ဇူလိုင်-၇၊ ၂၀၂၅။ People’s Spring
ရှမ်းပြည်နယ်မြောက်ပိုင်းက နောင်ချိုမြို့အနီးမှာ တိုက်ပွဲတွေဆက်လက်ပြင်းထန်နေပြီး စစ်တပ်ရဲ့ စစ်ကြောင်းတွေက ရှေ့တိုးလာနေတယ်လို့ နောင်ချိုမြို့ခံတွေက ပြောပါတယ်။
ပြင်ဦးလွင်မြို့ကနေစစ်ကြောင်းထိုးလာတဲ့စစ်ကောင်စီတပ်စစ်ကြောင်းနဲ့ တော်လှန်ရေးတပ်တွေက နောင်ချိုမြို့အဝင်နားက ကျောက်ကြမ်းရွာမှာ တိုက်ပွဲတွေပြင်းထန်နေတယ်လို့နောင်ချိုမြို့ခံတွေကပြောပါတယ်။
တောင်းခမ်းဒေသကစစ်ကြောင်းထိုးလာတဲ့စစ်ကောင်စီတပ်စစ်ကြောင်းကလည်း နောင်ချိုမြို့အနီးက မျက်ချင်းနုရွာနားမှာ တိုက်ပွဲပြင်းထန်နေပြီး တော်လှန်ရေးတပ်တွေ သိမ်းပိုက်ထားတဲ့ အမှတ်(၆၀၆) ဒုံးတပ်ရင်းဌာနချုပ်ပြန်ရဖို့ထိုးစစ်ဆင်နေတယ်လို့လည်းနောင်ချိုမြို့ခံတွေကပြောပါတယ်။
Public Service Announcement
ဒါ့အပြင်ကံကြီးရွာအရှေ့ဘက်ကစစ်ကြောင်းထိုးလာတဲ့စစ်တပ်စစ်ကြောင်းကလည်း နောင်လင်ရွာကျော်လာပြီး နောင်ချိုမြို့နားကကိုးကန့်ရွာဖြစ်တဲ့ ရွှေဖီညွှန့်ရွာနား နီးကပ်လာနေပြီလို့လည်း ဆိုပါတယ်။
“ရွှေဖီညွှန့်ရွာနားက နားမုံရွာကိုစကစမနေ့ကရသွားတယ်ကြားတယ်။အခုက တဖြည်းဖြည်းမြို့နဲ့ ပိုနီးလဘာတာပေါ့။ ဒီပုံအတိုင်းဆို ပြန်ပေးရမယ် ထင်တပါတယ်”လို့ နောင်ချိုမြို့ခံ အမျိုးသမီးတစ်ဦးက ပြောပါတယ်။
တအာင်းတပ်မတော်(TNLA)ရဲ့ဇူလိုင် ၇ရက် ထုတ်ပြန်ချက်မှာတော့ ကျောက်ကြမ်း၊ အောင်ချမ်းသာ၊ ရေမောင်းတန်း၊ နောင်လင် နဲ့ မျက်ချင်းနုကျေးရွာတွေမှာ တိုက်ပွဲဆက်လက်ဖြစ်ပွားခဲ့တယ်လို့ ဖော်ပြထားပါတယ်။
ဇူလိုင် ၆ရက်က ကျောက်ကြမ်းကျေးရွာမှာစစ်ကောင်စီတပ်နဲ့ တိုက်ပွဲဖြစ်ပွားနေချိန် စစ်ကောင်စီတပ်ကလက်နက်ကြီး(၂၄)လုံးနဲ့ ဒရုန်းနဲ့ ဗုံး(၃၀)လုံးပစ်ကူတိုက်ခိုက်ခဲ့တယ်လို့ဖော်ပြထားပါတယ်။
နောင်လင်ကျေးရွာတိုက်ပွဲကိုလည်း စစ်တပ်က ဒရုန်းနဲ့ ဗုံး (၁၆)လုံး၊ လက်နက်ကြီး (၄၀)လုံးပစ်ကူတိုက်ခိုက်ခဲ့တယ်လို့ ထပ်မံဖော်ပြထားပါတယ်။ တိုက်ပွဲဖြစ်ပွားခြင်းမရှိတဲ့ လုံစံကျေးရွာဘက်ကိုလည်း စစ်ကောင်စီတပ်က လေကြောင်းကနေ ဗုံး (၃၂)လုံးနဲ့ လုံဖာကျေးရွာကိုလည်း လေကြောင်းကနေဗုံး (၂)လုံးကြဲချတိုက်ခိုက်ခဲ့တယ်လို့ဆိုပါတယ်။
နောင်ချိုမြို့အပါအဝင် TNLAထိန်းချုပ်ထားတဲ့နေရာတွေကို စစ်ကောင်စီက နေ့စဉ်လေကြောင်း အပြင်းအထန်တိုက်ခိုက်နေတာကြောင့် တစ်ဖက်သတ်အပစ်ရပ်စဲထားမှုကို ရုတ်သိမ်းလိုက်တယ်လို့ တအာင်းတပ်မတော်(TNLA)ရဲ့ ပြောရေးဆိုခွင့်ရှိသူ လွေးယေဦးက ဇူလိုင် ၅ရက်မှာပြုလုပ်တဲ့ သတင်းစာရှင်းလင်းပွဲမှာ ပြောကြားထားပါတယ်။
ဒါ့အပြင် နောင်ချိုမြို့ကို စစ်ကောင်စီထံ ပြန်ပေးမှာမဟုတ်ဘူးလို့လည်း TNLAရဲ့ ပြောရေးဆိုခွင့်ရှိသူက ဆိုပါတယ်။
ဇွန်လအတွင်းမှာနောင်ချိုမှာတိုက်ပွဲ ၈၁ကြိမ်ဖြစ်ခဲ့ပြီးတော့ စစ်ကောင်စီက လက်နက်ကြီး အလုံး ၁၇၅၀ကျော်၊ လေယာဉ်နဲ့ အကြိမ်ပေါင်း ၄၀ ဗုံး အလုံးပေါင်း၁၅၄ လုံး ကြဲချခဲ့တယ်လို့ TNLA ကဆိုပါတယ် ။ဒါ့အပြင်စစ်တပ်ကဒရုန်းဗုံး ၆၃၀ ကျော်၊ အဆိပ်ငွေ့ဗုံး ၃၉လုံး အသုံးပြု တိုက်ခိုက်ခဲ့တယ်လို့ဆိုပါတယ်။
