ကောလင်းကို စစ်ကောင်စီ လေကြောင်းတိုက်ခိုက်၊ စစ်ရှောင်မိသားစုဝင် ၃ဦးသေဆုံး

သြဂုတ်-၂၀၊ ၂၀၂၅။ လူအေး/People’s Spring

စစ်ကိုင်းတိုင်း၊ ကောလင်းမြို့နယ်မှ စစ်ဘေးရှောင်ပြည်သူများရှိသည့် ရွာများကို စစ်ကောင်စီက ယနေ့ နံနက်ပိုင်းတွင် ဗုံးကြဲတိုက်ခိုက်ရာ ဒေသခံသုံးဦး သေဆုံးပြီး ထိခိုက်မှုများပြားကြောင်း သတင်းရရှိသည်။

နံနက် ၆နာရီ ၁၃မိနစ်ခန့်က ကောလင်းမြို့နယ် အရှေ့ခြမ်းရှိ ရှမ်းကုန်းရွာ၊ ခံသာရွာ၊ စွယ်ရရွာနှင့် ဘန့်ဘွေးကုန်းရွာတို့ကို Y12လေယာဉ်ဖြင့် ဗုံးကြဲသွားခြင်းဖြစ်သည်။

စွယ်ရရွာမှ မိသားစုဝင်သုံးဦးသေဆုံးပြီး ထိခိုက်ဒဏ်ရာရသူများပြားသည်ဟု ကောလင်းမြို့ခံသတင်းရင်းမြစ်ထံမှ သိရသည်။

Public Service Announcement

“လုံးဝကို တိုက်ပွဲရှိမနေပါ။ အခုထိကုန်တာ အရပ်သားတွေချည်းပါ။ Y12နဲ့ ဗုံးတွေအများကြီးကြဲသွားတာ”ဟု အဆိုပါသတင်းရင်းမြစ်ကပြောသည်။

စစ်ဘေးရှောင်အရပ်သားပြည်သူများ၏ နေအိမ်များကို Y12လေယာဉ်ဖြင့် ဗုံး အလုံး ၂၀ ကျော် ကြဲသွားခြင်းဖြစ်ကြောင်း ကောလင်းမြို့နယ်ပြည်သူ့ကာကွယ်ရေးတပ်ဖွဲ့(KLPDF)ကသတင်းထုတ်ပြန်ထားသည်။ မြေပြင်ထိခိုက်မှုအခြေအနေကို KLPDFက ထုတ်ပြန်ထားခြင်းမရှိသေးပေ။ ထိခိုက်ဒဏ်ရာရသူများ၏ အခြေအနေကို People’s Spring က ဆက်လက်စုံစမ်းနေသည်။

ပြီးခဲ့သည့် ဇူလိုင် ၁၄ရက် ညနေကလည်း ကောလင်းမြို့ကို စစ်ကောင်စီက ဂျက်ဖိုက်တာဖြင့် ဗုံးကြဲရာ ကလေးငယ်တစ်ဦးအပါအဝင် အရပ်သားသုံးဦးဒဏ်ရာရခဲ့ပြီး ဆီဘောက်ဆာ ကားနှစ်စီး၊ ထမင်းဆိုင်တစ်ဆိုင်လည်း ပျက်စီးခဲ့သည်။