'/%3E%3C/svg%3E){kind=small}
ထားမြတ်/People’s Spring
အမျိုးသားညီညွတ်ရေးအစိုးရ(NUG)က အကျဉ်းသား အကျဉ်းသူ ၁၆၉ဦးကို လွတ်ငြိမ်းသက်သာခွင့်ပြုလိုက်ကြောင်း ယနေ့ (ဇန်နဝါရီ ၁ရက်)တွင် ထုတ်ပြန်သည်။
ယနေ့ ကျရောက်သော နှစ်သစ်အခါသမယနေ့၌ နွေဦးတော်လှန်ရေး၏ အကျိုးစီးပွားကို ရှေးရှုသောအားဖြင့်လည်းကောင်း၊ ပြည်သူလူထု နှလုံးစိတ်ဝမ်း အေးချမ်းစေရေးနှင့် လူသားချင်းစာနာထောက်ထားမှုကို အလေးထားသောအားဖြင့်လည်းကောင်း အကျဉ်းထောင်၊ အကျဉ်းစခန်း အသီးသီးတွင် ပြစ်ဒဏ်ကျခံလျက်ရှိသည့် အကျဉ်းသား အကျဉ်းသူ ၁၆၉ ဥိးကို ရာဇဝတ်ကျင့်ထုံးဥပဒေ ပုဒ်မ ၄၀၁၊ ပုဒ်မခွဲ (၁) အရ စည်းကမ်းသတ်မှတ်ချက်မထားဘဲ လွတ်ငြိမ်း သက်သာခွင့်ပြုလိုက်သည်ဟု ဖော်ပြသည်။
အထက်အပိုဒ် ၁တွင် အကျုံးမဝင်သော ကျန်အကျဉ်းသား/သူများကို ယင်းတို့ ကျခံနေရသည့် ထောင်ဒဏ်၏ သုံးပုံတစ်ပုံအား လျှော့ပေါ့ကျခံစေရန် လည်း ရာဇဝတ်ကျင့်ထုံး ဥပဒေ ပုဒ်မ ၄၀၁၊ ပုဒ်မခွဲ (၁)အရ ပြစ်ဒဏ်လွတ်ငြိမ်း သက်သာခွင့်ပေးခဲ့သည်။
Public Service Announcement
“ယခု ၂၀၂၅ နှစ်သစ်ရက်မှာ ပြည်သူလူထုအနေနဲ့လည်း စစ်အာဏာရှင်များ၏ ဘေးမှ လွတ်မြောက်ပြီး ဝမ်းမြောက်တဲ့နေ့ရက်လေးကို ကျော်ဖြတ်နိုင်ကြဖို့မျှော်လင့်ပါတယ်။ ထို့အတူ မိမိတို့ အမျိုးသားညီညွတ်ရေး အစိုးရရဲ့ တရားစီရင်ရေးမှ ဆုံးဖြတ်ပြီး ပြစ်ဒဏ်ကျခံနေသူများမှ အချို့ကိုလည်း ယနေ့ လွတ်ငြိမ်းချမ်းသာခွင့် ပေးလိုက်ပါတယ်။ ပြစ်မှု ပြစ်ဒဏ်ကျခံနေရတဲ့ ကာလများကို ဖြတ်ကျော်ခဲ့ပြီးဖြစ်ကာ ယနေ့မှစ၍ မိသားစုများနဲ့အတူ နှစ်သစ်နေ့ရက်ကို ပျော်ရွှင်စွာ ဖြတ်သန်းနိုင်ကြပါစေ”ဟု NUG ယာယီသမ္မတ ဒူဝါလရှီးလက နှစ်သစ်ကူးမိန့်ခွန်း၌ ထည့်သွင်း ပြောကြားခဲ့သည်။
ယခု လွတ်ငြိမ်းသက်သာခွင့်ပြုခဲ့သူများသည် တရားရေးဌာနက အမိန့်ချပြီးသော တရားခံများ၊ တိုက်ပွဲအတွင်းဖမ်းမိထားသည့် စစ်သုံ့ပမ်းများကို စိစစ်၍ လွတ်ငြိမ်းပေးခဲ့ခြင်းဖြစ်ကြောင်း သတင်းရင်းမြစ်တစ်ဦးက ပြောပြထားသည်။
