တာရာ/People’s Spring
မကွေးတိုင်း၊ မင်းဘူးမြို့နယ်၊ ပုသိမ်-မုံရွာကားလမ်းပေါ်ရှိ မန်းရွှေစက်တော်ရာအဝင် မုခ်ဝအနီးတွင် တိုက်ပွဲဖြစ်ပွားခဲ့ပြီး စစ်ကောင်စီတပ်သား ၁၀ ဦးခန့်သေဆုံးခဲ့ကြောင်း မင်းဘူးခရိုင် အမှတ်(၆) တပ်ရင်းက ယနေ့(နိုဝင်ဘာ ၃၀ရက်) ထုတ်ပြန်လိုက်သည်။
ရွှေစက်တော်ရာစေတီသည် မင်းဘူးမြို့မှ အနောက်တောင်ဘက် (၂၆)မိုင်ကွာဝေးသော အနောက်ရိုးမ အရှေ့ဘက်ဆုံး တောင်စွယ်ပေါ်တွင် တည်ရှိသည်။ စစ်ကောင်စီတပ်က ရွှေစက်တော်ဘုရားအတွင်း၌ ပြည်သူလူထုအကာကွယ်ယူ စစ်ရေးလှုပ်ရှားမှုများပြုလုပ်နေပြီး ပြည်သူလူထုထံမှ ငွေကြေးနှင့် အဖိုးတန်ပစ္စည်းများ လုယက်ယူငင်နေသောကြောင့် နိုဝင်ဘာ ၂၇ ရက်နံနက်တွင် တိုက်ခိုက်ခဲ့ခြင်းဖြစ်သည်ဟု အဆိုပါတပ်ရင်းက ထုတ်ပြန်သည်။
“သူတို့(စစ်ကောင်စီတပ်)က ပုသိမ် – မုံရွာလမ်းမအတိုင်းကို စစ်ကြောင်းထိုးလာတာကို ကျွန်တော်တို့က ဆီးကြိုပြီးတိုက်ခိုက်ခဲ့တာပါ”ဟု မင်းဘူးခရိုင် အမှတ်(၆)တပ်ရင်း တာဝန်ရှိသူတစ်ဦးက ပြောသည်။
Public Service Announcement
အင်အား ၆၀ခန့်ပါသည့် စစ်ကောင်စီတပ်စစ်ကြောင်းနှင့် ပုသိမ် – မုံရွာလမ်းမပေါ်တွင် နှစ်နေရာ ထိတွေ့တိုက်ပွဲဖြစ်ပွားခဲ့ပြီး အနီးကပ်တိုက်ပွဲဖြစ်ကာ သတင်းကြိုရသဖြင့် လက်ဦးမှုရယူတိုက်ခိုက်ခဲ့ခြင်းဟု အဆိုပါတပ်ရင်းတာဝန်ရှိသူက ပြောသည်။ စစ်ကောင်စီတပ်၏ ထိခိုက်သေဆုံးမှုနှင့်ပတ်သက်ပြီး လူထုနွေဦးက သီခြားအတည်မပြုနိုင်သေးပေ။
စစ်ကောင်စီတပ်က လက်နက်ကြီးပစ်ကူ အလွန်အကျွံအသုံးပြုသဖြင့် ကာကွယ်ရေးတပ်များဘက်က ဒရုန်းဖြင့် တိုက်ခိုက်မှု နှစ်ကြိမ်ပြုလုပ်ခဲ့ရသည်ဟုလည်း အဆိုပါတပ်ရင်းတာဝန်ရှိသူက ပြောသည်။
အဆိုပါ တိုက်ခိုက်မှုကို မင်းဘူးခရိုင်၊ အမှတ် (၆)တပ်ရင်း၊ မင်းဘူးခရိုင်၊ အမှတ်(၈)တပ်ရင်းနှင့် မင်းဘူးခရိုင် ပကဖ ဒရုန်းလက်ရုန်းတပ်ဖွဲ့တို့က ပူးပေါင်းတိုက်ခိုက်ခဲ့ခြင်းဖြစ်သည်။
ထို့အပြင် နိုဝင်ဘာ ၁၇ ရက်ကလည်း ရွှေစင်တော်ဘုရားအနီး ဘုရားရွာတွင်တပ်စွံထားသော စစ်ကောင်စီတပ်သားများအား မင်းဘူးခရိုင် အမှတ်(၆)တပ်ရင်းက တိုက်ခိုက်ခဲ့သေးသည်။
မင်းဘူးမြို့နယ်အတွင်း စစ်ရေးလှုပ်ရှားမှု ပြင်းထန်လာနိုင်သဖြင့် ပြည်သူများအနေဖြင့် စစ်ကောင်စီတပ်များ၊ရဲများနှင့်ဝေးရာ နေထိုင်ကြရန်လည်း မင်းဘူးခရိုင် အမှတ်(၆)တပ်ရင်းက မေတ္တာရပ်ခံထားသည်။
