အခု သီတင်းပတ် အစောပိုင်းက လူသားတွေရဲ့ အမှားကြောင့် ဆိုးရွားတဲ့ လွဲချော်မှုတစ်ခု ကြုံတွေ့ခဲ့ရကြောင်း ဖရိန်းစတက်ဒ် ဆေးရုံက ထုတ်ပြန်ပါတယ်။ အဲဒီ ဆေးရုံဟာ ချက်နဲ့ ဩစတြေးလျ နိုင်ငံ နယ်စပ်နားမှာ ဖွင့်လှစ်ထားတာပါ။
အသက် ၈၂ နှစ်အရွယ် အမျိုးသား လူနာဟာ ဘယ်ဖက် ခြေထောက်ကို ဖြတ်တောက် ကုသမှု ခံယူရမှာ ဖြစ်ပါတယ်။ ဒါပေမဲ့ ဆေးရုံ ဝန်ထမ်း တစ်ဦးက ညာဖက် ခြေထောက် ဖြတ်တောက်ရမယ်လို့ အမှတ်အသား မှားလုပ်ပေးခဲ့ပါတယ်။ ဆရာဝန်တွေကလည်း ညာဖက် ခြေထောက်ကိုပဲ ဒူးခေါင်း အထက်ကနေ ဖြတ်တောက်လိုက်ပါတယ်။ လက်လွန်သွားပြီးမှ ဒီကိစ္စ အမှားအယွင်းကို သတိပြုမိခဲ့ကြတာ ဖြစ်ပါတယ်။
ဖြတ်တောက်ထားတဲ့ ခြေထောက်ကို ပုံမှန် ပတ်တီး လဲလှယ်ပေးတဲ့နေ့ကျမှ ဒီကိစ္စ အလွဲကြီး လွဲနေမှန်း သတိထားမိသွားတာလို့ ဆေးရုံက ထုတ်ပြန်ပါတယ်။ နောက်တော့ လူနာရဲ့ ဘယ်ဖက် ခြေထောက်ကိုပါ ဖြတ်တောက်လိုက်ရပါတယ်။ လူနာဟာ ကျန်းမာရေး ပြဿနာတွေကြောင့် ခြေထောက်နှစ်ဖက်စလုံးမှာ ပြဿနာတွေ ရှိနှင့်နေတယ်လို့ ဆေးရုံ တာဝန်ရှိသူတွေက ပြောပါတယ်။
ဆေးရုံက နောက်ဆက်တွဲ ဖြစ်ရပ်တွေကို ဆက်လက် စုံစမ်းနေပြီး လူနာနဲ့ သူ့မိသားစုဆီ စိတ်ပိုင်းဆိုင်ရာ အထောက်အပံ့တွေ ပေးအပ်ဖို့ ကမ်းလှမ်းထားပါတယ်။ ဒေသခံ ရှေ့နေချုပ်ရုံးကတော့ ဒီဖြစ်စဉ်ကို အမှုဖွင့် စုံစမ်းဖို့ ကူညီသွားမှာဖြစ်ကြောင်း ပြောကြားထားပါတယ်။