ဆီးရီးယားမှာရှိတဲ့ ဓာတုလက်နက်နဲ့ ဒုံးကျည်သိုလှောင်ရုံလို့ ယူဆရတဲ့ နေရာတွေကို အစ္စရေး ဗုံးကြဲပြီး ဖျက်ဆီး

ဓာတုလက်နက်တွေနဲ့ ဒုံးကျည်တွေ သိုမှီးထားတယ်လို့ ယုံကြည်ရတဲ့ ဆီးရီးယား စစ်ရေးပစ်မှတ် နေရာတွေကို လေကြောင်းကနေ တိုက်ခိုက် ဖျက်ဆီးခဲ့တယ်လို့ အစ္စရေးစစ်တပ် (IDF)က အတည်ပြုခဲ့ပါတယ်။

တော်လှန်ရေးတပ်တွေက မြို့တော် ဒမတ်စကက်ထိ ချီတက်ခဲ့တဲ့နောက် ဒီဇင်ဘာ ၈ ရက်နေ့မှာ သမ္မတ ဘာရှာ အယ်လ်အာဆတ်က ရုရှားနိုင်ငံဆီ ထွက်ပြေးသွားခြင်းနဲ့အတူ ဆီးရီးယား အစိုးရ ပြိုကျသွားခဲ့ပြီ ဖြစ်ပါတယ်။ အဲဒီနောက် ဆီးရီးယားမှာ ကြွင်းကျန်နေတဲ့ ဖျက်အားပြင်း စစ်လက်နက်တွေဟာ အမျိုးမျိုးသော လက်နက်ကိုင် အဖွဲ့အစည်းတွေ လက်ထဲ ရောက်ရှိသွားမှာကို စိုးရိမ်တဲ့အတွက် IDFက လက်ဦးမှုယူ တိုက်ခိုက် ဖျက်ဆီးခဲ့တာလို့ ဆိုပါတယ်။

အစ္စရေး နိုင်ငံခြားရေးဝန်ကြီး ဂီဒီယွန်ဆားက အန္တရာယ် ကြီးမားလှတဲ့ စစ်လက်နက်တွေကို အစွန်းရောက်ဝါဒီတွေ လက်ထဲ ရောက်သွားတာမျိုး ခွင့်မပြုနိုင်ကြောင်း မှတ်ချက်ပေးခဲ့ပါတယ်။

ဒီဇင်ဘာ ၈ ရက်နဲ့ ၉ ရက်နေ့တွေအတွင်း ဆီးရီးယား နိုင်ငံအနှံ့က စစ်ရေးပစ်မှတ်တွေကို အစ္စရေးက လေကြောင်းတိုက်ခိုက်မှုတွေ လုပ်ဆောင်ခဲ့တယ်ဆိုတဲ့ သတင်းတွေနဲ့ ပတ်သက်ပြီး ဆားက အခုလို အတည်ပြုပေးခဲ့တာလည်း ဖြစ်ပါတယ်။ အဲဒီ တိုက်ခိုက်မှုတွေထဲမှာ ဒမတ်စကက် မြို့တော်နားက အီရန် ပညာရှင်တွေ အခြေစိုက်ပြီး ဒုံးကျည် နည်းပညာတွေ အဆင့်မြှင့် သုတေသနပြုနေတဲ့ အဆောက်အအုံ တစ်ခုလည်း ပါဝင်ခဲ့ပါတယ်။

Public Service Announcement

ဆီးရီးယား လူ့အခွင့်အရေး စောင့်ကြည့်အဖွဲ့ (SOHR)ကလည်း အစ္စရေးဟာ ဆီးရီးယားရဲ့ ကမ်းရိုးတန်း ဧရိယာတွေနဲ့ နိုင်ငံတောင်ပိုင်း နယ်မြေတချို့မှာ လေကြောင်းတိုက်ခိုက်မှုတွေ ပြင်းပြင်းထန်ထန် လုပ်ဆောင်ခဲ့ကြောင်း ဖော်ပြခဲ့ပါတယ်။

အစ္စရေးသာ မကဘဲ အမေရိကန်ဟာလည်း ဆီးရီးယား အစိုးရ ပြိုကျချိန်မှာ အိုင်အက်စ် အကြမ်းဖက်အဖွဲ့က အခွင့်ကောင်းယူပြီး အင်အားစုရုံး ခေါင်းထောင်လာမှာကို စိုးရိမ်တဲ့အတွက် ဒီဇင်ဘာ ၈ ရက် တစ်နေ့တည်းမှာတင် ဆီးရီးယား နိုင်ငံအနှံ့က အိုင်အက်စ် စစ်ရေးပစ်မှတ်ပေါင်း ၇၅ ခုထက်မနည်းကို ဗုံးကြဲခဲ့ကြောင်း သိရှိရပါတယ်။

ကိုးကား BBC