Connect with us

Hi, what are you looking for?

နိုင်ငံတကာ

ပြင်သစ် ဆန္ဒပြပွဲတွေမှာ လူစုခွဲတဲ့ ဗုံးကို ကောက်ကိုင်တဲ့ ဆယ်ကျော်သက်လူငယ် လက်တစ်ဖက် ဆုံးရှုံး

ပြင်သစ်နိုင်ငံက ကျောင်းသား ဆန္ဒပြပွဲတွေအတွင်း အဓိကရုဏ်း နှိမ်နင်းရေး လက်ပစ်ဗုံးကို ကောက်ကိုင်ဖို့ ကြိုးစားသူ ဆယ်ကျော်သက် လူငယ်တစ်ဦး လက်တစ်ဖက် ပြတ်သွားခဲ့ကြောင်း သိရပါတယ်။

ဓာတ်ပုံ - Reuters

ပြင်သစ်နိုင်ငံက ကျောင်းသား ဆန္ဒပြပွဲတွေအတွင်း အဓိကရုဏ်း နှိမ်နင်းရေး လက်ပစ်ဗုံးကို ကောက်ကိုင်ဖို့ ကြိုးစားသူ ဆယ်ကျော်သက် လူငယ်တစ်ဦး လက်တစ်ဖက် ပြတ်သွားခဲ့ကြောင်း သိရပါတယ်။

ပြင်သစ်က မြို့ကြီးတွေမှာ စာသင်ကျောင်းတွေရဲ့ ရုပ်ဝတ္ထုပိုင်း ဖြည့်တင်းနိုင်မှု အားနည်းတာ၊ သင်ကြားရေးဝန်ထမ်း မလောက်ငှတာ၊ အတန်းတွေထဲမှာ ကျောင်းသားအရေအတွက် များလွန်းနေတာတွေကို မကျေနပ်လို့ အထက်တန်း ကျောင်းသားတွေက ဆန္ဒပြနေပါတယ်။

စက်တင်ဘာ လလယ်လောက်တုန်းက ပါရီမြို့တော်ကနေ စတင်လာတဲ့ ဆန္ဒပြပွဲတွေဟာ နောက်ပိုင်းမှာတော့ အဓိကရုဏ်းဆန်ဆန် အခြေအနေတွေကို ကူးပြောင်းလာသလို ပဋိပက္ခတွေအတွင်း ကျောင်းသား ၂၀၀ ကျော်လောက် ဒဏ်ရာတွေ ရခဲ့ပြီး ဖြစ်ပါတယ်။

ပြင်သစ်မှာ အထက်တန်း ပညာရေး သင်ကြားပေးနေတဲ့ ကျောင်းပေါင်း ၃၇၀၀ လောက် ရှိတဲ့ထဲက ၅၀၀ လောက်ဟာ အပြည့်အဝဖြစ်စေ၊ တစ်စိတ်တစ်ပိုင်းဖြစ်စေ ပိတ်ထားရပါတယ်။ အောက်တိုဘာ ၆ ရက်နေ့မှာတော့ အလယ်တန်း ကျောင်းတွေက ကျောင်းသူကျောင်းသားတွေပါ ချီတက် ဆန္ဒပြကြဖို့ စီစဉ်ထားပါတယ်။

Public Service Announcement

Public Service Announcement

လန်းစ်မြို့မှာတော့ အောက်တိုဘာ ၅ ရက် ဆန္ဒပြပွဲတွေအတွင်း ရဲတွေက လူစုခွဲရာမှာ အသုံးပြုတဲ့ အဓိကရုဏ်း နှိမ်နင်းရေး လက်ပစ်ဗုံးကို ကောက်ကိုင်ရာက လက်ထဲ ထပေါက်ကွဲလို့ အသက် ၁၅ နှစ်အရွယ် ကျောင်းသားလူငယ်တစ်ဦး လက်တစ်ဖက် ပြတ်သွားခဲ့ပါတယ်။

အဲဒီဗုံးဟာ လူအုပ်ကြားထဲမှာ ကွဲရင် အသံအကျယ်ကြီးမြည်ပြီး စူးရှတဲ့ အလင်းတန်းမျိုး ထွက်လာအောင် ဖန်တီးထားတဲ့ ဖောက်ခွဲရေး ကိရိယာ တစ်မျိုးပါ။ လူငယ်ကို ဆေးရုံတင်ပို့ပေးခဲ့ရပြီး အခုတော့ အခြေအနေ တည်တည်ငြိမ်ငြိမ် ရှိနေတယ်လို့ လန်းစ်မြို့ ရတြပ်ဖွဲ့က ပြောပါတယ်။

