ဇွန် ၁၉ ပန်းသပိတ်မှာ ပူပေါင်းပါဝင်ကြဖို့ စစ်ကိုင်းတိုင်းက ပြည်သူတွေဆန္ဒထုတ်​ဖော်

ဇွန်-၁၇၊၂၀၂၅။ သုည/People’s Spring

စစ်ကိုင်းတိုင်းအတွင်း သပိတ်အဖွဲ့တွေ၊ ဒေသခံပြည်သူတွေကဒီကနေ့ (ဇွန်လ ၁၇)မှာလူထုခေါင်းဆောင် ဒေါ်အောင်ဆန်းစုကြည်ရဲ့ မွေးနေ့ ဇွန် ၁၉ ပန်းသပိတ်မှာ ပူပေါင်းပါဝင်ကြဖို့လှုံ့ဆော်တဲ့ ဆန္ဒပြပွဲတွေ အသီးသီး ပြုလုပ်ခဲ့ကြပါတယ်။

ဆားလင်းကြီးမြို့နယ်၊လက်ပံတောင်းတောင်ဒေသမှာ သပိတ်အင်အားစုက ဦးဆောင်ပြီး”ဒေါ်အောင်ဆန်းစုကြည်နဲ့တကွတပြည်လုံးလွတ်မြောက်ရေးအတွက် ဆက်ရုန်းကြ”စာသားကိုကိုင်ဆောင်ကာ ဇွန် ၁၉ ပန်းသပိတ်မှာ ပူပေါင်းပါဝင်ကြရန် တိုက်တွန်းနှိုးဆော်ခဲ့ပါတယ်။

ယင်းမာပင်မြို့နယ်မှာလည်းသပိတ်အင်အားစုတွေစုပေါင်းကာ ဒေါ်အောင်ဆန်းစုကြည်ရဲ့အသက်(၈၀)ပြည့်မွေးနေ့အကြို အထိမ်းအမှတ်အဖြစ် လူထုသပိတ်လှုပ်ရှားမှုကို ပြုလုပ်ခဲ့ပါတယ်။

Public Service Announcement

ဆန္ဒပြပြည်သူတွေက နှင်းဆီပန်း၊ လူထုခေါင်းဆောင် ဒေါ်အောင်ဆန်းစုကြည်ရဲ့ ဓာတ်ပုံနဲ့အတူ “Freedom From Fear” စာသားကိုင်ဆောင်ကာ ဒေါ်အောင်ဆန်းစုကြည်အပါအဝင်ဖမ်းဆီးခံနိုင်ငံရေးအကျဉ်းသားတွေလွတ်မြောက်ရေးဆုတောင်းမှုတွေ လုပ်ဆောင်ခဲ့ပါတယ်။

ကလေးမြို့နယ်မှာ လူထုတိုက်ပွဲဦးဆောင်ကော်မတီနဲ့ ဒေသခံပြည်သူတွေ ပူးပေါင်းကာ ဒေါ်အောင်ဆန်းစုကြည်ရဲ့အသက်(၈၀)ပြည့်မွေးနေ့အထိမ်းအမှတ် အကြိုအဖြစ် ပန်းသပိတ်နဲ့အတူ အဖမ်းဆီးခံ နိုင်ငံရေးအကျဉ်းသားတွေလွတ်မြောက်ရေးအတွက် တောင်းဆိုခဲ့ပါတယ်။

ဆန္ဒပြည်သူတွေက နှင်းဆီပန်းအနီတွေနဲ့အတူ “Happy Birthday အမေစု” ၊ “ ဒေါ်အောင်ဆန်းစုကြည်နဲ့တကွ တပြည်လုံးလွတ်မြောက်ရေးအတွက် ဆက်ရုန်းကြ”၊ “ကလေးမြို့လူထုတိုက်ပွဲဦးဆောင်ကော်မတီ” စတဲ့ စာသားတွေကိုကိုင်ဆောင်ပြီးဆန္ဒထုတ်ဖော်ခဲ့ပါတယ်။

ဒါ့အပြင်စစ်အာဏာရှင်စနစ်ကို ဆန့်ကျင်ကြဖို့နဲ့ ဇွန် ၁၉ ရက် ဒေါ်အောင်ဆန်းစုကြည်မွေးနေ့မှာ ပန်းသပိတ်လှုပ်ရှားမှု လုပ်ဆောင်ကြဖို့လည်း တိုကတွန်းလှုံ့ဆော်ခဲ့ပါတယ်။

ဓာတ်ပုံ – ကလေးမြို့နယ်လူထုသပိတ်၊ စစ်ကိုင်းဒေသသပိတ်အင်အားစု၊ လက်ပံတောင်းသပိတ်