ဖိလစ်ပိုင် နိုင်ငံမှာ ကူးတို့ အမြန်ရေယာဉ်တစ်စီး မီးလောင်မှုကြောင့် လူ ၇ ဦး သေဆုံးခဲ့ကြောင်း သိရပါတယ်။
အဲဒီ ရေယာဉ်ဟာ ကျူဇုန် ဒေသက ဆိပ်ကမ်း တစ်ခုမှာ ကမ်းကပ်ပြီး မကြာခင်မှာပဲ ရုတ်တရက် မီးထလောင်ခဲ့တာလို့ ကမ်းခြေစောင့် တပ်ဖွဲ့က ထုတ်ပြန်ပါတယ်။ မေ ၂၃ ရက် မနက်ပိုင်းက ဖြစ်စဉ်မှာ ရေယာဉ်ပေါ်က အမျိုးသမီး ၅ ဦးနဲ့ အမျိုးသား ၂ ဦးရဲ့ အလောင်းတွေကို ရှာတွေ့ခဲ့ပါတယ်။
အခင်းဖြစ်ချိန်က ရေယာဉ်ပေါ်မှာ စုစုပေါင်း လူ ၁၃၄ ဦး စီးနင်း လိုက်ပါလာတယ်လို့ သိရပါတယ်။ ကျန်တဲ့ ခရီးသည်တွေကို ဘေးလွတ်ရာ ကယ်ဆယ် ရွှေ့ပြောင်းပေးနိုင်ခဲ့ပြီး ဒဏ်ရာရသူ ၂၃ ဦး ရှိခဲ့တယ်လို့ ဆိပ်ကမ်း အာဏာပိုင်တွေက ထုတ်ပြန်ပါတယ်။
နှစ်ထပ် ကူးတို့ယာဉ်ပေါ်မှာ လောင်ကျွမ်းတဲ့ မီးက အတော်လေး အားကောင်းခဲ့ပြီး မည်းနက်တဲ့ မီးခိုးလုံးတွေ အူထွက်နေတာ တွေ့ရတယ်လို့ မျက်မြင်တွေက ပြောပါတယ်။ ကမ်းခြေစောင့် တပ်ဖွဲ့ဝင်တွေဟာ ရေယာဉ် အနီးတဝိုက်မှာ အသက်ကယ် အင်္ကျီတွေ ဝတ်ပြီး ခုန်ချသွားတဲ့ ခရီးသည်တွေကိုလည်း လိုက်လံ ကယ်ဆယ်ခဲ့ရပါတယ်။
Public Service Announcement
ရေယာဉ်ပေါ်မှာ မီးစတင် လောင်ကျွမ်းရတဲ့ အကြောင်းရင်းကိုတော့ ရှင်းရှင်းလင်းလင်း မသိရသေးပါဘူး။ ဖိလစ်ပိုင်ဟာ ကျွန်းပေါင်း ၇၆၀၀ ကျော်နဲ့ စုဖွဲ့ထားတဲ့ ကျွန်းစုနိုင်ငံ တစ်ခုဖြစ်ပြီး ပို့ဆောင် ဆက်သွယ်ရေး ကဏ္ဍမှာ ရေလမ်းခရီးကို အထူးတလည် အားပြုထားရပါတယ်။ ဖိလစ်ပိုင်က ကူးတို့ ရေယာဉ်တွေဟာ သက်တမ်း အိုဟောင်းတာ၊ မတန်တဆ လူပိုတွေ တင်တာ၊ ပြုပြင်ထိန်းသိမ်းမှု အားနည်းတာတွေကြောင့် လုံခြုံရေး စံနှုန်းအရ အတော်လေး နာမည်ပျက်နေပါတယ်။
၁၉၈၇ ခုနှစ်က ဖိလစ်ပိုင်မှာ လူနဲ့ ကုန်စည်တွေ မတန်တဆ တင်ဆောင်ထားတဲ့ ကူးတို့ရေယာဉ် ဒိုနာပက်ဇ်နဲ့ ရေနံတင်သင်္ဘော မင်ဒိုရိုတို့ဟာ မနီလာမြို့တော် တောင်ပိုင်း ကမ်းလွန်ရေပြင်မှာ တိုက်မိခဲ့ပြီး လူပေါင်း ၄၄၀၀ နီးပါး သေဆုံးခဲ့ပါတယ်။ ဒီမတော်တဆမှုဟာ စစ်ပွဲတွေကြောင့် မဟုတ်ဘဲ ငြိမ်းချမ်းနေတဲ့ ကာလအတွင်း အဆိုးရွားဆုံး ရေလမ်းခရီး သွားလာမှုဆိုင်ရာ ကပ်ဘေးကြီးအဖြစ် သတ်မှတ် ခံခဲ့ရပါတယ်။
