စစ်အာဏာရှင်တော်လှန်ရေးတွင်ပါဝင်နေသည့်ကူကီး နှင့် ထာဒိုအဖွဲပူးပေါင်း

ကဖေး/People’s Spring

စစ်ကိုင်းတိုင်းအတွင်း အိန္ဒိယ-မြန်မာနယ်စပ်၌ အခြေစိုက်ပြီး စစ်အာဏာရှင်တော်လှန်ရေးတွင်ပါဝင်နေသည့် ကူကီးအမျိုးသားတပ်မတော်-မြန်မာပြည်(KNO/KNA-B ) နှင့် ထာဒိုလက်နက်ကိုင်တပ်ဖွဲ့(TCA/TDA)တို့ပူးပေါင်းလိုက်သည်။

ဖေဖော်ဝါရီ ၂၆ရက်နေ့တွင် စစ်ကိုင်းတိုင်း၊ တမူးမြို့နယ်၌ နှစ်ဖက်တွေ့ဆုံဆွေးနွေးခဲ့ပြီးနောက် ပူးပေါင်းလိုက်ကြောင်း သတင်းထုတ်ပြန်သည်။

“ကူကီးနဲ့ ထာဒိုက မျိုးနွယ်တူတယ်။ တစ်မိသားစုတည်းတောင် သဘောထားကွဲလွဲတာရှိတယ်။ အခုပေါင်းစည်းလိုက်တာ အံ့ဩရသလို ဒါက သတင်းကောင်းဖြစ်တယ်” ဟု တမူးဒေသခံတစ်ဦးကပြောသည်။

Public Service Announcement

အမျိုးသားရေးဆောင်ရွက်ရာ၌ ရည်မှန်းချက်တူညီသောကြောင့် ပူးပေါင်းလိုက်ခြင်းဟု ထုတ်ပြန်ထားပြီး စစ်အာဏာရှင်တော်လှန်ရေး၌ အကျိုးရှိမည်ဟု ယုံကြည်ကြောင်း တမူးဒေသခံက‌ပြောသည်။

“KNA(B) က 2021 စစ်အာဏာမသိမ်းခင်ကတည်းကဖွဲ့စည်းခဲ့ပြီး TDA က စစ်အာဏာသိမ်းနွေဦးတော်လှန်ရေးက စဖွဲ့တာ။ နှစ်ဖွဲ့စလုံးက စစ်အာဏာရှင်တော်လှန်ရေးမှာ ပူးပေါင်းတိုက်ခိုက်နေတာပါ”ဟု တမူးမြို့မှ ကာကွယ်ရေးရဲဘော်တစ်ဦးကပြောသည်။

KNA(B) တပ်ဖွဲ့သည် မြန်မာ-အိန္ဒိယနယ်စပ်​ဒေသတွင် စစ်တပ်စခန်းနှင့် စစ်တပ်လက်​အောက်ခံပြည်သူ့စစ်စခန်းများကို ​တော်လှန်​ရေးအဖွဲ့များကတိုက်ခိုက်​သောတိုက်ပွဲများတွင်ပါဝင်တိုက်ခိုက်​နေသည်။

တမူးမြို့နယ်အထက်ပိုင်း အောင်ဇေယျကျေးရွာရှိ စစ်ကောင်စီနှင့်စစ်တပ်လက်​အောက်ခံ ကသည်းသူပုန် ၊ရှမ်းနီတပ်(SNA) နှင့် ပျူ​စောထီးများ၏

အခြေစိုက်တပ်စခန်းအား ​တော်လှန်​ရေးတပ်များကထိုးစစ်ဆင်သိမ်းပိုက်ရာတွင်လည်း KNA (B)တပ်ဖွဲ့ဝင်များပါဝင်တိုက်ခိုက်ခဲ့သည်။ အလားတူ ၂၀၂၃ နိုဝင်ဘာလတွင် တမူးခရိုင် မြို့သစ်မြို့နယ် ရှိ အကျဥ်းဦးစီး ၏ အကျဥ်းစခန်းကိုတိုက်ခိုက်သိမ်းပိုက်ရာတွင်လည်း ပါဝင်တိုက်ခိုက်ခဲ့သည်။

ကူကီးနှင့် ထာဒိုတိုင်းရင်းသားမျိုးနွယ်စုများသည်စစ်ကိုင်းတိုင်း၊ ကလေး၊ တမူး၊ ဟုမ္မလင်း၊ လေရှီးနှင့် ချင်းပြည်နယ်အတွင်းရှိ မြို့နယ်အချို့၌ နေထိုင်ကြသည်။