ပြီးခဲ့တဲ့ သီတင်းပတ်ကုန်ကလည်း နိုင်ငံအလယ်ပိုင်း၊ တိုးစ်မြို့မှာ ဆန္ဒပြပွဲတွေကနေ ကူးပြောင်းသွားတဲ့ အဓိကရုဏ်းတွေအတွင်း ဦးခေါင်းဒဏ်ရာ အပြင်းအထန် ရရှိသွားတဲ့ အသက် ၁၆ နှစ်အရွယ် လူငယ်တစ်ဦးဟာ နောက်ဆက်တွဲအဖြစ် မျက်စိတစ်ဖက် အမြင်အာရုံ ဆုံးရှုံးသွားကြောင်း အစိုးရ ရှေ့နေတွေက ပြောကြားခဲ့ပါတယ်။

စက်တင်ဘာ လလယ်ကစလို့ ဆန္ဒပြပွဲနဲ့ ဆက်စပ်တဲ့ အဓိကရုဏ်းတွေအတွင်း ကျောင်းသား ၂၁၅ ဦးနဲ့ ရဲတပ်ဖွဲ့ဝင် ၇၁၅ ဦးထိ ဒဏ်ရာတွေ ရခဲ့ပြီးဖြစ်ကြောင်း အစိုးရက ထုတ်ပြန်ပါတယ်။

ဆန္ဒပြ ကျောင်းသားတွေထဲမှာ အေးအေးချမ်းချမ်း စုဝေးချီတက်သူတွေ ရှိသလို ကျောင်းအဝင်ပေါက်တွေ၊ လမ်းတွေကို ပိတ်ဆို့တာ၊ ပစ္စည်းတွေကို မီးရှို့ဖျက်ဆီးတာမျိုး ရမ်းကားတဲ့ နည်းလမ်းတွေ အသုံးပြုသူတွေလည်း ရောနှော ပါဝင်နေပါတယ်။

ပြင်သစ် လူ့အခွင့်အရေး အဖွဲ့ချုပ် (LDH)ကတော့ အသက်မပြည့်သေးတဲ့ ကျောင်းသားလူငယ် အများစု ပါဝင်တဲ့ ဆန္ဒပြမှုတွေကို ကိုင်တွယ်ရာမှာ ဖြစ်သင့်တာထက် ပိုကြမ်းတမ်းတဲ့ နည်းလမ်းတွေကို လုံခြုံရေး တပ်ဖွဲ့ဝင်တွေက အသုံးပြုနေကြောင်း စွပ်စွဲ ဝေဖန်ထားပါတယ်။

ကိုးကား: AFP

ဆက်စပ်သတင်းများ

နိုင်ငံတကာ

စျေးဝယ်စင်တာနဲ့ စူပါမားကက်တွေက ရေခဲသေတ္တာတွေကို ဆိုက်ဘာတိုက်ခိုက်မှု ကျူးလွန်ခဲ့တဲ့ နောက်ကွယ်မှာ အီရန်နိုင်ငံ ရှိနေကြောင်း ပြင်သစ်က စွပ်စွဲ ပြောကြားလိုက်ပါတယ်။

နိုင်ငံတကာ

ဥရောပကို နျူကလီးယား လက်နက်တွေနဲ့ လွှမ်းခြုံ အကာအကွယ် ပေးနိုင်ဖို့အတွက် ပြင်သစ်ဟာ ဥရောပ ၁၀ နိုင်ငံနဲ့ ဆွေးနွေးမှုတွေ လုပ်ဆောင်နေကြောင်း သိရပါတယ်။

နိုင်ငံတကာ

မီလန်မြို့က ဆန္ဒပြပွဲတွေမှာ အဓိကရုဏ်းဆန်ဆန် သောင်းကျန်းမှုတွေအဖြစ် ပြောင်းလဲသွားခဲ့တဲ့နောက် တပ်အင်အား ၅၀၀ လောက် လုံခြုံရေး ဖြန့်ကျက်ထားဖို့ အီတလီ အစိုးရက ညွှန်ကြားထားပါတယ်။

နိုင်ငံတကာ

နိုင်ငံအနှံ့ ဆန္ဒပြပွဲတွေ ဖြစ်ပွားပြီး အကျပ်အတည်း ကြုံနေတဲ့ ပြင်သစ်ရဲ့ အခြေအနေကို အမေရိကန် သမ္မတ ဒေါ်နယ်လ်ထရမ့်က အရွှန်းဖောက် နောက်ပြောင်သွားပါတယ်။

Facebook