ဇူလိုင်-၄၊ ၂၀၂၅။ ရဲခေါင်/People’s Spring
အရက်ဝယ်ရန် ထွက်လာသည့် စစ်ကောင်စီ ရဲနှစ်ဦးကို ဖမ်းမိခဲ့ကြောင်း တောင်သာ ပကဖ(ပြည်သူ့ကာကွယ်ရေးအဖွဲ့)တာဝန်ရှိသူ လူထုနွေဦးသို့ ပြောသည်။
ယမန်နေ့(ဇူလိုင် ၃ ရက်)ညနေပိုင်းတွင် ဖမ်းမိခဲ့သူသည် ရန်ကုန်မြို့ မှော်ဘီရဲတပ်ရင်း(၅)မှ ရဲတပ်သားအောင်သီဟ(ကိုယ်ပိုင်နံပါတ် လ-၃၀၆၉၁၇)နှင့် ဒုတပ်ကြပ်ဟန်ဝေအောင်(ကိုယ်ပိုင်အမှတ် လ-၂၆၄၅၈၈)တို့ဖြစ်သည်။
၎င်းတို့သည် တောင်သာမြို့ရှိ အမှတ်(၁)စွပ်ကျယ်စက်ရုံ၌ တာဝန်ထမ်းဆောင်ကာ လုံခြုံရေးတာဝန်ကျနေခြင်းဟု ဆိုသည်။
Public Service Announcement
၎င်းတို့နှစ်ဦး မြို့ပြင်သို့ ကျွံထွက်လာစဥ် တောင်သာမြို့နယ် ပြည်သူ့ကာကွယ်ရေးရဲဘော်များက ဖမ်းဆီးနိုင်ခဲ့ခြင်းဖြစ်ကာ ဆိုင်ကယ်တစ်စီး၊ ဖုန်းနှစ်လုံးနှင့် လက်ပစ်ဗုံးတစ်လုံးကို သိမ်းဆည်းရရှိကြောင်း အသိပေးသည်။
“သူတို့ဆီက မေးမြန်းစစ်ဆေးချက်တွေတော့ ထပ်လုပ်နေတုန်းပဲ”ဟု တောင်သာ ပကဖ တာဝန်ရှိသူက ဖမ်းမိခဲ့သည့်ရဲနှစ်ဦးနှင့်ပတ်သက်၍ပြောသည်။
ပြီးခဲ့သည့် ဇွန်လကလည်း စစ်ကောင်စီ တပ်သားနှစ်ဦးကို တောင်သာ ပကဖ က ဖမ်းဆီးရရှိထားသည်။
ထို့အတူ ညောင်ဦးမြို့နယ်မှ တောင်သာမြို့နယ်ဘက်သို့ စစ်ကြောင်းထိုး လာသည့် စစ်ကောင်စီတပ်ကိုလည်း တောင်သာ ပကဖ က တိုက်ခိုက်လျက်ရှိသည်။
