မိဘတွေကို ရှာမတွေ့ရင် ၂ နှစ်သားလောက်ထိ ငယ်ရွယ်တဲ့ကလေးတွေကိုပါ စစ်တပ်ဖမ်းဆီးနေ

သြဂုတ်-၁၃၊၂၀၂၅။People’s Spring

မိဘတွေကို ရှာမတွေ့ဘူးဆိုရင်အသက် ၂နှစ်လောက်ထိ ငယ်ရွယ်တဲ့ ကလေးတွေကိုပါ ဓါးစာခံအဖြစ်မြန်မာစစ်တပ်က ဖမ်းဆီးနေတယ်လို့ ကုလသမဂ္ဂ စုံစမ်းရေး အရာရှိတွေက ပြောပါတယ်။

အဲဒီကလေးတွေကိုလည်း စနစ်တကျနှိပ်စက်ညှင်းပန်းမှုတွေကြောင့်နာမည်ဆိုးနဲ့ကျော်ကြားရာ အကျဉ်းထောင်တွေ၊ ထိန်းသိမ်းရေး စခန်းတွေထဲမှာ စစ်တပ်က ထိန်းသိမ်းထားလေ့ ရှိတယ်လို့ ဆိုပါတယ်။ ကုလသမဂ္ဂရဲ့ မြန်မာနိုင်ငံဆိုင်ရာလွတ်လပ်သောစုံစမ်းစစ်ဆေးမှုယန္တရား (IIMM)က ရရှိထားတဲ့ အထောက်အထားတွေအရ မိဘတွေ ထွက်ပြေး တိမ်းရှောင်နေရင် စစ်တပ်ဟာအသက် ၂ နှစ်ကနေ ၁၇ နှစ်အတွင်းသားသမီးတွေကို အကြောင်းမဲ့ ဖမ်းဆီးပြီး အကျပ်ကိုင်လေ့ ရှိတယ်လို့ သိရပါတယ်။

IIMM ဟာ ၂၀၂၁ ခုနှစ်၊ စစ်တပ်အာဏာသိမ်းပြီးတဲ့နောက် ပြည်တွင်းမှာ ကျူးလွန်နေတဲ့ ကြမ်းကြုတ်ရက်စက်မှုတွေကို စနစ်တကျ မှတ်တမ်းပြုစုဖို့ ကုလသမဂ္ဂ ဖွဲ့စည်းပေးထားတဲ့ လုပ်ငန်းစဉ် ယန္တရား တစ်ခုပါ။

Public Service Announcement

စစ်တပ်ရဲ့ ဖမ်းဆီးခြင်းကို ခံခဲ့ရတဲ့ ကလေးတွေထဲက တချို့ဟာ နှိပ်စက်တာ၊ ဆိုးဆိုးရွားရွား ဆက်ဆံတာ၊ လိင်ပိုင်းဆိုင်ရာ ဒါမှမဟုတ် လိင်ခွဲခြားမှုကို အခြေပြုတဲ့ ရာဇဝတ်မှုတွေ ကျူးလွန်ခံရတာတွေ ရှိခဲ့တယ်လို့လည်း IIMMက ဆိုပါတယ်။

မိဘတွေကစစ်အာဏာရှင်စနစ်ဆန့်ကျင်ရေး လှုပ်ရှားမှုတွေနဲ့ပတ်သက်နေတယ်လို့စွပ်စွဲခံရပြီး တိမ်းရှောင်နေတဲ့အခါ သူတို့ရဲ့ သားသမီးတွေကို စစ်သားတွေရော၊ ရဲတွေကပါ ဖမ်းဆီးခေါ်ဆောင်သွားလေ့ ရှိပါတယ်။

မြန်မာစစ်တပ်ဟာအာဏာသိမ်းပြီးနောက်ပိုင်း နိုင်ငံရေး အတိုက်အခံ အင်အားစုတွေ၊ ဂျာနယ်လစ်တွေ၊ တက်ကြွလှုပ်ရှားသူတွေ အပါအဝင် လူပေါင်း ၃၀,၀၀၀ လောက်ကိုလည်း ဖမ်းဆီးခဲ့ပြီး ဖြစ်ပါတယ်။

IIMMက စုစည်းထားတဲ့ ခိုင်မာတဲ့ သက်သေတွေအရ မြန်မာစစ်တပ် ထိန်းချုပ်ထားတဲ့ အကျဉ်းထောင်တွေ၊ ထိန်းသိမ်းရေး စခန်းတွေမှာ နိုင်ငံရေး အမှုနဲ့ စွပ်စွဲခံရသူတွေကို ရိုက်နှက်တာ၊ ရှော့တိုက်တာ၊ လက်သည်းခြေသည်းတွေကို ပလာယာနဲ့ ဆွဲနုတ်တာတွေ အပါအဝင် နည်းလမ်း အမျိုးမျိုးသုံးပြီး နှိပ်စက်တာတွေ ရှိနေတယ်လို့လည်း သိရပါတယ်။ တချို့အခြေအနေတွေမှာတော့ လိင်ပိုင်းဆိုင်ရာ အကြမ်းဖက်တာ၊ မုဒိမ်းကျင့်တာ၊ အုပ်စုဖွဲ့ မုဒိမ်းကျင့်တာတွေထိ ရှိခဲ့ပါတယ်။

IIMMရဲ့ စုံစမ်းရေး အရာရှိတွေကတော့ အဲဒီလို ဆိုးယုတ်တဲ့လုပ်ရပ်တွေကျူးလွန်တဲ့အကျဉ်းထောင် အာဏာပိုင်တွေ၊ လုံခြုံရေး တပ်ဖွဲ့ဝင်တွေနဲ့ သက်ဆိုင်ရာ ယူနစ်တွေကိုလည်း ခွဲခြားထုတ်နုတ် မှတ်တမ်းတင်နေရာမှာလည်း တိုးတက်မှုတွေ ရှိနေတယ်လို့ ပြောကြားခဲ့ပါတယ်။

ကိုးကား-The Guardian