ရုရှား ဒရုန်းတစ်စီး နယ်ကျော် ဝင်ရောက်လာလို့ ရိုမေးနီးယားက တိုက်လေယာဉ်တွေ စေလွှတ်ပြီး ပစ်ချခဲ့ကြောင်း သိရပါတယ်။
ဩဂုတ် ၂ ရက် မနက်အစောပိုင်းက ယူကရိန်းနိုင်ငံ တောင်ပိုင်းမှာ ရုရှားက တိုက်ခိုက်မှုတွေ လုပ်ဆောင်ရာမှာ အိမ်နီးချင်း ရိုမေးနီးယား ပိုင်နက်ထဲထိ ရုရှားဒရုန်းတစ်စီး ရောက်ရှိလာခဲ့တာလို့ ဆိုပါတယ်။
အဲဒီ ဒရုန်းဟာ ဒနူဘီ မြစ်ရိုးနားမှာ ရိုမေးနီးယား လေပိုင်နက်ထဲ မိနစ် ၂၀ လောက်ကြာအောင် တရစ်ဝဲဝဲ ရှိနေတဲ့နောက် ရိုမေးနီးယား လေတပ်ရဲ့ F-16 တိုက်လေယာဉ် နှစ်စီးဟာ လေပိုင်နက်ကို ကာကွယ်ဖို့ အရေးပေါ် ပျံတက်ခဲ့ကြတာပါ။
အဲဒီနောက်မှာတော့ F-16 တစ်စီးဟာ ရုရှားဒရုန်းကို ပစ်ချခဲ့တာကြောင့် နိုင်ငံပိုင်နက်ထဲက ရေပြင်တစ်နေရာကို ကျဆင်းသွားခဲ့တယ်ုလိ့ ကာကွယ်ရေး ဝန်ကြီးဌာနက ကြေညာခဲ့ပါတယ်။
Public Service Announcement
ပြီးခဲ့တဲ့ ရက်ပိုင်းတွေအတွင်း ရိုမေးနီးယားဟာ လေပိုင်နက်ထဲ ရုရှားဒရုန်းတွေ ဝင်ရောက်လာတဲ့ ဖြစ်စဉ်တွေကို မကြာခဏ ကြုံနေရပါတယ်။ ဇူလိုင် ၂၄ ကနေ ၂၆ ရက်အတွင်း ရိုမေးနီးယား လေကြောင်းကာကွယ်ရေး စနစ်တွေဟာ လေပိုင်နက် ကျူးကျော်လာတဲ့ ရုရှားဒရုန်း ၃ စီးကို ပစ်ချခဲ့ပါတယ်။
မေလ ၂၉ ရက်နေ့တုန်းကတော့ ရုရှားဒရုန်း တစ်စီးဟာ ဂါလာတေးမြို့ထဲက လူနေတိုက်ခန်းပေါ် ပျက်ကျလို့ လူ ၂ ဦး ဒဏ်ရာရခဲ့ပါတယ်။
အစောပိုင်း ဖြစ်စဉ်တွေမှာ ကြားဖြတ်ပစ်ချခဲ့တဲ့ ရုရှားဒရုန်းတွေကတော့ Shahed အမျိုးအစားတွေ ဖြစ်တယ်လို့ ယုံကြည်ရကြောင်း ရိုမေးနီးယား သမ္မတ နစ်ကာဆာ ဒန်က မှတ်ချက်ပေးခဲ့ပါတယ်။ အဲဒီ ဒရုန်းတွေကို ယူကရိန်း စစ်ပွဲမှာ ရုရှားက ကျယ်ကျယ်ပြန့်ပြန့် အသုံးပြုနေပါတယ်။
ယူကရိန်း စစ်ပွဲကို အကြောင်းပြုပြီး ရုရှားဆီက လေပိုင်နက် ကျူးကျော်ထိပါးမှုတွေ မကြာခဏ ကြုံလာတဲ့နောက် ၂၀၂၅ ခုနှစ်၊ ဖေဖော်ဝါရီလမှာ ရိုမေးနီးယား အစိုးရဟာ နိုင်ငံရဲ့ အချုပ်အခြာ လေပိုင်နက်ထဲ ခွင့်ပြုချက် မရှိဘဲ ဝင်လာတဲ့ အရာတွေကို ပစ်ချခွင့်ပြုမယ့် ဥပဒေ တစ်ရပ်ကို ပြဋ္ဌာန်းခဲ့ပါတယ်။
ရိုမေးနီးယားဟာ NATO စစ်မဟာမိတ် အဖွဲ့နဲ့ ဥရောပ သမဂ္ဂ (EU) အဖွဲ့ဝင် နိုင်ငံတစ်ခုဖြစ်ပြီး ယူကရိန်းနဲ့ ကီလိုမီတာ ၆၀၀ လောက် ရှည်လျားတဲ့ နယ်နိမိတ် ထိစပ်နေပါတယ်။
ပြီးခဲ့တဲ့ သီတင်းပတ်တုန်းကလည်း ယူကရိန်းကို ပစ်ခတ်တဲ့ ရုရှားဒုံးကျည်တစ်စင်းဟာ NATO အဖွဲ့ဝင် ပိုလန်နိုင်ငံ ပိုင်နက်ထဲ ကျရောက်ခဲ့ပြီး အဲဒီဖြစ်ရပ်အတွက် ပိုလန် နိုင်ငံခြားရေး ဝန်ကြီးဌာနက ရုရှား သံအမတ်ကို ဆင့်ခေါ်ပြီး အပြင်းအထန် ကန့်ကွက်ခဲ့ပါတယ်။
ကိုးကား: ABC
