ချင်းတောင်ပေါ်သို့ စစ်ကြောင်းထိုးလာသည့် စစ်ကောင်စီတပ်နှင့် ဒေသတော်လှန်ရေးတပ်များ သုံးရက်ဆက်တိုက်ပွဲဖြစ်

မေ၂၃၊ ၂၀၂၅။ ရဲခေါင်/People’s Spring

ချင်းတောင်ပေါ်သို့ စစ်ကြောင်းထိုးလာသည့် စစ်ကောင်စီတပ်နှင့် သုံးရက်ဆက်တိုက်ပွဲဖြစ်ပွားနေပြီး ထွက်ပြေးအလင်းဝင်လာသည့် စစ်ကောင်စီတပ်သားအချို့ရှိကြောင်း CDF-CDM စီးယင်း တာဝန်ရှိသူက လူထုနွေဦးသို့​ ပြောသည်။

စစ်ကောင်စီတပ်သည် အင်အား ၅၀၀ ကျော်ဖြင့် စစ်ကိုင်းတိုင်း၊ ကလေးမြို့ဘက်မှ ချင်းတောင်ပေါ်သို့သို့ မေလ ၁၈ ရက်ကစ၍ စစ်ကြောင်းထိုးလာခြင်းဟု ဆိုသည်။

အဆိုပါစစ်ကြောင်းအား ဒေသကာကွယ်ရေးတပ်ဖြစ်သော CDF CDM SIYIN ၊ PDF ဇိုလန်းနှင့် KKG တို့က မေလ ၂၁ရက် နံနက်မှ ယနေ့(မေလ ၂၃ ရက်)အထိ ခုခံတိုက်ခိုက်နေကြောင်းလည်း CDF-CDM စီးယင်းက အသိပေးသည်။

Public Service Announcement

“မွာလ်ပီးရွာထဲနည်းနည်း ဝင်လာပြီ။သိုင်းငင်းမှာ ပြန်အထိုင်ချဖို့နဲ့ တီးတိန်ကို အင်အားဖြည့်ဖို့လို့ ယူဆတယ်”ဟု CDF-CDM စီးယင်း တာဝန်ရှိသူက စစ်ကောင်စီတပ်စစ်ကြောင်းထိုးလာသည့် အခြေအနေကို ရှင်းပြသည်။

လက်ရှိစစ်ကောင်စီတပ်စစ်ကြောင်းတည်နေရာနှင့် ၎င်းတို့ဦးတည်နေသည့် သိုင်းငင်းကျေးရွာသို့ ရောက်ရှိရန် ၁၂မိုင်ခန့် အကွာအဝေးရှိကြောင်းလည်း ၎င်းက ဆိုသည်။

“ထွက်ပြေးလာတဲ့သူတွေရဲ့ထွက်ဆိုချက်အရ ၅၀၀ ကျော်တယ် သိရတယ်။ထွက်ပြေးလာတဲ့သူတွေက စကစ တပ်သားပါ။ကလေးတောင်ပိုင်း UGတို့ဆီရောက်နေတယ်”ဟုလည်း CDF-CDM စီးယင်း တာဝန်ရှိသူက ပြောသည်။

စစ်ကောင်စီတပ်စစ်ကြောင်းကြောင့် ဒေသခံပြည်သူ ၁,၀၀၀ ကျော် စစ်ဘေးရှောင်နေရကြောင်းလည်း သိရသည်။

ထို့အပြင် စစ်ရေးအခြေအနေကြောင့် မေလ ၂၀ရက်ကစ၍ ကလေး – သိုင်းငင်းလမ်းမကြီး၏ အတက်အဆင်းအားလုံးကို ယာယီပိတ်ထားမည်ဖြစ်ကြောင်း CDF-CDM စီးယင်းက ထုတ်ပြန်ထားသည်။

ကလေးမြို့နှင့် ချင်းပြည်နယ်မြောက်ပိုင်း အဓိက လမ်းမကြီးဖြစ်သည့် ကလေး – သိုင်းငင်းလမ်းပိုင်း ယာယီပိတ်ထားပြီးအချိန်နောက်ပိုင်း ပြဿနာတစ်ခုမျှ တာဝန်ယူမည်မဟုတ်ကြောင်းလည်း ဖော်ပြသည်။

ကလေး-သိုင်းငင်လမ်းမကြီးပေါ်တွင် ခိုင်ကမ်းမြို့၊မွာလ်ပီး၊ထေးဇန်၊ဟိန်ဇိန် နှင့် သိုင်းငင်းရွာကြီးများရှိသည်။တီးတိန်မြို့၊သိုင်းငင်းကျေးရွာတွင် စစ်ကောင်စီတပ်က ၂၀၂၂ဇန်နဝါရီကစ၍ အထိုင်ချခဲ့ပြီး အဆိုပါစခန်းကို ချင်းကာကွယ်ရေးတပ်များက ၂၀၂၄ ဇန်နဝါရီ ၁၆ရက်က သိမ်းပိုက်နိုင်ခဲ့သည်။

သိုင်းငင်းကျေးရွာသည် ကလေး-တီးတိန်လမ်းမပေါ်ရှိ ကလေးမြို့မှ တီးတိန် နှင့်ဖလမ်းမြို့သို့ဆက်သွယ်နိုင်သည့်လမ်းဆုံတွင် ရှိသည်။

ချင်းပြည်နယ်တွင် တော်လှန်ရေးအင်အားစုများသိမ်းပိုက်ရန် တီးတိန်၊ထန်တလန်နှင့် ဟားခါးမြို့ သုံးမြို့သာကျန်ရှိသည်။သို့သော် တီးတိန်တွင် စစ်ကောင်စီ၏ခါးပိုက်ဆောင်တပ်အဖြစ် ဒေသခံများက သတ်မှတ်သည့် ဇိုမီးလက်နက်ကိုင်အဖွဲ့ ZRAရှိကာ ချင်းအမျိုးသားတပ်မတော်(CNA)နှင့် မကြာခဏတိုက်ပွဲ ဖြစ်ပွားနေသည်။