စစ်တပ်နှင့် PNO ပြည်သူ့စစ်က လအိရွာဘုန်းကြီး​ကျောင်းကို ဒရုန်းဖြင့်တိုက် စာသင်​နေ​သောက​လေးငယ်နှစ်ဦးဒဏ်ရာရ

ဇွန်-၁၆၊၂၀၂၅။ရဲခေါင်/People’s Spring

ရှမ်းပြည်နယ်တောင်ပိုင်း၊ဖယ်ခုံမြို့နယ်လအိရွာ ဘုန်ကြီးကျောင်းကို အသေခံဒရုန်းဖြင့်စစ်ကောင်စီတပ်နှင့် PNOပြည်သူ့စစ်များကတိုက်ခိုက်ခဲ့ရာစာသင်နေသည့်မူလတန်းအရွယ် ကလေးနှစ်ဦးထိခိုက်ဒဏ်ရာရရှိခဲ့ကြောင်း ဒေသခံများကပြောသည်။

ယနေ့(ဇွန်လ ၁၆ ရက်)နံနက် ၁၁ နာရီခန့်က စစ်ကောင်စီနှင့် PNO ပြည်သူ့စစ်တို့၏ အသေခံဒရုန်းနှစ်စီးဖြင့် တိုက်ခိုက်ခဲ့ခြင်းဖြစ်သည်။

“စာသင်နေတုန်းကို ​ကြဲ​တာ။ပေါက်ကွဲတဲ့နေရာက တည့်တည့်မဖြစ်လို့ ကလေးတွေကံကောင်းတာ”ဟု ဖယ်ခုံမြို့ခံတစ်ဦးက စစ်ကောင်စီ၏ တိုက်ခိုက်မှုကိုရှင်းပြသည်။

Public Service Announcement

စစ်ကောင်စီ၏ အသေခံဒရုန်းဖြင့်ဗုံးကြဲတိုက်ခိုက်မှုသည် ဘုန်တော်ကြီးသင်ပညာရေးကျောင်းဖြစ်ပြီး မူလတန်းအရွယ်ကလေးငယ်နှစ်ဦး ထိရှဒဏ်ရာရခဲ့ပြီး ဘုန်းကြီးကျောင်းအတွင်း ပျက်စီးမှုအချို့ရှိကြောင်း ဖယ်ခုံမြို့နယ်ပြည်သူ့လုံခြုံရေးအဖွဲ့က ထုတ်ပြန်သည်။

ဖယ်ခုံမြို့၏အနောက်ဘက်ခြမ်းရှိ လအိ ရွာကို လေ ကြောင်းအသုံးပြု၍ စစ်ကောင်စီသည် မကြာခဏတိုက်ခိုက်လေ့ရှိပြီး ထိုအနက် ယမန်နှစ်စက်တင်ဘာ ၅ ရက်က ကျောင်သားကလေးငယ်နှင့်ဆရာမ ၁၀ ဦးထက်မနည်းသေဆုံးခဲ့ရဖူးသည်။

“ကျောင်းဖွင့်နေတဲ့ စစ်ရှောင်ကျောင်းများ ယာယီပိတ်ထားပေးကြရင်ကောင်းမယ်”ဟုရှမ်းနှင့်ကရင်နီပြည်နယ်၌ စစ်ရှောင်ကူညီနေသူတစ်ဦးက​ပြောသည်။

ဇွန်လ ၉ ရက်က ကျုံဒိုးမြို့နယ်၊ပိုင်ရပ်ကျေးရွာထဲရှိ စာသင်ကျောင်းကို စစ်ကောင်စီက လေယာဥ်ဖြင့်ဗုံးကြဲခဲ့ရာ ၆ နှစ် နှင့် ၈ နှစ် အရွယ်ကလေးသုံးဦး၊ ကျောင်း ဆရာမ တစ်ဦး နှင့် ပြည်သူတစ်ဦးသေဆုံးခဲ့သည်။

ထို့အတူ မေလ ၁၂ရက်က ဒီပဲယင်းမြို့နယ် အိုးတိန်တွင်းကျေးရွာစာသင်ကျောင်းအား လေကြောင်းမှဗုံးကြဲတိုက်ခိုက်ခဲ့ရာ ဆရာမနှစ်ဦး၊ ကျောင်းသား၊သူ ကလေးငယ် ၂၂ ဦး သေဆုံးပြီး စုစုပေါင်း ၁၀၂ဦး ဒဏ်ရာရခဲ့သည်။

အရပ်သားလူထုနေထိုင်ရာနေရာများ၊စစ်ရှောင်စခန်း များကို ပစ်မှတ်ထား၍ စစ်ကောင်စီ က လေကြောင်း၊လက်နက်ကြီးဖြင့် တိုက်ခိုက်မှုသည် ပိုဆိုးလာပြီး ကလေးငယ်များအပါအဝင် ပြည်သူရာနှင့်ချီ၍ လပိုင်းအတွင် သေဆုံးထားသည်။