အမေရိကန် သမ္မတဟောင်း ဒေါ်နယ်လ်ထရမ့် ပိုင်ဆိုင်တဲ့ ကိုယ်ပိုင် လူမှုကွန်ရက် မီဒီယာ အသစ်ဟာ စတင် လည်ပတ်တဲ့ နေ့မှာပဲ ဆိုက်ဘာ တိုက်ခိုက်မှုတွေ ခံခဲ့ရကြောင်း သိရပါတယ်။
ထရမ့်ရဲ့ အကြံပေး အရာရှိဟောင်း ဂျေဆန်မီလာ ဦးစီးနေတဲ့ Gettr ဝက်ဘ်ဆိုက်ဟာ စတင်လည်ပတ်တဲ့ နေ့မှာပဲ ဟက်ကာတွေရဲ့ ထိုးဖောက်မှုကြောင့် လုံခြုံရေး အစီအမံတွေ ပျက်စီးခဲ့တယ်လို့ Reuters သတင်းဌာနက ဖော်ပြသွားပါတယ်။
အဲဒီ ပြဿနာကို သိသိချင်းမှာပဲ ဝက်ဘ်ဆိုက်ရဲ့ အိုင်တီ ပညာရှင်တွေက ပြန်လည် ပြင်ဆင်နိုင်ခဲ့ကြောင်း၊ ဒါပေမဲ့ မိနစ်ပိုင်းလောက် အချိန်လေးမှာတင် ဟက်ကာတွေက လူမှုကွန်ရက် အသုံးပြုသူ တချို့ရဲ့ နာမည်တွေကို ပြောင်းလဲသွားခဲ့ကြောင်း မီလာက အတည်ပြုခဲ့ပါတယ်။
မီလာက ဝက်ဘ်ဆိုက် စတင်လည်ပတ်ပြီး ၂၄ နာရီအတွင်း သုံးစွဲသူ ငါးသိန်းကျော် ရှိလာကြောင်းနဲ့ အခုတော့ နည်းပညာ လုံခြုံရေး ကဏ္ဍကို ပိုမို တိုးမြှင့်ထားကြောင်း ပြောကြားသွားပါတယ်။ အဲဒီ လူမှုကွန်ရက်ဟာ ကမ္ဘာ့လူထု တစ်ရပ်လုံးအတွက် ဘက်မလိုက်ဘဲ ရပ်တည်မယ်လို့ ကြေညာထားပါတယ်။
Public Service Announcement
ထရမ့်ဟာ Twitterနဲ့ Facebookပေါ်မှာ အငြင်းပွားစရာ ရေးသား ဖော်ပြမှုတွေကြောင့် လူမှုကွန်ရက် သုံးစွဲခွင့် ပိတ်ပင်ခံခဲ့ရတာပါ။ သူ့ရဲ့ အရေးအသားတွေက ဇန်နဝါရီ ၆ ရက်၊ အမေရိကန် လွှတ်တော် စီးနင်းခံရတဲ့ ဖြစ်ရပ်မျိုးတွေဆီ ဦးတည်စေခဲ့ကြောင်း ကမ္ဘာကျော် လူမှုကွန်ရက် ကုမ္ပဏီကြီးတွေက ဝေဖန် စွပ်စွဲထားပါတယ်။
