ဧပြီ -၁ ၊ ၂၀၂၅/People’s Spring
ရွေးကောက်ပွဲကျင်းပမယ့် ကာလကို အာဏာသိမ်းစစ်ကောင်စီခေါင်းဆောင် ထုတ်ပြောလိုက်ပြီး လေးရက်အကြာမှာ ငလျင်လှုပ်ကာ နေပြည်တော်မှာရှိတဲ့လွှတ်တော်အဆောက်အဦးတွေ ကြီးကြီးမားမား ထိခိုက်ပျက်စီးသွားပါတယ်။
အာဏာသိမ်းစစ်ကောင်စီခေါင်းဆောင်က ရွေးကောက်ပွဲကို အခု ၂၀၂၅ ခုနှစ် ဒီဇင်ဘာလ တတိယပတ် နဲ့ စတုတ္တပတ် ၊ ၂၀၂၆ ခုနှစ် ဇန်နဝါရီလ ပထမပတ်နဲ့ ဒုတိယပတ်တွေမှာကျင်းပဖို့ လျာထားတယ်လို့ မတ်လ ၂၅ ရက်က စစ်ကောင်စီအစည်းအဝေးမှာထုတ်ပြောခဲ့တာပါ။
အဲဒီနောက် မတ်လ ၂၈ ရက် မွန်းလွဲပိုင်း မှာ ငလျင်လှုပ်ပြီး မန္တလေး ၊စစ်ကိုင်း ၊ နေပြည်တော် ၊ ပဲခူး နဲ့ ရှမ်းပြည်နယ်က ဒေသအချို့ မှာ ပျက်စီး ဆုံးရှုံးမှု ကြီးမားခဲ့တာပါ။
Public Service Announcement
စစ်ကောင်စီထိန်းချုပ်ထားတဲ့ နိုင်ငံပိုင်ရုပ်မြင်သံကြားက ဒီနေ့ (ဧပြီ ၁) ထုတ်ပြန်လာတဲ့ သတင်းအရ နေပြည်တော်မှာရှိတဲ့ ပြည်ထောင်စုလွှတ်တော် ၊ ပြည်သူ့လွှတ်တော် ၊အမျိုးသားလွှတ်တော်အဆောက်အဦးတွေ ထိခိုက်ပျက်စီးကုန်တာတွေ့ရပါတယ်။
ငလျင်ကြောင့် ပျက်စီးထိခိုက်သွားတဲ့ လွှတ်တော်အဆောက်အဦးတွေကို စစ်ကောင်စီခေါင်းဆောင်သွားရောက်ကြည့်ရှုစစ်ဆေးပြီးပြန်လည်ပြုပြင်ဖို့ ညွှန်ကြားတယ်လို့ သတင်းထုတ်ပြန်ထားပါတယ်။
စစ်ကောင်စီ တပ်စစ်ရုံးချုပ် အခြေစိုက်ရာ နေပြည်တော်ဟာလည်း ငလျင်ဒဏ်ကို ခံရတဲ့ ဒေသဖြစ်ပြီး ဆေးရုံတွေ၊ ဝန်ထမ်းအိမ်ရာတွေ ၊ စျေးတွေ ၊ လမ်းတံတား တွေ ဆိုးဆိုးရွားရွားထိခိုက်ပျက်စီးပြီး လူအသက်ဆုံးရှုံးမှုတွေ ရှိနေပါတယ်။
နေပြည်တော်မှာ ငလျင်လှုပ်ပြီး လျှပ်စစ်မီးပြတ်တာ ၊ရေပြတ်တာ ၊လမ်းပန်းဆက်သွယ်ရေးပြတ်တောက်တာတွေ ဖြစ်နေပါတယ်။
စစ်ရုံးချုပ်ဝန်းထဲမှာလည်း ထိခိုက်ပျက်စီးမှုတွေ ရှိနေပြီး သတင်းမထွက်အောင်စစ်ကောင်စီက ဖုံးဖိထားပါတယ်။
