မိုးမိတ်မှာ တိုက်ပွဲပြင်းထန်နေပြီး စစ်တပ် ဗုံးကြဲနေ

အောက်တိုဘာ-၂၉၊၂၀၂၆။ရွှေပြည်စိုး/People’s Spring

ဗန်းမော်မြို့အနီးမှာ ကချင်လွတ်လပ်ရေးတပ်မတော်(KIA)နဲ့ ပူးပေါင်းတပ်တွေက စစ်ရေးအရှိန်မြှင့်ထားစဉ် မိုးမိတ်မြို့အနီးမှာလည်း တိုက်ပွဲတွေ အပြင်းအထန်ဖြစ်ပွားနေပါတယ်။

မိုးမိတ်မြို့နဲ့ မြစ်ဆုံကြားမှာ မနေ့က အောက်တိုဘာ၂၈ရက်မနက်ပိုင်းမှာ တိုက်ပွဲအပြင်းအထန်ဖြစ်ခဲ့ပြီး စစ်တပ်က ဂျက်ဖိုက်တာနဲ့ ဗုံးကြဲသွားခဲ့တယ်လို့ ဒေသခံတွေက ပြောပါတယ်။ ဒီကနေ့ အောက်တ်ိုဘာ ၂၉ရက်ညနေပိုင်းမှာလည်း ဂျက်ဖိုက်တာနဲ့ ရဟတ်ယဉ်တွေလာပြီး ဗုံးကြဲနေတယ်လို့ သိရပါတယ်။

” အရင်ရက်ကထက် ပိုပြီးပြင်းထန်တာကမနေ့ကစတယ်။ ပေါက်ကွဲသံတွေက ပြင်းထန်တယ်။ မြစ်ဆုံဖက်ကို သွားတဲ့လမ်းမှာ ချနေကြတာပါ”လို့ မိုးမိတ်ဒေသခံတစ်ဦး ပြောပါတယ်။

Public Service Announcement

မိုးမိတ်မြို့နဲ့ (၂)မိုင်ခန့်အကွာက ညောင်နီကျေးရွာအနီးမှာ စက်တင်ဘာ ၂၈ရက်မနက်ပိုင်းကစပြီး

စစ်တပ်နဲ့ KIA ပူးပေါင်းတပ်တွေ တိုက်ပွဲစတင်ဖြစ်ပွားခဲ့ပါတယ်။ အဲဒီနောက်ပိုင်း မိုးမိတ် – မိုးကုတ်၊ မိုးမိတ်-တွင်းငယ်-သပိတ်ကျင်းလမ်းပိုင်းတွေမှာလည်း တိုက်ပွဲတွေဖြစ်ပွားခဲ့ပါတယ်။ အောက်တိုဘာလလယ်ပိုင်းမှာ တိုက်ပွဲတွေ ငြိမ်သက်သွားခဲ့ပြီးနောက်ပိုင်း ယခုရက်ပိုင်း တိုက်ပွဲ တကျော့ပြန်ပြင်းထန်နေတာလို့ သိရပါတယ်။

လက်ရှိစစ်ရေးအခြေအနေကြောင့် မိုးမိတ် – မိုးကုတ်၊ မိုးမိတ်-တွင်းငယ်-သပိတ်ကျင်းလမ်းပိုင်းတွေမှာ ခရီးသွားတွေ လုံခြုံရေးသတိပြုကြဖို့ KIA ပူးပေါင်းတပ်တွေနဲ့ နီးစပ်တဲ့သတင်းရင်းမြစ်တွေက သတိပေးထားပါတယ်။

ရှမ်းပြည်နယ်မြောက်ပိုင်းမှာပါဝင်တဲ့ မိုးမိတ်မြို့နဲ့ မန္တလေးတိုင်းမှာပါဝင်တဲ့ မိုးကုတ်မြို့၊ သပိတ်ကျင်းမြို့ တွေဟာ နယ်မြေချင်း ဆက်စပ်နေပါတယ်။တိုက်ပွဲဖြစ်ပွားနေတဲ့အနီးဝန်းကျင်မှာ စစ်တပ်ရဲ့ လေကြောင်းအန္တရာယ်နဲ့လက်နက်ကြီးအန္တရာယ်ကို ဒေသခံတွေ သတိပြုကြဖို့ တော်လှန်ရေးရဲဘော် တွေက သတိပေးပါတယ်။

ရှမ်းပြည်နယ်မြောက်ပိုင်းနဲ့ဆက်စပ်နေတဲ့ ကချင်ပြည်နယ် ရွှေကူမြို့၊ဗန်းမော်မြို့တို့မှာလည်း စစ်ရေးတင်းမာနေပါတယ်။

ဗန်းမော်မြို့က အမှတ်(၂၁) စစ်ဆင်ရေးကွပ်ကဲမှုဌာနချုပ်-စကခ(၂၁)ရဲ့ အနောက်ဘက်ခြမ်းမှာရှိတဲ့ မိုးစိန်းကျွန်းကို သိမ်းပိုက်နိုင်ဖို့ ထိုးစစ်ဆင်တိုက်ခိုက်နေတယ်လို့ KIA သတင်းပြန်ကြားရေးဌာနက အောက်တိုဘာ ၂၈ရက်မှာ သတင်းထုတ်ပြန်ထားပါတယ်။ KIA နဲ့ စစ်တပ်ဟာ ကချင်နဲ့စစ်ကိုင်းတိုင်းနယ်စပ်ဒေသမှာလည်း စစ်ရေးတင်းမာနေပါတယ်။