ရုရှားဆီက ဓာတ်ငွေ့ ဝယ်ယူမှုကို သုညမှတ်ထိ လျှော့ချဖို့ EU နိုင်ငံတွေ သဘောတူ

ရုရှားဆီက ဓာတ်ငွေ့ တင်သွင်း ဝယ်ယူမှုတွေကို အပြီးတိုင် ရပ်စဲတဲ့အထိ တစ်ဆင့်ချင်းစီ လျှော့ချဖို့ ဥရောပ သမဂ္ဂ (EU) အဖွဲ့ဝင် နိုင်ငံတွေရဲ့ စွမ်းအင် ဝန်ကြီးတွေ ညှိနှိုင်း သဘောတူခဲ့ပါတယ်။

အောက်တိုဘာ ၂၀ ရက်နေ့က လူဇင်ဘာ့ဂ် နိုင်ငံမှာ ကျင်းပတဲ့ အစည်းအဝေး အပြီးမှာတော့ ရုရှားဆီကနေ EU နိုင်ငံတွေဆီ ပိုက်လိုင်းတွေနဲ့ တင်ပို့နေတဲ့ ဓာတ်ငွေ့တွေကိုရော၊ သဘာဝဓာတ်ငွေ့ အရည် (LNG)ကိုပါ ဆက်တိုက် လျှော့ချသွားဖို့ ဆုံးဖြတ်ခဲ့ကြပါတယ်။

LNG တင်သွင်းမှုကိုလည်း မူလ လျာထားတာထက် တစ်နှစ်စောပြီး ၂၀၂၇ ခုနှစ်၊ ဇန်နဝါရီလမှာ အပြီးတိုင် ရပ်စဲဖို့ထိ EU နိုင်ငံတွေက သဘောတူ လက်ခံခဲ့ပါတယ်။ ရုရှားဆီက စွမ်းအင်ရင်းမြစ်တွေကို မှီခိုစရာ မလိုဘဲ EU အနေနဲ့ ပိုပြီး လွတ်လွတ်လပ်လပ် ရပ်တည်နိုင်ရေးအတွက် ဒီဆုံးဖြတ်ချက်ဟာ အရေးပါတဲ့ ခြေလှမ်းတစ်ခု ဖြစ်လာတယ်လို့ EUရဲ့ အလှည့်ကျ ဥက္ကဋ္ဌ တာဝန်ယူထားတဲ့ ဒိန်းမတ် အစိုးရရဲ့ နိုင်ငံခြားရေး ဝန်ကြီး လားစ်အားဂတ်က ပြောပါတယ်။

EUဟာ ရုရှားဆီက စွမ်းအင်ရင်းမြစ်တွေ တင်သွင်းမှု မှန်သမျှကို အဆုံးသတ်ဖို့အထိ ပိုမိုကျယ်ပြန့်တဲ့ မဟာဗျူဟာ စီမံကိန်း တစ်ရပ်ကိုလည်း အကောင်အထည် ဖော်ဖို့ ကြိုးစားနေပါတယ်။

Public Service Announcement

ဥရောပဖက်ကို ရုရှားရဲ့ ရေနံနဲ့ ဓာတ်ငွေ့တွေ လုံးဝ ဝင်ရောက်လာစရာ မလိုတော့တဲ့ အဆင့်ထိ ရောက်နိုင်အောင် အားထုတ် ကြိုးစားနေပေမယ့် အဲဒီ ရည်မှန်းချက် အထမြောက်တဲ့ အထိတော့ မအောင်မြင်သေးကြောင်း အားဂတ်က ဆိုပါတယ်။

