ပြည်တွင်းမှာ မွေးဖွားတဲ့ ကလေးတွေကို အမေရိကန် နိုင်ငံသား အလိုအလျောက် ဖြစ်ခွင့်ပေးတဲ့ သတ်မှတ်ချက်ကို ဆက်လက် တည်တံ့စေဖို့ အမေရိကန် တရားရုံးချုပ်က ဆုံးဖြတ်လိုက်ပါတယ်။
ဒါဟာ အမေရိကန်မှာ မွေးဖွားတဲ့ ကလေးတိုင်း အလိုလို နိုင်ငံသားဖြစ်ခွင့် ရစေရမယ်ဆိုတဲ့ စံနှုန်းကို ပယ်ဖျက်ဖို့ သမ္မတ ဒေါ်နယ်လ်ထရမ့်ရဲ့ အထူးအမိန့်ကို ပယ်ဖျက်လိုက်တဲ့ အဓိပ္ပါယ်လည်း ဖြစ်ပါတယ်။ ထရမ့်က အမေရိကန်မှာ ရွှေ့ပြောင်း အခြေချသူ တချို့ရဲ့ ကလေးတွေကို အလိုအလျောက် နိုင်ငံသား ဖြစ်ခွင့်ပေးခြင်းကနေ ပယ်ဖျက်ဖို့ ကြိုးစားခဲ့တာ ဖြစ်ပါတယ်။
ဇွန်လ ၃၀ ရက်နေ့ တရားရုံးချုပ်ရဲ့ စီရင်ချက်မှာတော့ ထရမ့်ရဲ့ အမိန့်ဟာ အမေရိကန် ဖွဲ့စည်းပုံ ဥပဒေ ပြင်ဆင်ချက် အမှတ် ၁၄ မှာ ပါရှိတဲ့ ပြဋ္ဌာန်းချက်တွေနဲ့ မကိုက်ညီဘူးလို့ ဖော်ပြထားပါတယ်။ အဲဒီ ပြင်ဆင်ချက်မှာတော့ အမေရိကန်မှာ မွေးဖွားသူတွေအတွက် နိုင်ငံသားဖြစ်ခွင့် အာမခံချက် ပေးထားပါတယ်။
အမေရိကန်ရဲ့ ဖွဲ့စည်းပုံ ဥပဒေက အမေရိကန်မြေမှာ လွတ်လပ်စွာ မွေးဖွားလာသူတိုင်းအတွက် နိုင်ငံသားဖြစ်ဖို့ အခွင့်အရေးကို ကတိပြုပေးပြီးသား ဖြစ်ကြောင်း၊ အဲဒီ နိုင်ငံသား ဖြစ်ခွင့်ဆိုတာဟာ မှန်ကန်သင့်တော်တဲ့ အခွင့်အရေးလည်း ဖြစ်ကြောင်း တရားသူကြီးချုပ် ဂျွန်ရောဘတ်စ်က ဆိုပါတယ်။
Public Service Announcement
ပြည်တွင်းမှာ မွေးဖွားသူတွေအတွက် နိုင်ငံသားဖြစ်ခွင့် အာမခံချက် ဆက်ရှိရမယ်ဆိုတဲ့ စီရင် ဆုံးဖြတ်ချက်ကို ရောဘတ်စ် အပါအဝင် တရားရုံးချုပ် တရားသူကြီး ၅ ဦးက ထောက်ခံမဲပေးခဲ့ပြီး ၃ ဦးကတော့ ကန့်ကွက်ခဲ့ပါတယ်။ နောက်ထပ် တရားသူကြီး တစ်ဦးဖြစ်တဲ့ ဘရတ် ကာဗန်နော့ဂ်က ထရမ့်ရဲ့ အမိန့်ကို ပယ်ဖျက်ဖို့လိုကြောင်း လက်ခံခဲ့ပေမယ့် အဲဒီအမိန့်ဟာ ဖွဲ့စည်းပုံ အခြေခံ ဥပဒေကို ချိုးဖောက်ခဲ့တယ်ဆိုတဲ့ အချက်ကိုတော့ လက်မခံခဲ့ပါဘူး။ ဒီအမိန့်ဟာ ဖက်ဒရယ်ဥပဒေ ချိုးဖောက်မှုသာ မြောက်တယ်လို့ ကာဗန်နော့ဂ်က ယူဆခဲ့တာကြောင့်ပါ။
