားဝန်ကြီးဌာနဆီ တင်ပြရတာပါ။

အဲဒီအထောက်အထားတွေ မတင်ပြနိုင်ရင်တော့ ပြည်တွင်းကနေ ပြန်လည်ထွက်ခွာခွင့်မပြုတာပါ။

ခွင့်ပြန်လုပ်သားတွေရဲ့ပြည်ပထွက်ခွာခွင့်အတွက်တင်ပြတဲ့စာရွက် စာတမ်းအထောက်အထားတွေမှာအများစုဟာ လစဉ် လစာရဲ့ ၂၅ ရာခိုင်နှုန်းလွှဲထားပြီးဖြစ်တဲ့အထောက်အထားတင်ပြဖို့လိုအပ်ချက်ဖြစ်နေတယ်လို့ စစ်အုပ်စုရဲ့အလုပ်သမားဝန်ကြီးဌာနတယ်လီဂရမ်ချန်နယ်ရဲ့ဖော်ပြချက်မှာတွေ့ရပါတယ်။