နျူကလီးယား စစ်ပွဲကို ရှောင်လွှဲနိုင်ရေး စိတ်တူကိုယ်တူ ပူးပေါင်း ဆောင်ရွက်ကြဖို့ ကမ္ဘာ့ စစ်အင်အားကြီး ၅ နိုင်ငံက ပူးတွဲ ကြေညာချက် ထုတ်ပြန်ခဲ့ပါတယ်။
တရုတ်၊ ရုရှား၊ ဗြိတိန်၊ အမေရိကန်နဲ့ ပြင်သစ်တို့က နျူကလီးယား စစ်လက်နက်တွေ ပိုမိုပျံ့နှံ့သွားတာမျိုး မဖြစ်စေဖို့နဲ့ နျူကလီးယား စစ်ပွဲကို တားဆီးဖို့ ဘုံသဘောတူညီချက် တစ်ခုကို ကြေညာခဲ့ပါတယ်။ ၅ နိုင်ငံ စုပေါင်း ကြေညာချက်ကို ဇန်နဝါရီ ၃ ရက်မှာ ရုရှားအစိုးရ ရုံးစိုက်ရာ ကရင်မလင် နန်းတော် ထုတ်ပြန်ခဲ့တာပါ။ ကုလသမဂ္ဂ လုံခြုံရေး ကောင်စီရဲ့ အမြဲတမ်း အဖွဲ့ဝင် နိုင်ငံတွေက နျူကလီးယား လက်နက်ပိုင် နိုင်ငံကြီးတွေကြား စစ်မက် ဖြစ်ပွားနိုင်ခြေကို တားဆီးကြဖို့ အပြန်အလှန် ကတိပြုခဲ့ပါတယ်။
ကမ္ဘာပေါ်မှာ နျူကလီးယား စစ်ပွဲတွေ ပေါ်ပေါက်လာလို့ ဘယ်သူ့အတွက်မှ ကောင်းကျိုး မရှိနိုင်ဘူးလို့လည်း အင်္ဂလိပ် ဘာသာနဲ့ ထုတ်ပြန်တဲ့ အဲဒီ ကြေညာချက်မှာ ဖော်ပြ ပါရှိပါတယ်။ နျူကလီးယား လက်နက် တစ်ခုကို အသုံးပြုလိုက်ပြီ ဆိုတာနဲ့ လက်လှမ်းမမီနိုင်တော့တဲ့ အကျိုးဆက်တွေ ရှိလာနိုင်ပါတယ်။ နျူကလီးယား လက်နက်တွေကို ကာကွယ်ရေး ရည်မှန်းချက် အတွက်သာ ပိုင်ဆိုင်ထားသင့်ပြီး ရန်လိုမှုတွေ၊ စစ်ပွဲတွေကို တားဆီးဖို့ လိုအပ်ကြောင်းလည်း ပူးတွဲ ကြေညာချက်က ဆိုပါတယ်။
အမေရိကန် ပြည်ထောင်စုရဲ့ ပင်တဂွန် စစ်ဌာနချုပ်ကတော့ တရုတ်ဟာ နျူကလီးယား ထိပ်ဖူး အရေအတွက်ကို လာမယ့် နှစ်ပိုင်းတွေအတွင်း အမြောက်အမြား တိုးမြှင့် သိုလှောင်လာဖွယ် ရှိနေကြောင်း နိုဝင်ဘာလတုန်းက ခန့်မှန်းခဲ့ဖူးပါတယ်။ အမေရိကန်ရဲ့ ခန့်မှန်းချက်အရ တရုတ်စစ်တပ် အနေနဲ့ ၂၀၂၇ ခုနှစ်မှာ နျူကလီးယား ထိပ်ဖူး ၇၀၀ လောက်နဲ့ ၂၀၃၀ ပြည့်နှစ်မှာ ၁၀၀၀ လောက်ထိ ပိုင်ဆိုင်နေဖွယ် ရှိကြောင်း သိရပါတယ်။
Public Service Announcement
လတ်တလောမှာတော့ အမေရိကန် အစိုးရဟာ ရုရှားနဲ့ လက်နက် ထိန်းချုပ်ရေး သဘောတူ စာချုပ်တစ်ရပ် ချုပ်ဆိုဖို့ စီစဉ်နေပြီး တရုတ်ပါ ပါဝင် ပူးပေါင်းလာအောင် တိုက်တွန်းထားပါတယ်။ ပြီးခဲ့တဲ့ နှစ်ပိုင်းတွေအတွင်း အမေရိကန် အပါအဝင် အနောက်အုပ်စု နိုင်ငံတွေနဲ့ ရုရှားတို့ကြား ပထဝီဝင် နိုင်ငံရေး တင်းမာမှုတွေ မြင့်တက်လာသလို အမေရိကန်နဲ့ တရုတ် ဆက်ဆံရေးကလည်း ဆိုးသထက် ဆိုးလာခဲ့ပါတယ်။
ရုရှားဟာ အိမ်နီးချင်း ယူကရိန်း နိုင်ငံကို ကျူးကျော် စစ်ပြုလာနိုင်တယ်ဆိုတဲ့ စိုးရိမ်မှုတွေလည်း ရှိနေပြီး ဒီပြဿနာနဲ့ စပ်လျဉ်းလို့ အမေရိကန်နဲ့ ရုရှား ကိုယ်စားလှယ်တွေဟာ ဇန်နဝါရီ ၁၀ ရက်မှာ နှစ်ဖက်တွေ့ဆုံ ဆွေးနွေးဖို့ စီစဉ်ထားကြပါတယ်။
