လက်ရှိ အခြေအနေအရ ယူကရိန်းနိုင်ငံ ပတ်ပတ်လည်ကို ရုရှားတပ်တွေ ဝန်းရံထားပြီး အချိန်မရွေး ကျူးကျော်စစ် စတင်လာနိုင်တဲ့ အနေအထားမျိုး ဖြစ်နေပါတယ်။ အမေရိကန် အစိုးရကလည်း အခု သီတင်းပတ်ထဲမှာတင် ရုရှားဟာ ယူကရိန်းကို စတင် တိုက်ခိုက်လာနိုင်ကြောင်း ခန့်မှန်းထားပါတယ်။ တစ်ဖက်မှာလည်း ပြဿနာတွေကို သံတမန်ရေး နည်းလမ်းနဲ့ ဖြေရှင်းနိုင်ဖို့ မျှော်လင့်ထားဆဲဖြစ်ကြောင်း ဗြိတိန်နဲ့ အမေရိကန်တို့က ပြောပါတယ်။
ဖေဖော်ဝါရီ ၁၄ ရက်မှာတော့ ဂူတာရက်စ်က အခုချက်ချင်း တင်းမာမှုတွေကို လျှော့ချပြီး မြေပြင်ပေါ်က စစ်ရေး လှုပ်ရှားမှုတွေ အရှိန်ပြန်ကျသွားဖို့ လိုနေပြီလို့ ပြောကြားခဲ့ပါတယ်။ သူဟာ ရုရှားနဲ့ ယူကရိန်း နိုင်ငံခြားရေး ဝန်ကြီးတွေဆီ ဆက်သွယ်ပြီး ကုသလမဂ္ဂက လက်ရှိ အနေအထားကို အလွန်အမင်း စိုးရိမ်နေကြောင်း အသိပေးခဲ့ပါသေးတယ်။
ယူကရိန်းနဲ့ ရုရှားသာ စစ်ဖြစ်ကြမယ်ဆိုရင် ဥရောပ တစ်တိုက်လုံးနဲ့ သက်ဆိုင်တဲ့ စစ်မက်ရေးရာ အရှုပ်အထွေးမျိုး ဖြစ်သွားမယ်လို့ ဂူတာရက်ဇ်က ပြောပါတယ်။ နှစ်ဖက် သဘောထား ကွဲလွဲမှုတွေကို သံတမန်ရေးရာ နည်းလမ်းအပြင် တခြား ရွေးချယ်စရာ တစ်ခုခုနဲ့ ဖြေရှင်းတာမျိုး ရှိကို မရှိနိုင်ကြောင်း သူက သတိပေးခဲ့ပါတယ်။ နောက်ဆက်တွဲ ဖြစ်ပေါ်လာမယ့် ဆိုးကျိုးတွေကို မျက်နှာလွှဲလို့ မရကြောင်း၊ သံတမန်ရေး နည်းလမ်းကို စွန့်ခွာလိုက်တာဟာ ကမ်းပါးစွန်း ရောက်နေချိန် ရှေ့တစ်လှမ်း ထပ်တိုးလိုက်တာနဲ့ ဘာမှ မခြားကြောင်း ဂူတာရက်စ်က ဆိုပါတယ်။
လောလောဆယ် ယူကရိန်း နိုင်ငံနဲ့ နယ်စပ်တွေနားမှာ ရုရှားစစ်သည် ၁ သိန်း ၃ သောင်းလောက်ထိ စုဝေးနေကြောင်း သိရပါတယ်။ ယူကရိန်းမှာ ကုသလမဂ္ဂ ဝန်ထမ်း ၁၆၆၀ လောက် ရှိနေပြီး ယူကရိန်း နိုင်ငံသား ၁၄၄၀ နဲ့ နိုင်ငံခြားသား ၂၂၀ ရှိတယ်လို့ စာရင်းမှတ်တမ်းတွေမှာ ဖော်ပြထားပါတယ်။
Public Service Announcement
