ဖုန်းmessage ပေးပို့ပြီး လိမ်ညာတဲ့ မသမာသူတွေဟာ သူ့ကိုလည်း ချမ်းသာမပေးခဲ့ဘူးလို့ ထိုင်းဝန်ကြီးချုပ် ဖေထောင်ထန် ရှီနာဝပ်ထရာက ဖွင့်ဟခဲ့ပါတယ်။
ဉာဏ်ရည်တု နည်းပညာ (AI)ကို အသုံးပြုပြီး ပြုပြင်ပြောင်းလဲထားတဲ့ နိုင်ငံခြား အစိုးရ ခေါင်းဆောင် တစ်ဦးရဲ့ အသံနဲ့ သူ့ကို လှည့်စားပြီး ဖုန်းmessage ပေးပို့တာမျိုး ကြုံခဲ့တယ်လို့ ဖေထောင်ထန်က ဇန်နဝါရီ ၁၅ ရက်နေ့မှာ ထုတ်ပြောခဲ့ပါတယ်။
သူဟာ အဲဒီ လှည့်ကွက်ထဲ ကျလုဆဲဆဲ ဖြစ်ခဲ့ပေမယ့်လည်း ကံအားလျော်စွာနဲ့ အခြေအနေမှန်ကို သတိထားမိခဲ့တယ်လို့ ဖေထောင်ထန်က ဆိုပါတယ်။ သူဟာ လူသိများတဲ့ နိုင်ငံခေါင်းဆောင် တစ်ဦးဆီက အသံဖိုင် ဖုန်းmessageကို လက်ခံရရှိခဲ့တာလို့ ထိုင်းဝန်ကြီးချုပ်က ပြောခဲ့ပေမယ့် အသံပိုင်ရှင် ဘယ်သူလဲ ဆိုတာကိုတော့ ထိမ်ချန်ထားခဲ့ပါတယ်။
အဲဒီ အသံmessageထဲမှာ တစ်ဖက်က ပုဂ္ဂိုလ်က လူချင်းတွေ့ချင်တဲ့အကြောင်းနဲ့ အတူလက်တွဲ အလုပ်လုပ်ချင်ကြောင်း ပြောဆိုထားခဲ့တယ်လို့ ဖေထောင်ထန်က ဆိုပါတယ်။ ဖေထောင်ထန်ဟာ တူညီတဲ့ ဖုန်းနံပါတ်ဆီက ခေါ်ဆိုမှု တစ်ခုကို လွတ်သွားခဲ့ပေမယ့် နောက်တစ်ညမှာ အဲဒီနံပါတ်ဆီကပဲ ထပ်ရောက်လာတဲ့ messageကို ကြားရချိန်မှာ မူမမှန်တာကို စတင် ခံစားမိလာခဲ့တယ်လို့ ရှင်းပြခဲ့ပါတယ်။
Public Service Announcement
အသံရှင်က ထိုင်းဟာ အရှေ့တောင်အာရှ နိုင်ငံများ အစည်းအရုံး (အာဆီယံ) အဖွဲ့ထဲမှာ အလှူအတန်း မရှိတဲ့ တစ်ခုတည်းသော နိုင်ငံလို့ စွပ်စွဲထားပြီး အဲဒီအချက်က သူ့မသင်္ကာမှုကို ကြီးထွားစေခဲ့တယ်လို့ ဖေထောင်ထန်က ဆိုပါတယ်။
နောက်တော့ ထိုင်းနိုင်ငံ ပြင်ပမှာရှိတဲ့ ဘဏ်တစ်ခုဆီ ငွေလွှဲပေးဖို့ text messageတစ်စောင် ရောက်လာတဲ့အခါ ဝန်ကြီးချုပ်ရဲ့ သံသယက သေချာသွားခဲ့ပါတယ်။ ဖေထောင်ထန်က အဲဒီ messageကို ဘယ်အချိန်မှာ လက်ခံရရှိခဲ့သလဲ ဆိုတာကိုတော့ ထုတ်မပြောခဲ့ပါဘူး။
သူက သူ့နာမည်နဲ့ ဖုန်းဆက်ပြီး အလှူခံတာမျိုးတွေ ရှိလာရင်လည်း လုံးဝ ငွေကြေး မထည့်ဝင်ကြဖို့ ထိုင်းပြည်သူတွေကို သတိပေး တိုက်တွန်းခဲ့ပါတယ်။
ထိုင်းမှာတော့ call centre scamsလို့ ခေါ်ဝေါ်လေ့ရှိတဲ့ ဖုန်းဆက်ပြီး၊ အသံmessage ပေးပို့ပြီး လိမ်လည်မှုတွေက ကျယ်ကျယ်ပြန့်ပြန့် ဖြစ်ပေါ်နေပါတယ်။ ဖုန်းဆက် လိမ်လည်သူတွေဟာ ရဲတွေ၊ အစိုးရ အရာရှိတွေ၊ ဘဏ်ဝန်ထမ်းတွေအဖြစ် အယောင်ဆောင်ပြီး လိမ်လည်မှုတွေ ကျူးလွန်လေ့ ရှိကြောင်းလည်း သိရပါတယ်။
ကိုးကား: CNA