အဆုံးမှာတော့ တရားသူကြီး ၉ ဦးထဲမှာ အများစုဖြစ်တဲ့ ၅ ဦးက အမေရိကန်မှာ မွေးဖွားသူတွေဟာ နိုင်ငံသား ဖြစ်ခွင့်ရှိတယ်ဆိုတဲ့ အခြေခံ အခွင့်အရေးကို ထိပါးလို့ မရကြောင်း ဆုံးဖြတ်ပြီး ထရမ့်ရဲ့ အထူးအမိန့်ကို ပျက်ပြယ်စေခဲ့ပါတယ်။
ထရမ့်ဟာ အမေရိကန် သမ္မတအဖြစ် ဒုတိယအကြိမ် တာဝန်ယူတဲ့ ပထမဆုံး နေ့မှာတင် ပြည်တွင်းမှာ မွေးဖွားတဲ့ ကလေးတိုင်း အလိုအလျောက် နိုင်ငံသား ဖြစ်ခွင့်ရစေမယ်ဆိုတဲ့ သတ်မှတ်ချက်ကို တားဆီးတဲ့ အထူးအမိန့်ကို ထုတ်ပြန်ခဲ့တာပါ။ ထရမ့်က အမေရိကန်မှာ အထောက်အထားမဲ့ အခြေချ နေထိုင်နေတဲ့ ရွှေ့ပြောင်း မိသားစုတွေရဲ့ ကလေးတွေ၊ ယာယီလာရောက် နေထိုင်တဲ့ နိုင်ငံခြားသား မိသားစုတွေရဲ့ ကလေးတွေဟာ နိုင်ငံသားဖြစ်ခွင့် မရသင့်ဘူးလို့ ပြောပါတယ်။
တရားရုံးချုပ် စီရင်ချက် ထွက်ပေါ်လာတဲ့နောက် ထရမ့်က အဲဒီ အဆုံးအဖြတ်အပေါ် စိတ်ပျက်ကြောင်း ဝေဖန်ခဲ့ပါတယ်။ ဒါဟာ အမေရိကန် နိုင်ငံအတွက် သိပ်ကိုဆိုးရွားတဲ့ ကိစ္စပဲလို့ ထရမ့်က ဆိုပါတယ်။ နောက်တော့ ထရမ့်က ပြည်တွင်းမှာ မွေးဖွားတဲ့ ကလေးတွေကို အလိုအလျောက် နိုင်ငံသား ဖြစ်ခွင့်ပေးမယ်ဆိုတဲ့ ဖွဲ့စည်းပုံ ဥပဒေ သတ်မှတ်ချက်ကို ပြင်ဆင်ပြောင်းလဲပေးရေး လွှတ်တော် အမတ်တွေကို တိုက်တွန်း တောင်းဆိုမယ်လို့လည်း ပြောပါတယ်။
ဒီကိစ္စကို လွှတ်တော်က ချက်ချင်းပဲ အကောင်အထည် ဖော်သင့်ကြောင်း၊ အမေရိကန်ရဲ့ တန်ဖိုးထားအပ်ပြီး နစ်နာနေရတဲ့ နိုင်ငံသားဖြစ်ခွင့်ကို ကာကွယ်ပေးမယ့် လွှတ်တော် အမတ်တိုင်းကို သူက အပြည့်အဝ အားပေး ထောက်ခံသွားမှာဖြစ်ကြောင်း ထရမ့်က သူ့ကိုယ်ပိုင် လူမှုကွန်ရက် မီဒီယာ Truthမှာ ရေးသားထားခဲ့ပါတယ်။
တရားရုံးချုပ် ဆုံးဖြတ်ချက်ကို လူ့အခွင့်အရေး အဖွဲ့အစည်းတွေနဲ့ အတိုက်အခံ ဒီမိုကရက်တစ်ပါတီ ခေါင်းဆောင်တွေက ကြိုဆိုခဲ့ပြီး နောက်ပိုင်းနှစ်တွေအတွင်း အမေရိကန်ရဲ့ ဖွဲ့စည်းပုံ အခြေခံ ဥပဒေဆိုင်ရာ အရေးအကြီးဆုံး စီရင်ဆုံးဖြတ်မှု တစ်ခုအဖြစ် ချီးကျူး ညွှန်းဆိုခဲ့ကြပါတယ်။
ကိုးကား: Guardian