EUက တင်သွင်းတဲ့ သဘာဝ ဓာတ်ငွေ့တွေရဲ့ ၁၂ ရာခိုင်နှုန်းဟာ ရုရှားဆီက ဝယ်ယူနေတာပါ။ ၂၀၂၂ ခုနှစ်မှာ ရုရှားက ယူကရိန်းကို ကျူးကျော်စစ် မဆင်နွှဲခင် EUရဲ့ ရုရှားဓာတ်ငွေ့ ဝယ်ယူမှုဟာ စုစုပေါင်း တင်သွင်းမှုရဲ့ ၄၅ ရာခိုင်နှုန်းထိ များပြားခဲ့ပါတယ်။ ဟန်ဂေရီ၊ ပြင်သစ်နဲ့ ဘယ်လ်ဂျီယမ်တို့ဟာ လက်ရှိ အချိန်ထိ ရုရှားဆီက ဝယ်ယူတင်သွင်းတဲ့ ဓာတ်ငွေ့ကို မှီခိုနေရဆဲ နိုင်ငံတွေ ဖြစ်နေပါတယ်။

ရုရှားဆီက ရေနံ ဝယ်ယူနေဆဲ EU နှစ်နိုင်ငံဖြစ်တဲ့ ဟန်ဂေရီနဲ့ ဆလိုဗက်ကီးယားတို့ဟာ ရုရှား စွမ်းအင် ရင်းမြစ်တွေ ဝယ်ယူမှုကို အပြီးတိုင် ဖြတ်တောက်မယ့် အစီအစဉ်ကို အရင်က ကန့်ကွက်ခဲ့ဖူးပေမယ့် ရုရှားရဲ့ ဓာတ်ငွေ့တွေ တင်သွင်းမှု လျှော့ချမယ့် အဆိုကိုတော့ EUက လူဇင်ဘာ့ဂ် ဆွေးနွေးပွဲမှာ တင်သွင်းခဲ့တာ ဖြစ်ပါတယ်။

EUရဲ့ စည်းမျဉ်းတွေအရ နိုင်ငံတစ်ခုခုအပေါ် အရေးယူ ပိတ်ဆို့မှုတွေ သတ်မှတ်မယ်ဆိုရင် အဖွဲ့ဝင် ၂၇ နိုင်ငံလုံးရဲ့ သဘောတူ ထောက်ခံမှုကို လိုအပ်ပေမယ့် ကုန်သွယ်ရေး ကန့်သတ်မှုတွေ ကျင့်သုံးဖို့ ဆိုရင်တော့ ၁၅ နိုင်ငံဆီက ထောက်ခံချက် ရရှိရင် လုံလောက်ပါတယ်။

ဟန်ဂေရီ နိုင်ငံခြားရေးဝန်ကြီး ပီတာ ဆီဂျာတိုကတော့ ရုရှားဆီက စွမ်းအင် ထောက်ပံ့မှုကို အလုံးစုံ ဖြတ်တောက်တာဟာ သူ့နိုင်ငံရဲ့ စွမ်းအင် ဖူလုံမှုကို ကြီးကြီးမားမား ခြိမ်းခြောက်လာနိုင်ကြောင်း ဝေဖန်ခဲ့ပါတယ်။ ကုန်းပိတ်နိုင်ငံ တစ်ခုဖြစ်တဲ့ ဟန်ဂေရီဟာ ပထဝီဝင် အခြေအနေတွေအရ ရုရှားဆီက တင်ပို့တဲ့ ဓာတ်ငွေ့တွေကို ဆက်လိုအပ်နေဦးမယ်လို့ သူက ပြောပါတယ်။

EU နိုင်ငံတွေက လက်ခံ အတည်ပြုခဲ့တဲ့ အဆိုပြုချက်ကို ဥရောပ လွှတ်တော်မှာလည်း မဲခွဲ အောင်မြင်လိမ့်မယ်လို့ ယုံကြည်ရပါတယ်။ အဲဒီ အဆိုပြုချက်ရဲ့ အဓိက ရည်ရွယ်ချက်ကတော့ ရုရှားဆီက ပိုက်လိုင်းတွေနဲ့ တင်သွင်းနေတဲ့ ဓာတ်ငွေ့တွေအပြင် LNGတွေကိုပါ ၂၀၂၆ ခုနှစ်၊ ဇန်နဝါရီ ၁ ရက်နေ့ နောက်ပိုင်းကျရင် မဝယ်ယူတော့ဖို့ ဖြစ်တယ်လို့လည်း သိရပါတယ်။

ကိုးကား: France 24