မေ-၆၊၂၀၂၅။ရဲခေါင်/People’s Spring
ကရင်နီပြည်နယ်၊မိုးဗြဲမြို့တွင် တိုက်ပွဲပြင်းထန်နေပြီး စစ်ကောင်စီက တိုက်ပွဲအတွင်း အဆိပ်ငွေ့ဗုံးများကြဲ တိုက်ခိုက်နေကြောင်း ကရင်နီအမျိုးသားများကာကွယ်ရေးတပ်(KNDF)စစ်ဗျူဟာ အမှတ် (၁)က ယနေ့(မေ ၆ ရက်) ထုတ်ပြန်သည်။
လက်ရှိအခြေအနေတွင် မိုးဗြဲမြို့၌ တိုက်ပွဲများဆက်လက်ပြင်းထန်နေပြီး စစ်ကောင်စီကလက်နက်ကြီးများ၊ ဒရုန်းများဖြင့် ပြင်းထန်စွာ နေ့စဉ်ရက်ဆက်ထိုးစစ်ဆင်နေသည့်အပြင် လေကြောင်းမှ အဆိပ်ငွေ့ဗုံးများဖြင့်ပါ အသုံးပြုတိုက်ခိုက်နေကြောင်း ထုတ်ပြန်သည်။
“မိုးဗြဲရှိ ဘီလူးချောင်းထဲသို့ပါ စစ်ကောင်စီဘက်မှ အဆိပ်ရည်များ လောင်းထည့်ထားတွေလဲရှိနေပါတယ်”ဟု KNDF စစ်ဗျူဟာ အမှတ်(၁)တာဝန်ရှိသူက ပြောသည်။
Public Service Announcement
https://www.facebook.com/LuduNwayOo/videos/1786129218635966
ထို့အပြင် မိုးဗြဲရေကာတာမှတဆင့် ရေဖောက်ချမှုကြောင့် မိုးဗြဲမြို့ရှိ မြောင်းများနှင့် ဘီးလူးချောင်းအတွင်း ငါးများ အစုလိုက်၊အပြုံလိုက်သေဆုံးမှု ယခုရက်ပိုင်းတွင် ခပ်စိပ်စိပ်တွေ့လာရကြောင်း ဒေသခံများက ပြောသည်။
“စကစတွေ ဆည်ရေအဆိတ်ခတ်မှုကြောင့်လား သေချာတော့ မသိရသေးပေမယ့် တစ်ချို့လူတွေက ကောင်းကောင်းမသေသေးတဲ့ ငါး၊မှုးဝေနေတဲ့ငါး တွေကိုဆယ်ယူပြီး စားကြတာရှိသလို ပြန်ရောင်းကြတာလဲ ရှိပါတယ်။တစ်ချို့က ဝယ်စားမိလို့ လည်းချောင်းယားတာတွေဖြစ်ကြတယ်လို့ ပြောကြပါတယ်။ဆည်မြောင်းရေကိုအမှီပြုပြီး လုပ်ကိုင်စားသောက်နေတဲ့ပြည်သူတစ်ချို့လည်းသတိထားဖို့လိုအပ်သလို ငါးရောင်းငါးဝယ်တဲ့ပြည်သူတွေလည်းသတိထားဖို့လိုအပ်နေတယ် “ဟု မိုးဗြဲမြို့နေပြည်သူတစ်ဦးက ပြောသည်။
ငါးသေများတွေ့ရှိမှုမှာ သတင်းပတ်နှစ်ပတ်ကျော်ကြာရှိလာပြီး ဘီးလူးချောင်းနှင့် မိုးဗြဲဆည် ရေထွက်ပေါက်မှ ထွက်လာသည့် မြောင်းများကို မှီခိုအသုံးပြုသည့် ပြည်သူများအနေဖြင့် သတိပြုကြရန် KNDF မိုးဗြဲဇုန် တပ်ရင်းမှူးသိန်းထွန်းက ပြောသည်။
ကရင်နီပူးပေါင်းတပ်က ထိန်းချုပ်ထားသည် မိုးဗြဲမြို့ကို စစ်ကောင်စီက ပြန်လည်ထိုးစစ်ဆင်နေသည်မှာ ငါးလဝန်းကျင်ရှိနေပြီ ဖြစ်သည်။
တိုက်ပွဲများအတွင်း ကရင်နီပူးပေါင်းတပ်မှ ရဲဘော် ၁၀ဦးကျော်ကျဆုံးခဲ့ရပြီး စစ်ကောင်စီဘက်မှ ၆၀ ထက်မနည်းသေဆုံးကာ လက်နက် ၂၀ခန့်ကို ကရင်နီတပ်ပေါင်းစုက သိမ်းဆည်းရရှိထားသည်။
ရုပ်သံ − KNDF
