လူအေး/People’s Spring
ရှမ်းပြည်နယ်မြောက်ပိုင်း၊ လားရှိုးမြို့ရှိ အမှတ်(၃) ရဲစခန်းနှင့် မြို့ပေါ်ရပ်ကွက်ကို စစ်ကောင်စီက ယနေ့ တနေ့တည်း လေကြောင်းမှ သုံးကြိမ်းဗုံးကြဲတိုက်ခိုက်ခဲ့ပြီး လားရှိုးမြို့ဝေဟင်တွင် လေကြောင်းပျံသန်းမှုဆက်လက်ရှိနေကြောင်း ဒေသခံများက ပြောသည်။
ယနေ့(အောက်တိုဘာ ၂၃ရက်) နံနက် ၈ နာရီ ၃၅ မိနစ်တွင် လားရှိုးမြို့၊မယ်ဟန်ကျးရွာအုပ်စု၊ ခိုဆန်တန်ကျေးရွာရှိ ရိုးရာ ဆန်အရက်ချက်စက်ရုံ၊၁၀နာရီ ၅မိနစ်တွင် ရပ်ကွက်(၁၂)နှင့် ညနေ ၃နာရီ ခန့်တွင် လားရှိုးမြို့အမှတ်(၃)ရဲစခန်းကိုလေကြောင်းမှ ဗုံးကြဲတိုက်ခိုက်ခြင်းဖြစ်ကြောင်း မြန်မာအမျိုးသားဒီမိုကရက်တစ်မဟာမိတ် တပ်မတော်(MNDAA)ကနှင့် နီးစပ်သည့် သတင်းရင်းမြစ်က ပြောသည်။
ခိုဆန်တန်ကျေးရွာရှိ ရိုးရာဆန်အရက်ချက်စက်ရုံတိုက်ခိုက်မှုတွင် ထိခိုက်ဒဏ်ရာရရှိသူမရှိခဲ့သော်လည်း ပြင်းထန် သောပေါက်ကွဲမှုကြောင့် မီးလောင်ကျွမ်းခဲ့ကြောင်းMNDAA က သတင်းထုတ်ပြန်သည်။
Public Service Announcement
နောက်ထပ်လေကြောင်းတိုက်ခိုက်မှု နှစ်ကြိမ်တွင် လူထိခိုက်မှုရှိကြောင်း သိရသော်လည်း အသေးစိတ်မသိရှိရသေးပေ။
ထို့အပြင် စစ်ကောင်စီ၏ ဂျက်ဖိုင်တာတစ်စီးနှင့် Y-12 လေယာဉ်တစ်စီးသည် လှည့်ပတ်ပျံဝဲနေဆဲဟု လားရှိုးမြို့ခံချို့က ပြောသည်။
” လားရှိုးမြို့ဒီနေ့တော်တော်လေး သတိထားရမယ်။ စစ်ကောင်စီလေယာဉ်တွေကို ပြန်ပြီးပစ်ခတ်နေတဲ့အသံတွေလည်းကြားရတယ်။ ကျနော်တို့အသေးစိတ်တော့ မသိဘူးပေါ့။ ဒါပေမယ့် လေကြောင်းတိုက်ခိုက်မှုတွေ ဆက်ရှိနိုင်တယ်”ဟု လားရှိုးမြို့တွင်နေထိုင်သူတစ်ဦးက ပြောသည်။
ယမန်နေ့ အောက်တိုဘာ ၂၂ရက် ယနေ့နံနက်စောတွင်လည်း စစ်ကောင်စီက လားရှိုးမြို့ မန်ဆူဘုရားအနီးရှိ ရပ်ကွက် (၁၂)ကို ဗုံးကြဲတိုက်ခိုက်ခဲ့ရာ အရပ်သား ၃ဦး ဒဏ်ရာရခဲ့သည်။
စစ်ကောင်စီတပ်သည် MNDAA၏ အထူးဒေသ(၁) လောက်ကိုင်မြို့ ၊ သိန္နီခရိုင်နှင့် လားရှိုးမြို့တို့ကို ပစ်မှတ်ထားဗုံးကြဲတိုက်ခိုက်မှုများ ဆက်တိုက်ပြုလုပ်လျက်ရှိရာ သုံးလကျော်အတွင်း အရပ်သားသေဆုံးသူ ၁၀၀ ကျော်ရှိခဲ့ကြောင်း MNDAAက ယမန်နေ့က သတင်းထုတ် ပြန်ထားသည်။
