အမေရိကန်ရဲ့ အကူအညီတောင်းမှုကို ငြင်းဆိုတာဟာ NATOရဲ့ ရူးမိုက်လွန်းတဲ့ အမှားလို့ ထရမ့်ဝေဖန်

အီရန်စစ်ပွဲမှာ ပါဝင်ကူညီ တိုက်ခိုက်ဖို့ NATO စစ်မဟာမိတ် နိုင်ငံတွေရဲ့ ငြင်းဆိုမှုဟာ အင်မတန် ရူးမိုက်တဲ့ အမှားတစ်ခုလို့ အမေရိကန် သမ္မတ ဒေါ်နယ်လ်ထရမ့်က စွပ်စွဲ ပြောကြားလိုက်ပါတယ်။

စစ်ပွဲစတင်လာတဲ့နောက် အီရန်က နိုင်ငံတကာ စွမ်းအင်တင်ပို့ရေးဆိုင်ရာ အချက်အခြာ ရေလမ်းကြောင်း တစ်ခုဖြစ်တဲ့ ဟောမုဇ် ရေလက်ကြားကို ပိတ်ထားလိုက်တဲ့နောက် ထရမ့်က NATO စစ်မဟာမိတ် နိုင်ငံတွေ အနေနဲ့ စစ်သင်္ဘောတွေ စေလွှတ်ပေးတာ အပါအဝင် စစ်ရေးအရ အကူအညီပေးဖို့ တောင်းဆိုခဲ့ပါတယ်။

ဒါပေမဲ့ NATO နိုင်ငံတွေကတော့ အီရန်စစ်ပွဲဟာ အမေရိကန် ပိုင်နက်ကို ကျူးကျော်တိုက်ခိုက် ခံရတာ မဟုတ်တဲ့အတွက် ပါဝင်တိုက်ခိုက်ဖို့ ငြင်းဆိုခဲ့ကြပါတယ်။

အိုင်ယာလန် ဝန်ကြီးချုပ် မိုက်ကယ် မာတင်ရဲ့ အိမ်ဖြူတော် ခရီးစဉ်အတွင်း သတင်းထောက်တွေနဲ့ တွေ့ဆုံချိန်မှာ ထရမ့်က NATO နိုင်ငံတွေဟာ အစ္စရေးနဲ့ အမေရိကန် ပူးပေါင်းပြီး အီရန်ကို တိုက်ခိုက်တဲ့ ကိစ္စကို ထောက်ခံခဲ့ပေမယ့် လက်တွေ့ စစ်ပွဲထဲ ဝင်ပါဖို့ကိုတော့ မလိုလားကြဘူးလို့ ပြောပါတယ်။

Public Service Announcement

NATOဟာ အင်မတန် ရူးမိုက်တဲ့ အမှားတစ်ခုကို ကျူးလွန်လိုက်တာလို့ သူယူဆကြောင်းလည်း ထရမ့်က ဆိုပါတယ်။ လူတိုင်းက အမေရိကန်နဲ့ သဘောထား တူညီပေမယ့် ကိုယ်ထိလက်ရောက်တော့ မကူညီချင်ကြကြောင်း၊ ဒီကိစ္စက တော်တော်လေး တုန်လှုပ်စရာ ဖြစ်ခဲ့ပြီး အမေရိကန်က မှတ်သားထားမှာဖြစ်ကြောင်း ထရမ့်က ပြောဆိုသွားပါတယ်။

အမေရိကန်အတွက် လိုအပ်နေချိန်မှာ တွန့်ဆုတ်နေတဲ့အတွက် NATO မဟာမိတ်တွေကို တစ်ခုခု လက်စားချေမလားလို့ သတင်းထောက်တွေက မေးမြန်းခဲ့တဲ့အခါ ထရမ့်က လောလောဆယ်တော့ ဘာမှ စဉ်းစားထားတာ မရှိသေးဘူးလို့ပဲ ပြန်ဖြေသွားပါတယ်။

ထရမ့်ဟာ အရင်ကတော့ NATOကနေ အမေရိကန် နုတ်ထွက်မယ် ဆိုတာမျိုး ခြိမ်းခြောက်တာတွေ ရှိခဲ့ဖူးပေမယ့် မတ်လ ၁၇ ရက်နေ့ကတော့ အဲဒီသဘောထားကို ထပ်ပြောမသွားခဲ့ပါဘူး။

ထရမ့်က အီရန် ပိတ်ချထားတဲ့ ဟောမုဇ် ရေလက်ကြားကို ပြန်ဖွင့်ဖို့နဲ့ အဲဒီ ရေလမ်းကြောင်းရဲ့ လုံခြုံရေးကို ကူညီစောင့်ရှောက်ပေးဖို့ နိုင်ငံတကာ စုပေါင်းရေတပ်ဖွဲ့မျိုး လိုအပ်နေကြောင်း ပြောပါတယ်။ ဟောမုဇ်ဟာ ကမ္ဘာ့ရေနံ တင်ပို့မှု စုစုပေါင်းရဲ့ ၂၀ ရာခိုင်နှုန်းလောက် ဖြတ်သန်းနေတဲ့ ရေပြင်ဖြစ်ပြီး အီရန်က အဲဒီ ရေလမ်းကြောင်းကို ပိတ်ထားတဲ့အတွက် နိုင်ငံတကာ စွမ်းအင် ထောက်ပံ့တင်ပို့မှု စျေးကွက်မှာ ကမောက်ကမ အခြေအနေတွေ ဖြစ်ပေါ်နေပါတယ်။

ထရမ့်က အကူအညီ တောင်းခံခဲ့တဲ့တိုင် အမေရိကန်ရဲ့ မဟာမိတ် နိုင်ငံတချို့ကတော့ ဟောမုဇ် ရေလက်ကြားကို ရှင်းလင်းဖို့အတွက် စစ်သင်္ဘောတွေ စေလွှတ်ဖို့ လောလောဆယ်တော့ အစီအစဉ် မရှိသေးဘူးလို့ပဲ မတ်လ ၁၆ ရက်နေ့မှာ တုံ့ပြန်ထားကြပါတယ်။

ကိုးကား: Reuters