KIA ကန်ပိုက်တီမြို့ကိုအပြီးသတ်သိမ်းပိုက်

ထားမြတ်/People’s Spring

မြန်မာ-တရုတ်နယ်စပ် ကန်ပိုက်တီ မြို့ကို ကချင်လွတ်လပ်ရေးတပ်မတော်(KIA) နှင့်ပူးပေါင်းတပ်က ယနေ့(နိုဝင်ဘာ ၂၀)ရက် ညနေပိုင်းတွင် သိမ်းပိုက်နိုင်ပြီဖြစ်ကြောင်း ကချင်စစ်ရေးသတင်းရင်းမြစ်အချို့က ပြောသည်။

ကချင်အထူးဒေသ(၁)နယ်မြေအတွင်း KIA သိမ်းရန် နောက်ဆုံးကျန်နေသည့် ကန်ပိုက်တီကို နိုဝင်ဘာ ၂၀ရက် မနက်တွင် KIAနှင့် ပူးပေါင်းတပ်မျက စတင်ထိုးစစ်ဆင်ခဲ့ရာ နာရီ အနည်းငယ်အကြာ ညနေပိုင်း၌ သိမ်းနိုင်ခဲ့ခြင်းဖြစ်သည်ဟု စုံစမ်းသိရသည်။

“ ညနေ ၅နာရီမှာ ကန်ပိုက်တီ သိမ်းပြီးပါပြီ” ဟု သတင်းရင်းမြစ်တဦက People’s Spring သို့ပြောသည်။

Public Service Announcement

ကန်ပိုက်တီရှိ စစ်ကောင်စီတပ်ဖွဲ့ဝင်များနှင့် ပြည်သူ့စစ်များ တရုတ်နိုင်ငံဘက်သို့ ထွက်ပြေးသွားကြောင်း သတင်းရင်းမြစ်က ပြောသည်။ တိုက်ပွဲသတင်း အသေးစိတ် အခြေအနေကိုမူ မသိရသေး​ပေ ။

ကန်ပိုက်တီမြို့သိမ်းတိုက်ပွဲနှင့်ပတ်သက်ပြီး KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူထံဆက်သွယ်မေးမြန်းထားဆဲဖြစ်သည်။

KIA ပူးပေါင်းတပ်သည် စစ်ကောင်စီ လက်အောက်ခံ ဦးဇခုန်တိန့်ယိန်း ခေါင်းဆောင်သည့် ကချင်အထူးဒေသ(၁) စစ်ဆင်ရေးကို ဇွန်လမှ စတင်ခဲ့ရာ ဆဒုံး၊ ချီဖွေ၊ ဆော့လော်၊ ပန်ဝါ၊ဖီမော်မြို့များကို ဆက်တိုက်သိမ်းပိုက်ခဲ့သည်။

ကန်ပိုက်တီမြို့မသိမ်းခင် မြို့ အနီးရှိ အမှတ် ၁၀၀၃ နယ်ခြား​စောင့်တပ်ရင်းကို KIA က ​အောက်တိုဘာလအတွင်းသိမ်းပိုက်ခဲ့သည်။

နောက်ဆုံးကျန်ရှိ​သော မြန်မာ-တရုတ် နယ်စပ်မြို့ ကို နိုဝင်ဘာ ၂၀ ရက်တွင်အပြီးသတ်သိမ်းပိုက်ရရှိခဲ့ခြင်းဖြစ်သည်။

တရုတ်ဘက်က KIAကို ဖိအားမျိုးစုံပေးနေသည့် ကြားမှ မြန်မာ-တရုတ် တရားဝင် ကုန်သွယ်ရေး နယ်စပ်မြို့တစ်ခုကို ထပ်မံ၍ KIAက သိမ်းပိုက်နိုင်ခဲ့ခြင်းဖြစ်သည်။ ယခင်ကလည်း KIAသည် လွယ်ဂျယ်နယ်စပ်မြို့ကို သိမ်းပိုက်ထားသည်။

စစ်တပ်အာဏာသိမ်းပြီး​နောက်ပိုင်း ​နွေဦး​တော်လှန်​ရေးတွင် ​တော်လှန်​ရေးအင်အားစုများနှင့် ပူး​ပေါင်း၍ စစ်​အာဏာရှင်စနစ်ချုပ်ငြိမ်း​ရေးကို ဦး​ဆောင်ကြိုးပမ်း​နေ​သော တိုင်းရင်းသားလက်နက်ကိုင် အဖွဲ့ဖြစ်​သော KIA သည် ကချင်ပြည်နယ်၌ အနည်းဆုံး မြို့ ၁၄ မြို့ကိုသိမ်းပိုက်ခဲ့ပြီးဖြစ်သည်။