တရုတ် သမ္မတ ရှီကျင့်ဖျင်ဟာ သိပ်မကြာခင်မှာ အမေရိကန်ကို အလည်အပတ် ခရီးစဉ် လာရောက်နိုင်တယ်လို့ အမေရိကန် သမ္မတ ဒေါ်နယ်လ်ထရမ့်က ပြောကြားခဲ့ပါတယ်။
ကမ္ဘာပေါ်မှာ စီးပွားရေးအင်အား အတောင့်တင်းဆုံး ပြိုင်ဘက်နှစ်နိုင်ငံကြား ကုန်သွယ်ရေး မူဝါဒဆိုင်ရာ တင်းမာမှုတွေ တောက်လျှောက် မြင့်တက်လာတဲ့ အခြေအနေမှာ ရှီရဲ့ အမေရိကန် ခရီးစဉ် ဖြစ်မြောက်နိုင်ခြေကို ထရမ့်က မှတ်ချက်ပေးခဲ့တာ ဖြစ်ပါတယ်။
ရက်အတိအကျကို မကြေညာပေမယ့် ရှီဟာ အရမ်း မကြာလှတဲ့ ကာလတစ်ခုမှာ အမေရိကန်ကို ရောက်လာနိုင်တယ်လို့ ဝါရှင်တန်မြို့က ကနေဒီ အနုပညာ စင်တာကို သွားရောက်စဉ် အတောအတွင်း ထရမ့်က သတင်းထောက်တွေကို ပြောကြားခဲ့ပါတယ်။
အစောပိုင်းမှာ Wall Street ဂျာနယ်က အမေရိကန်နဲ့ တရုတ်တို့ဟာ ဇွန်လထဲမှာ ထိပ်သီးဆွေးနွေးပွဲတစ်ခု ကျင်းပပြီး နှစ်ဖက်ခေါင်းဆောင်တွေ တွေ့ဆုံဖို့ ညှိနှိုင်းနေကြောင်း ဖော်ပြခဲ့ပါတယ်။ ထရမ့်ရော၊ ရှီပါ ဇွန်လမှာ မွေးဖွားသူတွေ ဖြစ်ပါတယ်။
Public Service Announcement
အမေရိကန်မှာ ထရမ့် အာဏာရလာတဲ့ အချိန်ကစလို့ တရုတ်၊ ကနေဒါနဲ့ မက္ကဆီကို နိုင်ငံတွေရဲ့ သွင်းကုန်တွေအပေါ် အခွန်နှုန်းထားတွေ တိုးမြှင့် စည်းကြပ်ခဲ့တဲ့နောက် အဲဒီနိုင်ငံတွေနဲ့ အမေရိကန်ကြားက ဆက်ဆံရေးမှာ ပြဿနာတွေ ရှိလာပါတယ်။ တရုတ်နဲ့ ကနေဒါတို့ဟာ ထရမ့်ကို တုံ့ပြန်တဲ့ အနေနဲ့ အမေရိကန် သွင်းကုန်တွေကို အခွန်တိုးမြှင့် ကောက်ခံဖို့ အစီအမံတွေကို ကြေညာထားပြီးပါပြီ။
ထရမ့်က အဲဒီလိုမျိုး အခွန်တိုးကောက်တဲ့ ရည်ရွယ်ချက်ဟာ အမေရိကန်ရဲ့ ကုန်သွယ်ရေး လိုငွေ ပြမှုကို လျှော့ချဖို့၊ ပြီးတော့ အဲဒီသုံးနိုင်ငံဆီကနေ အမေရိကန်ဆီကို ဖန်တနဲလ် မူးယစ်ဆေးဝါးတွေ မှောင်ခို ဝင်ရောက်နေတာကို ဒဏ်ခတ်ဖို့ အတွက်လို့ အကြောင်းပြထားပါတယ်။
ထရမ့်ရဲ့ အခွန်မြှင့်တင်မှုတွေဟာ ကုန်သွယ်ရေး စစ်ပွဲတစ်ခုဆီ ဦးတည်လာနိုင်ပြီး တရုတ်အတွက် ထိခိုက်မှု ကြီးမားနိုင်တယ်လို့ စီးပွားရေး ပညာရှင်တွေက သုံးသပ်ထားပါတယ်။ ပြီးခဲ့တဲ့ သီတင်းပတ်မှာတော့ တရုတ် အစိုးရက လက်ရှိ အခြေအနေတွေအတွက် တွေ့ဆုံဆွေးနွေးဖို့ အမေရိကန်ကို အဆိုပြုခဲ့ပါတယ်။
ရှီဟာ အမေရိကန်ကို ၂၀၂၃ ခုနှစ်၊ နိုဝင်ဘာလတုန်းက နောက်ဆုံးအကြိမ် ရောက်ရှိခဲ့ပြီး အဲဒီတုန်းက အမေရိကန် သမ္မတကတော့ ဂျိုးဘိုင်ဒန် ဖြစ်ပါတယ်။ ရှီနဲ့ ဘိုင်ဒန်တို့ဟာ စူပါပါဝါ နှစ်နိုင်ငံကြား တင်းမာမှုတွေကို ဖြေလျှော့ရေး ကိစ္စအတွက် ကယ်လီဖိုးနီးယားမှာ မျက်နှာစုံညီ ဆွေးနွေးခဲ့ကြပါတယ်။
ကိုးကား: AFP
