နိုင်ငံတကာ ဝေဖန်ရှုတ်ချမှုတွေ ရှိနေပေမယ့်လည်း အီရန်အစိုးရဟာ အစိုးရ ဆန့်ကျင်ရေး ဆန္ဒပြသူတွေကို ဆက်ပြီး ကွပ်မျက်နေဆဲ ဖြစ်ပါတယ်။
ဇန်နဝါရီ ၇ ရက်မှာ နောက်ထပ် ဆန္ဒပြသူ လူငယ်နှစ်ဦးကို အီရန်က သေဒဏ်စီရင် ကွပ်မျက်လိုက်ကြောင်း သိရပါတယ်။ အီရန်မှာ ဘာသာရေးရဲတွေရဲ့ အကြမ်းဖက် ဖမ်းဆီး ချုပ်နှောင်မှုကြောင့် အသက် ၂၂ နှစ်အရွယ် မိန်းကလေးတစ်ဦး သေဆုံးခဲ့တဲ့ ဖြစ်စဉ်ကြောင့် ပြီးခဲ့တဲ့ စက်တင်ဘာလကစပြီး အစိုးရ ဆန့်ကျင်ရေး ဆန္ဒပြပွဲတွေ ပေါ်ပေါက်နေခဲ့တာ ဖြစ်ပါတယ်။
အခုဆိုရင် အီရန်မှာ ဆန္ဒပြသူတွေကို အစိုးရက ကွပ်မျက်နေတာ ၄ ဦးထိ ရှိလာပြီ ဖြစ်ပါတယ်။ မိုဟာမက် မာဟ်ဒီ ကာရာမီနဲ့ ဆေယက်ဒ် မိုဟာမက် ဟိုစိန်နီတို့ နှစ်ဦးဟာ အီရန် အစိုးရ ဘက်တော်သား လုံခြုံရေး အရန်တပ်ဖွဲ့ဝင်တွေကို သတ်ဖြတ်တယ်လို့ စွပ်စွဲခံရပြီး လူသတ်မှုနဲ့ တရားစွဲ ခံခဲ့ရပါတယ်။ သူတို့နှစ်ဦးဟာ ကရာတေး နည်းပြ တစ်ဦးနဲ့ ကလေးတွေကို စေတနာ့အလျောက် ကူညီနေတဲ့ စေတနာ့ဝန်ထမ်း အားကစား နည်းပြတစ်ဦးတို့ ဖြစ်ကြပါတယ်။
Public Service Announcement
သူတို့ဟာ နိုဝင်ဘာ ၃ ရက်က အစိုးရ အလိုတော်ရိ ဘာဆက်ဂျ် အရန်တပ်ဖွဲ့ဝင် တစ်ဦးကို သတ်ဖြတ်ခဲ့ကြောင်း တရားရုံးက စွပ်စွဲပါတယ်။ ဘာဆက်ဂျ်တွေဟာ အစိုးရ ဆန့်ကျင်ရေး ဆန္ဒပြသူတွေကို ဖြိုခွင်းရာမှာ အာဏာပိုင်တွေကို မျက်နှာလိုအားရ ကူညီနေတဲ့ အဖွဲ့တွေပါ။
ကာရာမီရဲ့ ရှေ့နေတစ်ဦးကတော့ သူ့အမှုသည်ဟာ ကွပ်မျက် မခံရခင်မှာ မိသားစုနဲ့တောင် တွေ့ခွင့် မရခဲ့ဘူးလို့ Twitterမှာ ရေးသားခဲ့ပါတယ်။ နောက်ပြီး သူ့အတွက် ကြိုးစားပေးနေတဲ့ ဥပဒေ အကျိုးဆောင်တွေရဲ့ ကိုယ်စားပြုခွင့်ကို ပိတ်ပင်ခဲ့တာကြောင့် ကာရာမီဟာ အစာခြောက်တွေသာ စားပြီး ဆန္ဒပြခဲ့သေးတယ်လို့ သိရပါတယ်။
လူငယ်နှစ်ဦးကို ကွပ်မျက်လိုက်တဲ့ ဖြစ်စဉ်အပြီး အီရန် အစိုးရ အနေနဲ့ အခုလိုမျိုး ဆန္ဒပြသူတွေကို သေဒဏ်စီရင် ကွပ်မျက်နေတာတွေ ရပ်တန်းကရပ်ဖို့ ကုလသမဂ္ဂနဲ့ ဥရောပ သမဂ္ဂတို့က ပိုမို ဖိအားပေး တောင်းဆိုလာကြပါတယ်။ အီရန်ဟာ ပွင့်လင်းမြင်သာမှု မရှိတဲ့ ခုံရုံးတွေ ဖွဲ့စည်းပြီး ဆန္ဒပြသူတွေအပေါ် မတရားပြစ်ဒဏ်တွေ စီရင် ချမှတ်နေတာ ဖြစ်ပါတယ်။ လက်ရှိ အချိန်ထိ အီရန်မှာ သေဒဏ် အမိန့်ချ ခံထားရတဲ့ နောက်ထပ် ဆန္ဒပြပြည်သူ ၄၁ ဦး ရှိနေသေးကြောင်း လူ့အခွင့်အရေး အဖွဲ့အစည်းတွေက ပြောကြားထားပါတယ်။
