ကမ္ဘာ့ဖလား ပြိုင်ပွဲကြီးရဲ့ ဖွင့်ပွဲ အခမ်းအနားမှာ ဖျော်ဖြေခွင့်ရတဲ့ ပထမဆုံး အရှေ့တောင်အာရှ အနုပညာရှင်အဖြစ် ထိုင်းအဆိုတော်မလေး လီဆာက မှတ်တမ်းသစ် ရေးထိုးနိုင်ခဲ့ပါတယ်။
ဇွန်လ ၁၂ ရက်နေ့ ညပိုင်းက အမေရိကန်နိုင်ငံ၊ လော့စ်အန်ဂျလိစ်မြို့မှာ ကျင်းပတဲ့ ဆိုးဖိုင်း အားကစားကွင်းကြီးထဲမှာ လီဆာက သူ့ရဲ့ Goals သီချင်းကို မြူးမြူးကြွကြွ ဖျော်ဖြေသွားခဲ့တာ ဖြစ်ပါတယ်။ ကမ္ဘာ့ဖလား ဂုဏ်ပြု သီချင်းတွေထဲက တစ်ပုဒ်ဖြစ်တဲ့ Goalsကို တင်ဆက်ရာမှာ လီဆာနဲ့အတူ ဘရာဇီး အဆိုတော် အနစ်တာ၊ နိုက်ဂျီးရီးယား အဆိုတော် ရမ်မာတို့ကပါ ပူးပေါင်းပါဝင်ခဲ့ကြပါတယ်။
အသက် ၂၉ နှစ်အရွယ် လီဆာဟာ ကမ္ဘာကျော် တောင်ကိုရီးယား အမျိုးသမီး KPop အဖွဲ့ Black Pinkနဲ့အတူ နိုင်ငံတကာ ဂီတကြယ်ပွင့် တစ်ဦးအဖြစ် တောက်ပလာခဲ့သူပါ။ အရင်က ကမ္ဘာ့ဖလား ဖွင့်ပွဲ အစီအစဉ်တွေမှာ အရှေ့တောင်အာရှ ဒေသတွင်း နိုင်ငံတွေက အနုပညာရှင်တွေ ဖျော်ဖြေခွင့် ရတာမျိုး ဘယ်တုန်းကမှ မရှိခဲ့ဖူးပါဘူး။
Goalsဟာ အာဖရိကန် ဂီတ စည်းချက်တွေ၊ လက်တင် Popဂီတ အငွေ့အသက်တွေ၊ KPop ဂီတရဲ့ မြူးကြွမှုတွေကို ပေါင်းစပ်ထားတဲ့ သီချင်းတစ်ပုဒ် ဖြစ်ပါတယ်။ ကမ္ဘာ့ဖလားမှာ လီဆာ၊ အနစ်တာ၊ ရမ်မာတို့ရဲ့ ဖျော်ဖြေမှုကို ကြည့်ရှုသူဟာ ပထမဆုံး ၁၂ နာရီအတွင်း သန်း ၅၀ ကျော်လွန်သွားခဲ့ပါတယ်။ ပြီးတော့ လီဆာရဲ့ တက်ကြွပြီး အင်အားအပြည့်နဲ့ ဖျော်ဖြေမှုအပေါ် ပရိသတ် အများအပြားက ချီးကျူးခဲ့ကြပါတယ်။
Public Service Announcement
ပြီးခဲ့တဲ့ ၂၀၂၂ ကမ္ဘာ့ဖလား ပြိုင်ပွဲမှာလည်း KPop အမျိုးသား ဂီတအဖွဲ့ BTSရဲ့ အဖွဲ့သား ဂျန်ဂွတ်ခ်က Dreamers သီချင်းကို ဖျော်ဖြေခွင့် ရခဲ့ပါတယ်။ ဒါဟာ ကမ္ဘာ့ဖလား ဖွင့်ပွဲရဲ့ အဓိက ဖျော်ဖြေမှု အစီအစဉ်တွေမှာ အာရှတိုက်သား တစ်ဦးရဲ့ ပထမဆုံး ပါဝင်ခွင့် ရရှိမှု အနေနဲ့လည်း မှတ်တမ်းဝင်လာခဲ့ပါတယ်။
ကိုးကား: Fox
